هەواڵەیلێگ ک وە ماڵپەڕ ژینگەوان ڕەسینە,باس لە یە کەن ک دارستانەیل پارێزگاێ کرماشان وە شیوەێگ گوماناوی ئاگر دریەن و سرنج نەێان ناوەندەیل حکوومەت بینەسە باێس فرەوە بین ئاگر گردنەگان
ڕووژ سێ شەمە ڕێکەوت 5 گەڵاوێژ 2716ی کوردی دارستانەیل ئاوایی جەواهر لە ناوچەێ بێڵەوار پارێزگاێ کرماشان ئاگر دریان و بەش فرەێگ لە دارستان و لەوەڕگائەیل ئی ناوچە وە گشتی وە ئاگر دوشمەنەیل ژینگەێ وڵاتا سزیان
یەکی وە هاووڵاتیەیل ئەو ناوچە لە بارەێ ئی ئاگرداینەیلە وە ژینگەوان وەت,ئاگرداین دارستانەیل و لەوڕگائەیل ئەو ناوچە وە چەو خەڵک ئەو مەڵوەندە جوور ڕۊداوێگ ئاسایی و چەوەڕێ کریایێگ وە پێ هاتێە و هەر ڕووژە شوونێگ ئاگر دریەێدن,ئەو هاوڵاتیە وە دریژەێ قسەگانێ وەت ک ئاگر ناوچەێ بێڵەوار فرەتر لە 7 ساعەت دریژە داشتێیە و فرەتر وە 30 هکتار لە دارستانەیل و لەوەڕگائەیل ئەو ناوچە وە گشتی سزیانە ک زەرەر و زیان وەرچەوێگ وە ژینگە و گیانەوەرەیل ئەو ناوچە ڕەسییە
هەر لە پەێوەندی وەگەرد ئی ئاگر داینەیلە دۊانیمەڕوو سێ شەمە 5 گەڵاوێژ دارستان و لەوەڕگائەیل کۊەێ بانکول سەر وە شار ئەیوان ئاگر دریادن و خسار ژینگەیی وەرچەو و فرەێگ وە سرووشت و گیانەوەرەیل ئەو ناوچە ڕەسی
جی باس دێرێ ک ئی دو ئاگرگردنەیل پارێزگاێ کرماشانە وە لاێن خەڵک ژینگەپارێز ئی مەڵوەندە کوشیانەسەو
لە ئی ماوەێ ڕابردووە ک ئاگرداین دارستانەیل کوردستانە وە شیوەێ وەرچەوێگ فرەوە بینە ناوەندەیل حکوومەت یەکی له باێسەیل سەرەکی فرەوە بین ڕێژەێ سزیان دارستانەگانن, وەگەرد کەمترین بەشداری ناوەندەیل حکوومەت,تەنانەت هۊچ کەرەستەێ ئاگرکوشاندنەوەێگیش ئڕاێ خەڵک ئەو ناوچە دابین نەکردنە و وەر چەو نەگردنە
