ڕۆژی کورد: بەپێی هەواڵی گەیشتوو بە ناوەندی هەواڵی ناوەندی ڕۆژی کورد، ڕۆژی پێنج شەممە ١٠ی پووشپەڕی ١٣٩٥ی هەتاوی، کاتژمێر ٩ تا ٢ دوانیوەرۆ و دوای ئەوەی کە هێزەکانی ڕژێمی کۆماری ئیسلامی لە کێلێ ـی شاری سەردەشت دەست بەسەر باری خەڵکی بێوراندا دەگرن و بەو هۆیە پێکدادان و گرژی لە نیوان خەڵک و هێزەکانی ڕژیم هاتۆتە ئاراوە.
بەپێی قسەی شایەتحاڵان و خەڵکی ناوچەکە، ئەو بارەی کە دەستی بەسەردا گیراوە ٧٠ بار و چەند ماشێن بووە.
دوای ئەو ڕووداوە خەڵکی گوندی بێوران و بێورانی سەرێ لە هیزەکانی ڕژیم وەدەست هاتون و لە ئەنجامدا پێکدادان لە نیوان هێزەکانی ڕژیم و خەڵکی ئەو ناوچەیە هاتۆتە ئاراوە.
دوای ئەو پێکدادان و گرژیە، خەڵکی ناوچەکە بارەکانیان لە هێزەکانی ڕژیم ئەستاندۆتەوە وە هێزەکانی ڕژیم کە لێدانێکی زۆریان لە لایەن خەڵکەوە بەرکەوتووە ڕایان کردووە و شوێنەکەیان بەجێهێشتووە.
بەپێی لێدوانی شایەتحاڵان خەڵک سروودی نەتەوەیی “ئەی ڕەقیب”یان وتۆتەوە.
دەگوترێ دوای ئەو پێکدادانەی نێوان خەڵک و هێزەکانی ڕژیم و هەڵاتنی هێزەکانی ڕژیم، لە شاری سەەردەشتەوە هێز بۆ ئەو ناوچەیە ڕەوانە کراوە.
ڕێکەوتی ٦ی پووشپەڕ و لە ناوچەی ئالانی سەردەشت ، دوو برا لە لایەن هێزەکانی ڕژیمەوە کوژران و دواتر گرژی لە نێوان خەڵک و هێزەکانی ڕژیم هاتە ئاراوە.
دەگوترێ دوای گەڕانەوەی هێزی پێشمەرگەی حیزبی دێموکراتی کوردستانی ئێران، خەڵکی کوردستان و بەتایبەتی ناوچە سنوورییەکان هەست بە دڵگەرمی دەکەن و بە بەردەوامی بە دژی هێزەکانی ڕژیم ڕادەپەڕن.
