هه‌موو به‌یانییه‌ك ڕۆژی كورد له ڕۆژهه‌ڵاته‌وه هه‌ڵدێ
پێناسه‌ی ڕۆژی كورد
ناوەندی ڕۆژی کورد ناوەندێکی کوردییە كه له ٢١ی مارسی ٢٠١٣ دامەزراوە و لە ٢٣ی ئووتی ٢٠١٥ را بە شێوەی ڕەسمی و ڕێگە پێدراو ده‌ستی به وه‌شان كردووه و بنکە سەرەکییەکەی لە وڵاتی فەڕانسه‌یە و به شێوه‌ی فه‌رمی وه‌ك ئه‌نجومه‌نێك ئیزنی چالاكی پێدراوه لە ئێستاشدا لە چه‌ندین وڵاتی ئورووپایی و ئازاد لقی دامه‌زراندووه.
ناوه‌ندی ڕۆژی كورد جیا له به‌شی ڕاگه‌یاندن و كردنه‌وه‌ی پێشانگا ، كۆڕ و كۆبوونه‌وه ، سیمینار و كۆنفڕانس له بواره جۆربه‌جۆره‌كان دا له فەڕانسە و وڵاتانی دیکەی ئورووپا به‌ڕێوه ده‌با
ئه‌و ناوه‌نده سه‌ر به هیچ حیزب، رێکخراو و ره‌وتێک نییه و له باوه‌ڕدا كوردستانی و له بڕیار دا سه‌ربه‌خۆ ده‌جووڵێته‌وه و هه‌وڵ ده‌دا نه‌بێته تریبوون بۆ تاكه حیزب یان لایه‌نێك و خۆی به دوور ده‌گرێ له ململانییه حیزبیه‌كان و مێدیای ئەو ناوەندە لە بەرژەوەندی دۆزی ڕەوای گەلەکەمان دەبێ.
ناوه‌ندی ڕۆژی كورد له سه‌ر بنه‌ما سه‌ره‌كییه‌كانی دێموكراسی ، ئازادی و مافی مرۆڤ دامه‌زراوه و باوه‌ڕی قووڵی به دروشمی سه‌ره‌كیی وڵاتی فه‌ڕانسه ، ئازادی ، بەرابەری ، برایه‌تی و هه‌وڵدان بۆ جیهانێكی ئازاد و دێموكرات به گشتی و كوردستانێكی سه‌ربه‌ست و سه‌ربه‌خۆ و ئازاد ده‌دا و و ڕێز بۆ هه‌ر چه‌شنه بیرو باوه‌رێكی سیاسیی دێموكراسیانه و بیرو باوه‌ڕێكی ئایینیی پێشكه‌وتوو داده‌نێ .
رۆژی كورد خاوەنی چەندین ماڵپەڕ لە بواری جیاجیای وەک ماڵپه‌ڕی مرۆڤایه‌تی بۆ باس له سه‌ر ڕه‌وشی مافه‌كانی مرۆڤ، ماڵپه‌ڕی هاوار بۆ تاوتوێكردن و باسكردن له سه‌ر پرسی ژنان و مافه‌كانیان
،ماڵپه‌ڕی ژینگه‌وان تایبه‌ته به دۆخی ژینگه و ژینگه پارێزی له كوردستان ، ماڵپه‌ڕی هانا بۆ پرسی په‌ناخوازی و ره‌شی په‌نابه‌ران ، ماڵپه‌ڕی گڕووگاڵی منداڵان هه‌ر له سه‌ر ناوی گۆڤاری منداڵانی سه‌رده‌می كۆماری كوردستان دامه‌زراوه و تایبه‌ت كراوه بۆ منداڵانی كورد.
هه‌روه‌ها ماڵپه‌ڕی سه‌ره‌كیی ڕۆژی كورد كه له ڕاستیدا به‌شی سیاسیی ئه‌و ناوه‌نده له خۆ ده‌گرێ بابه‌ت و وتووێژ و هه‌واڵه‌كانی پێوه‌ندیدار به كوردستان ، ئێران و جیهان به شێویه‌كی پرۆفشناڵ و سه‌رده‌میانه به زمانه‌كانی کوردی به دوو زاراوه‌ی سۆرانی و كرمانجی ، فارسی ، ئینگلیسی، فه‌ڕانسه‌وی ، ئاڵمانی، بەلووچی، عەڕەبی، تورکی ، سوێدی و نۆروێژی و ڕووسی ڕووماڵ ده‌كا.
ڕۆژی كورد پشت به زانیاری و سه‌رچاوەی ڕاست ده‌به‌ستێ و به گواستنه‌وه‌ی زانیاریی ڕاست و دروست هه‌وڵ ده‌دا ببێته سه‌رچاوه‌یه‌كی باوه‌ڕ پێكراو و جێگه‌ی متمانه .
