رژیمی تاران لەو کاتەوەی لەگەڵ وڵاتانی رۆژئاوایی لەسەر پرسی ناوکییەکان گەیشتۆتە رێکەوتن، هەتا ئێستا نزیک بە ٢٠٠ جار فرۆکەی شیرکەتە فڕۆکەوانییەکانی رژیمی تاران بەرەو سووریا هەڵفرێنیان هەبووە.
بەپێی راپۆرتی رۆژنامەی “ناشناڵ ئینترست” و ماڵپەری ئەلعەڕەبییە، کە رۆژی چوارشەممەی رابردوو ١٤ی ژوئەن بڵاو بوویەوە، فرۆکە مسافیربەرییەکانی رژیمی تاران بە مەبەستی رێگری کردن لە رووخانی رژیمی ئەسەد، چەک و چۆڵ و هێزی چەکداریان بۆ دیمەشق گواستۆتەوە.
شیرکەتی فڕۆکەوانیی ئێران ئایر و ماهان کە نزیک لە سوپای تیرۆریستیی پاسدارانە، لە ریزی ئەو شیرکەتە فرۆکەوانیانەدان کە چەک و تەقەمەنیی بۆ سووریا دەگوازنەوە.
شیرکەتی بوئینگ و ئایر باس لە کاتێکدا گرێبەستیان لەگەڵ شیرکەتی فڕۆکەوانیی ماهان بۆ فرۆشتنی فڕۆکە بەستووە، کە شیرکەتی فڕۆکەوانیی ماهان راستەخۆ لە خزمەت سوپای تیرۆریستیی قودسی رژیمی ئیسلامیی ئێراندایە کە رۆڵی لە سەرکوتی خەڵکی ئازادیخوازی سووریادا هەیە.
پێشتر لە سالی ٢٠١٢دا شیرکەتەکانی ئێران ئایر و ماهان بە هۆی گواستنەوەی چەک و چۆڵ و دەزگای سیخوڕی لەلایەن ویلایەتە یەکگرتووەکانی ئەمریکاوە گەمارۆیان خرابووە سەر.
شیرکەتە فڕۆکەوانییەکانی رژیمی ئیسلامیی ئێران بەهۆی گەمارۆکانەوە، کەمترین ئەمنیەتی گیانیان بۆ مسافیران هەبوو، کە لە ماوەی دوو دەیەی رابردوودا چەندین فڕۆکەی تۆپۆلۆفی مسافیربەریی رژیم کەوتنە خوارەوە.
هاوکات لەگەڵ زیادبوونی شەڕ و تێکهەڵچوونەکان لە سووریا، بوونی هێزی چەکداری سوپای تیرۆریستیی قودس و هەروەها فڕینی فڕۆکەکانی ئەو رژیمە تیرۆریستییە بەرەو سووریا رووی لە زیادبوون کردووە و راستەوخۆ بڕیاری گەمارۆکانی سەر ئەسەدیان پێشیل کردووە.
