ڕۆژی کورد: بەپێی هەواڵی هەواڵنێری ڕۆژی کورد لە شاری مهاباد، ئەمڕۆ شەممە ٢٦ی پووشپەڕ، هێرۆ ئەرجومەند، شاخەوانی ناسراوی مهابادی بە مەبەستی سەرکەوتن بە سەرلووتکەی “کومونیسم” بە بەرزایی ٧٤٩٥ میتر، بەرەو باژێڕی تاران و لەوێشەوە بەرەو تاجیکستان کەوتە ڕێ.
هێرۆ ئەرجومەند کە تا ئێستا بەسەر گەلێک چیای جیهان و کوردستان و ئێراندا سەرکەوتووە، تا ئێستا چەندین جار لە تۆرە کۆمەڵایەتییەکان داوای لە کۆمەڵگای کوردستان و ئێران کردووە یارمەتیدەری بن.
داوای یارمەتیی هێرۆ ئەرجومەند لە کۆمەڵگا بۆ ئەوە دەگەڕێتەوە کە هیچ یارمەتییەکی مادی و ڕووحی لە لایەن ڕژیم و بەرپرسانی شاری مهاباد و پارێزگای ورمێ بۆ ئەو وەرزشوانە کوردە و وەرزشوانانی تر و بەتایبەتی شاخەوانەکان دابین ناکرێ.
هێرۆ ئەرجومەند بەر لە وەڕێکەوتنی بەرەو تاران لە نووسراوەیەکدا ڕوو لە نوێنەری مهاباد لە پارلمانی ڕژیم، گلەیی و گازندەکانی خۆی نووسیوە.
دەقی ئەو نامەیە بە زمانی فارسی بڵاو بۆتەوە و ڕۆژی کورد بە کوردی وەریگێڕاوەتەوە.
بەناوی خوا
دەردی دڵی شاخەوان هێرۆ ئەرجومەند لەگەڵ نوێنەری شاری مهاباد
جارێکی تر بە دڵێکی شکاو و چاوی پڕ لە ڕۆندکەوە بەرەو سەرکەوتن کەوتمە ڕێ
نازانم لە کوێوە دەست پێبکەم، بەڵام خاس دەزانم کە ناکرێ دەرد و ئازارەکان لە سەر دڵی ئەو لەتە لاپەڕەیە، جێ بکەمەوە. بێ گومان ئەگەر ئیمانم بە ئامانج و بڕواکانم بەنا، نەمدەتوانی ئەو هەموو گوشار و دژوارییە بە کۆڵەوە هەڵگرم.
گەلۆ! ئایا شانازی و سەرکەوتنەکانی وەرزشوانێک تەنیا بۆخۆیەتی؟
ئەگەر وایە، کەواتە چۆنە کاتی سەرکەوتنم بە سەر سینگی چیاکان و سەرکەوتنم، بەرپرسانی بەڕێز بە چەپکە گوڵەوە دێنە پێشوازیم و بە شانازییەوە ڕوو لە لێنزی کامێراکان دەکەن و بزەیان دێتێ؟
لێ ئەگەر وانیە، کەواتە چما هیچ پشتگیریەک لە مەودا و ڕێگادا لەوان ناکرێ هیچ بەڵکوو بەوپەڕی سەرسووڕمانەوە بەرد دەخەنە ژێر قاچمان و دەیانهەوێ کۆسپ و تەگەرە بخەنە سەر ڕێگامان؟
بەڕاستی ئەوەیە دادوەری و یەکسانی؟
بەڕاستی ئەوەیە دادوەی و یەکسانی؟
گەلۆ چما دەبێ من وەک ژنێکی شاخەوان، لە وڵاتێکدا کە خەڵکانێکی هونەر و وەرزش دۆستی تێدایە، ناچار بم بۆ دابین کردنی تێچووی سەرکەوتنم بەسەر سینگی ڕەقی چیاکاندا و سازکردنی شانازی بۆ وڵات و شارەکەم، دەستەوداوێنی یاریمەتیی خەڵکی بم؟
چما دەبی تا خولەکی ٩٠ و کۆتایی، بەردەوام لەژێر گوشاری ڕووحی و دڵەڕاوکێ دا بم و کەس نەبێ پشتم بگرێ و هەر چرکە ساتێ دڵەکوتەی ئەوەم بێ نەکا دیسان و جارێکی تر، بەرد و کۆسپێکی ترم بخرێتە سەر ڕێگا و پێش بە ڕۆیشتنم بگیرێتەوە؟
من نازانم تاوانی من وەرزشوان بوونە یان ژن بوونم؟
تۆ دەزانی؟
شاخەوان: هێرۆ ئەرجومەند