هه‌وڵ ده‌دا جیا له بڵاوكردنه‌وه‌ی هه‌واڵ بە بڵاوکردنه‌وه‌ی وتار، راپۆرت و وتووێژ له گه‌ڵ كه‌سایه‌تییه كورد و بیانییه‌كان ، نووسه‌ران و خاوه‌نبیران، ڕووداوەکانی ڕۆژهه‌ڵاتی ناوه‌ڕاست به گشتی و هه‌ر چوار پارچه‌ی کوردستان به تایبه‌تی شی بکاته‌وه.
رۆژی كورد له بواری ڕاگه‌یاندن و ڕۆژنامه‌نووسی دا به شێوه‌یه‌كی سه‌رده‌میانه و بێلایه‌ن هه‌وڵ ده‌دا جیا له گه‌یاندنی زانیاری ،به شێوه‌یه‌كی ئوسوولی و زانستییانه و ته‌نانه‌ت ڕه‌خنه‌گرانه كار بكا و ئامانجیشی له ڕه‌خنه ، ڕه‌خنه‌ی سازێنه‌ره نه‌ك ڕووخێنه‌ر و هاوكات به پێی توانا هه‌وڵ بۆ پاراستنی په‌رژه‌وه‌ندی و ده‌ستكه‌وته‌كانی گه‌لی كورد ده‌دا و به‌رژه‌وه‌ندیی نه‌ته‌وه‌یی نه‌كاته قوربانیی به‌رژه‌وه‌ندیی حیزبی یان تاكه كه‌سی .
ڕۆژی كورد جارێكی دیكه پێداگری ده‌كاته‌وه كه ناوه‌ندێكی سه‌ربه‌خۆیه و سه‌ر به هیچ حیزب و لایه‌نێك نییه و هه‌موو ئازادیخوازانی ڕێگای ئازادی و سه‌ربه‌ستیی كوردستان به دۆست و هاوڕێ و هاوكاری خۆی ده‌زانێ و دژ به هه‌موو داگیركه‌رانی كوردستان چالاكی ده‌كا و دوژمنانی كورد له هه‌ر چوار پارچه‌ی نیشتمان به دوژمن و داگیر كه‌ر ده‌ناسێ و سیاسه‌ته‌كانیان به دژی گه‌له‌كه‌مان له قاو ده‌دا ، ڕۆژی كورد ماڵێكه بۆ سه‌رجه‌م حیزب و لایه‌نه كوردستانیه‌كان و به تایبه‌تی سه‌رجه‌م بیر و هزر و ئازادیخوازانی كوردستانی ڕۆژهه‌ڵات .
ناوه‌ندی ڕۆژی كورد له لایه‌ن ده‌سته‌ی به‌ڕێوه‌به‌ری به ڕه‌چاوكردنی ڕێسا و یاسا نێونه‌ته‌وه‌ییه‌كانی دنیای ئازاد و دێموكرات به‌ڕێوه ده‌چێ ، له بواری مێدیایه‌وه ئەو ناوەندە بڕوای تەواوی بە چەمکی ئازادیی ڕادەربڕین هەیە و لەو پێناوەدا بۆ گه‌یاندنی ده‌نگی كورد به دنیای ده‌ره‌وه به كه‌ڵك وه‌رگرتن له سایت ، ته‌له‌ڤیزیۆن ، ڕادیۆ و مانگنامه و سه‌رجه‌میان له ژێر ناوی ڕۆژی كورد هه‌وڵ ده‌دا پردێكی پێوه‌ندی بێ له نێوان كورد و دنیای ده‌ره‌وه.
ڕۆژی كورد له‌و باس و بابه‌تانه ، خۆی به به‌رپرسیار ده‌زانێ كه به ناوی ڕۆژی كورده‌وه بڵاو ده‌بنه‌وه ، ئه‌و بابه‌ت و باسانه‌ی به ناوی نووسه‌ر ، لێكۆله‌ر و … بڵاو ده‌بنه‌وه بۆخۆیان لێی به‌رپرسیارن و ئامانج له بڵاو كردنه‌وه‌شیان به مانای په‌سه‌ند كردن یا نه‌كردنی نییه و ته‌نیا ڕێز گرتنه له ده‌ربڕینی بیر و ڕا و قه‌ڵه‌می ئازاد .
