ڕۆژی کورد: بەپێی زانیارییەکانی دیدەبانی مافی مرۆڤی سووریە کە بنکەکەی لە لەندەنە، ئەمڕۆ شەممە ١٦ی گەلاوێژی ١٣٩٥ی هەتاوی، هێزەکانی “سوریەی دێموکراتیک” کە لە کورد و عەڕەب پێکهاتووە، بە تەواوی باژێڕی مینبەجیان لە باکووری سووریە لە دەست ڕێکخراوی تیرۆریستیی داعش ئازاد کردووە.
مافی مرۆڤی سووریە بەپشت بەستن بە سەرچاوە ناوخۆییەکانی لە سووریە ئەو هەواڵەی ڕاگەیاندووە و دەشڵێ ئەو باژێڕە بە گشتی لە دەست داعش هێنراوەتە دەر و ئێستا لە دەست شەڕڤانانی کوردی و عەڕەبی گرووپی “سووریای دێموکراتیک” دایە.
شەڕی ئازاد کردنی باژێڕی مینبەج ماوەی ٢ مانگە بە پشتیوانیی هێزی هاوپەیمانەکان بە ڕێبەریی ئەمریکا لە ئارا دایە و ئەمڕۆ تواندرا مینبەج بە گشتی ئازاد و پاکسازی بکرێتەوە.
بە گیران و ئازاد کرانی مینبەج، پەیوەندیی نێوان داعش لە ڕۆژهەڵاتی حەلەب و ناوچەکانی ناوەڕاستی سووریە پچڕاوە.
ڕامی عەبدووڕڕەحمان سەرۆکی دیدەبانی مافی مرۆڤی سووریە لە لێدوانی خۆی بۆ هەواڵدەریی فەڕانسە وێڕای پشتڕاست کردنەوەی ئەو هەواڵە گوتی: “هێزەکانی سووریای دێموکراتیک توانیویانە تاقم و گرووپی بچووکی داعش کە لە ناو باژێڕەکەدا بەرگریان دەکرد، شکست بدەن و ئێستا باژێڕی مینبەج بە گشتی ئازاد کراوە و لە ژێر کۆنترۆڵ شەڕڤانانی کورد و عەڕەبی “سووریای دێموکراتیک” دایە.
شەڕی مینبەج بۆ کوردەکان خەسارێکی زۆری گیانی بەدوادا بووە و نزیک بە ١٦ کەس لە فەرماندە بەناوبانگە کوردەکان لەو شەڕەدا شەهید بوون کە دەرکێ ئاماژە بە ئەبوولەیلا بکەین. هەروەها ١٥ کەسی تر لە ئەندامانی دەستەی بەڕێوەبەریی مینبەج شەهید بوون کە بریتین لە:
بورهان عەبدووڵا، ئەحمەد ڕەشۆ، دلگەش فەلات، عەلا عەلی (کاوە قامیشلو)، مەحموود عەلی ئەحمەد (بۆتان)، زاکر ڕەشۆ (تۆلهلدان قامیشلو)، مەحموود ئەلئەحمەد (حەمۆ ترحەمس)، عەبدولقادر ئیبراهیم (مەرخۆدان ماسیرۆ)، ئیسماعیل حەسەن (لەوەند قامیشلو)، جەوهەر دێریک، خویندا گابار، سیلا تێکۆشین، کولستان جۆلەمێرگ و جەسوور بەرخۆدان
