عەبدوڵڵا قوربانی ناسراو بە عەبدوڵڵا ماچکەیی” گۆرانیبێژی ناسراوی ناوچەی ئەردەڵان لە تەمەنی 74 ساڵیدا، ماڵاوایی لە ژیان و هونەریی کوردی کرد.
بە گوێرەی ئەو زانیارییانەی بە رۆژی کورد گەیشتووە، هونەرنەمەند عەبدوڵڵا ماچکەیی کە بەهۆی نەخۆشی ماوەیەکی زۆر لە جێدا کەوتبوو، ئێوارەی ئەمرۆ 28 سەرماوەز بەرانبەر بە 19 دیسامبر کۆچی دوایی کرد.
رێوەڕەسمی ناشتنی ئەو هونەرمەندە دیارەی ناوچەی ئەردەڵان، سبەی یەکشەممە لە شاری سنە بەرێوە دەچێت و بڕیار وایە لە بەشی هونەرمەدان بە خاک بسپێردرێت.
عەبدوڵڵا ماچکەیی ساڵی 1320 هەتاوی/1941 زایینی لە شاری قەسری شیرین لەدایکبووە و هەتا تەمەنی 12 ساڵی لەو شارە ژیاوە، دواتر لەگەڵ بنەماڵەکەی ڕوویان لە گوندی ماچکەی سەر بە ناوچەی لەیلاخی ئەدەڵان کردووە و لەوێ فێری گۆرانی وتن بووە و دواتر وەک هونەرمەند لە کوڕ و کۆبوونەوە و دانیشتەکاندا بە دەنگە خۆشەکەی گۆرانی فولکلۆری ئەو ناوچەیەی وتووە.
گۆرانییەکانی مامۆستا عەبدوڵڵا ماچکەیی فولکلۆری ناوچەی ئەدەڵانن و ئەو توانیویەتی بە دەنگە پر سۆزەکەی گەلێک گۆرانی کۆن و فولکلۆری لە فەوتان ڕزگار بکات و وەک سەرمایەی کەلەپووری نەتەوەیی بیانپارێزێت.
لە ناوەندی فەرهەنگی و هونەریی رۆژی کوردەوە، پرسە و سەرەخۆشی خۆمان ئاراستەی بنەماڵەی ئەو مامۆستا کۆچکردووە و کۆمەڵگەی هونەریی کوردستان دەکەین و یادی بەرز ڕادەگرین .