ئه‌و ناوه‌نده هه‌وڵ ده‌دا له بڵاو كردنه‌وه‌ی هه‌واڵ له سه‌ر ڕووداوه‌كان دا لێكدانه‌وه‌ی خۆی له ڕێگه‌ی شاره‌زایانی ئه‌و بواره‌وه هه‌بێ و ڕای جیاواز وه‌ربگرێ ، به‌ڵام به پله‌ی یه‌كه‌م هه‌واڵ و ڕووداوه‌كان وه‌ك ئه‌و جۆره‌ی ڕوویانداوه به پاراستن و ئه‌مانه‌تدارییه‌وه بڵاو ده‌كاته‌وه و خۆی له چه‌واشه‌كاری ده‌بوێرێ و له هه‌موو هه‌لومه‌رجێك دا ڕێز له بینه‌ر ، بیسه‌ر و خوێنه‌رانی ده‌گرێ.
ڕۆژی كورد بایه‌خێكی تایبه‌تی به ڕێنووس و ڕێزمانی کوردی ده‌دا و له سه‌ر ئه‌و باوه‌ڕه‌یه كه زمان پێناسه‌ی گه‌له و گه‌لێك زیندوویه كه زمانه‌كه‌ی زیندوویه هه‌ر بۆیه هه‌وڵ ده‌دا له‌و بواره دا كه‌مترین هه‌ڵه‌ی هه‌بێ.
ناوه‌ندی ڕۆژی كورد جیا لە ئه‌ندامان و كادری ڕه‌سمیی خۆی، هەوڵ دەدا بەبێ لەبەرچاو گرتنی سنوورە جوغرافیاییەكان ئەندام وه‌ربگرێ ، و كارتی ڕه‌سمیی ئه‌ندامیه‌تی و پاسپۆرتی نێونه‌ته‌وه‌یی ڕۆژنامه‌نووسی كه له ئاستی جیهانیدا بایخ داره و كاری پێده‌كرێ ، بدا به‌و كه‌سانه‌ی به شێوه‌یه‌ك له شێوه‌كان یارمه‌تیده‌ری ڕۆژی كورد ده‌بن
ناوه‌ندی ڕۆژی كورد له بواری داهات و سه‌رچاوه‌ی ماڵییه‌وه ، له هیچ شوێنێكه‌وه ساپۆرت و پشتگیری نه‌كراوه و له ئێستا دا ته‌نیا پشت به‌و كه‌سه خۆبه‌خشانه ده‌به‌ستێ كه خه‌ریكی ڕاپه‌ڕاندنی ئه‌رك و كاره‌كانی ڕۆژانه‌ی ئه‌و ناوه‌نده‌ن و بۆ درێژه پێدانیش به‌و ئه‌ركه له چاوه‌ڕوانیی ئه‌وه دایه كه حكوومه‌تی فه‌ڕانسه هه‌ر به‌و چه‌شنه‌ی ئیزنی دامه‌زراندنی به‌و ناوه‌نده داوه به‌و شێوه‌ش له بواری ماڵییه‌وه به پێی ئیمكان پشتگیری لێ بكا و بڕیاره له داهاتوویه‌كی نزیك دا بوودجه و داهاتی له لایه‌ن وڵاتی فه‌ڕانسه‌وه بۆ دابین بكرێ
هەر لێرەشدا بە پێویستی دەزانین وەک ناوەندی ڕۆژی کورد، سپاسی خۆمان بۆ سەرجەم ڕۆژنامەوانان، هاوکاران و بەتایبەتی ئەو کەسانەی کە لە ناوخۆ و سەرەڕای هەموو گوشار، زۆری و مەترسییەک بەردەوام سینگیان کردۆتە قەڵغان و هاوکاریی شەوانەڕۆژییان لەگەڵ ڕۆژی کورد، لە سەرجەم شاروشارۆچکەکانی کوردستان، بەردەوام بووە و هەیە. هەروەها دەستی هاوکاری بۆ لای سەرجەم لایەن و تاکێکی کوردستان درێژ دەکەین و بە ئامێزی گەرمەوە، چاوەڕوانی هاوکاری و پشتگیریی مادی و مەعنەویی هەموو لایەکین.
داوا له ڕووناكبیران ، ڕۆژنامه‌نووسان ، نووسه‌ران ، هونه‌رمه‌ندان و چالاكانی بواره جیاجیاكانی كورد و بیانی ده‌كه‌ین كه یارمه‌تیده‌رمان بن.هاوكات ڕه‌خنه و پێشنیاره‌كانتان ده‌بنه مایه‌ی گه‌شه سه‌ندن و په‌ره گرتنی رۆژی كورد ، هه‌ر بۆیه ره‌خنه و پێشنیاری سازێنه‌ری ئێوه به یارمه‌تیده‌رمان ده‌بێ.
بێ گومان بوونی ناوه‌ند و میدیا و ڕاگەیاندنی کارامە بەتایبەت بۆ نەتەوەیەکی مافخوراوی وەک کورد بەتایبەتیتر لە کوردستانی بندەست و بێ پشتیوانی خۆرهەڵات، هەم پێویستییەکی حاشاهەڵنەگرە وهەم ئاواتێکی لەمێژینەیە و هەمیش بەداخەوە، کەلێن و خەسارێکی گەورەیە،
لە ساڵوەگەڕی دامه‌زرانی ئەو ناوەندە کە بێ گومان لەسەر ڕێچکە و ڕێبازی “ڕۆژی کورد”ـی سەردەمی سمکۆی نەمر، باوکی ناسیۆنالیزمی هاوچەرخی کورد، دامەزراوە، بەراوردێکمان لە نێوان سه‌رجه‌م ماڵپەڕی حیزبەکانی كوردستانی ڕۆژهه‌ڵات، ناوەندگەلی مافی مرۆڤ و چەند ماڵپەڕێکی چالاک لە کوردستانی ڕۆژهەڵات ئەنجام داوە، هەڵبەت بەو پێیە کە ڕووگەی سەرەکیی خەباتی ناوەندی ڕۆژی کورد و ماڵپەڕەکانی سەر بەو ناوەندە، کوردستانی خۆرهەڵاتە، بەراوردکارییەکەمان تەنیا لەو بازنەیەدا ئەنجام داوە.ئه‌و به‌راورد كاریه به كه‌ڵك وه‌رگرتن له ماڵپه‌ڕی جیهانیی ئه‌لێكسا كه تایبه‌ته به ئاست و ڕێژه‌ی خوێنه‌رانی هه‌موو ماڵپه‌ڕه‌كانی جیهان ئه‌نجام دراوه.
ماڵپه‌ڕی فه‌رمیی ئه‌و ناوه‌نده بە هەوڵ و ماندووبوون و ماندوونەناسیی دەستەی بەڕێوەبەری و ستافی ڕۆژنامەوانی وتەکنیکیی لە ناوخۆی کوردستانی ڕۆژهەڵات ، کوردستانی باشوور و وڵاتانی تری جیهان، تا ئێستا توانیویەتی لە بوارە جیاجیاکانی ڕاگەیاندن و پێدانی زانیاری بە کوردستانیان و بەتایبەتی کوردانی کوردستانی ڕۆژهەڵات، و گه‌یاندنی ده‌نگی گه‌لی كورد به ناوه‌نده‌كانی ڕاگه‌یاندن و میدیای جیهانی وەک پێشەنگی ڕۆژنامەگەری و هەواڵدەری لە کوردستانی خۆرهەڵات، پلەی یەکەم بۆخۆی مسۆگەر بکات.
له‌و پێوه‌ندییه دا ماڵپەڕی alexa.com کە لە ئاستی جیهانیدا بۆ پلەبەندیی ماڵپەڕەکانی هەموو جیهان کەلکی لێ وردەگیرێ، شوێن و رێژەی سەردان و پلەبەندیی هەموو ماڵپەڕەکان لە نێوان ١٤ ملیۆن ماڵپەڕدا دیاری دەکات، کە بەو پێیە ماڵپەری رۆژی کورد بە بەروارد لەگەڵ سەرجەم ماڵپەڕەکانی دیکەی رۆژهەڵات زۆرترین خوینەری هەیە. بەهۆی بوونی سیستمی بەربەست و فیلترینگی ماڵپەڕەکان لەلایەن حکوموەتی ئێرانەوە، ژمارەیەکی بەرچاو لە بەردەنگی ماڵپەڕەکانی دژبەری رژیمی ئێران لە سیستمی فیلتێرشکێن و گۆڕینی IP برۆزێرەکانیان بۆ وڵاتانی ئەورووپایی و ئەمریکایی کەڵک وەردەگرن، بۆیە کەمترین ئاستی خوێنەر لە ناوخۆی کوردستانی رۆژهەڵاتدا تۆمار دەکات.
هیوا دەخوازین ئەو بەراوردکارییە تەنیا ببێتە هۆکارێک بۆ بەخۆداچوونەوەی میدیا و ڕاگەیاندنە کوردییەکانی کوردستانی خۆرهەڵات بەتایبەت میدیا حیزبییەکان کە چاوی خەڵک و ئاسۆی ئازادی، لەوانە.
له ڕێگه‌ی ئیمه‌یل ، فه‌یسبووك ، په‌یجی رۆژی كورد ، تێلێگرام و به‌شی پێوه‌ندیه‌وه ده‌توانن له گه‌ڵ ڕۆژی كورد له پێوه‌ندی دابن و به ناردنی بابه‌ت ، هه‌واڵ ، ڕه‌خنه ، بۆچوون و تێبینیه‌كانتان هاوكار و یارمه‌تیده‌رمان بن
هه‌روه‌ها لێره‌وه ده‌توانن له بواری ماڵیه‌وه یارمه‌تیده‌ری ڕۆژی كورد بن
