بەپێی ڕاپۆرتی ماڵپەڕی ڕۆژی کورد و بەپشتبەستن بە ڕاپۆرتە بڵاوکراوەکانی ناوخۆی ئێران، شەهیدندوخت موڵاوێردی، جێگری سەرکۆماری ئێران بۆ کاروباری ژنان و بنەماڵە ڕایگەیاندووە کە ئاماری کۆرپە فرۆشراوەکان لە زگی دایکدا زیادی کردووە.
ئەم بەرپرسە حکوومەتیە دان بە هەبوونی ڕێژەیەکی بەرچاو ” هەژاری ” لە ئێراندا دەنێت و دەشڵێ کە زۆربەی حاڵەتەکانی فرۆشتنی کۆرپە لە زگی دایکدا بەهۆی هەژاریی ئابوورییەوەیە.
جێگری سەرکۆماری ئێران بۆ کاروباری ژنان و بنەماڵە لە ” فرۆشتنی کۆرپە لە زگی دایکدا ” وەکوو دیاردەیەکی کۆمەڵایەتی ناو دەبات و وێڕای ئەوەی کە هیچ ئامارێکی ڕێکیان لە ڕێژەی فرۆشتنی کۆرپە لە زگی دایکدا نییە لەسەر بەرچاوبوونی ڕێژەی پێداگری دەکاتەوە.
ئەم بەرپرسە حکوومەتییە لە درێژەدا، هەژاریی ئابووری، دواکەوتوویی کلتووری، گیرۆدەبوون بە ماددە هۆشبەرەکان، کارتۆن خەوی و هاوسەرگیریی منداڵانی خوارتەمەن 18 ساڵ بە هۆکاری ڕوولەزیادبوونی فرۆشتنی کۆرپە لە زگی دایکدا ناو دەبات.
مولاوێردی لە حاڵێکدا کۆمەڵێک هۆکار بۆ هەڵکشانی ئاماری کۆرپەفرۆشی دێنێتەوە کە بە دەیان جار ئەم هۆکارانە لە لێدوانی بەرپرسانی باڵای حکوومەتدا رەت کراونەتەوە.
فرۆشتنی کۆرپە لە زگی دایکدا، شتێکی نزیکەو نوێیە و بنەماڵە هەژارەکان، منداڵانی خۆیان لە زگی دایکەوە دەفرۆشن و لە کاتی هاتنە دنیادا ئەو منداڵە دەدرێت بە خوازیار.
هەر لەو پێوەندییەدا، سیاوەش شەهریوەر، بەڕێوەبەری گشتیی کاروباری کۆمەڵایەتی و کلتوریی پارێزگاریی تاران، بەشێک لەم دیاردەیەی سازماندراو ڕاگەیاندبوو و هەروەها راشی گەیاندبوو کە زۆربەی ژنانی تووشبوو بە ماددە هۆشبەرەکانن کە منداڵانی خۆیان دەفرۆشن.
داڕمانی ئابووریی ئێران لەپێشهاتە گرینگەکانی سیاسەتە هەڵەکانی ئێران لە کۆمەڵگای نێونەتەوەییدایە و دۆخی ئابووری ئەو ناوچانەی لە ژێر دەسەڵاتی حکوومەتی ئیسلامیدا ڕۆژ بەدوای ڕۆژ بەرەوخراپتربوون دەڕوات.
هەژاریی ئابووری لە ئێراندا بووەتە قەیران و بە دەیان دیاردەی جۆراوجۆری لێ کەوتووەتەوە و بە ڕێژەیەکی بەرچاو کێشە کۆمەڵایەتییەکان بەو بۆنەوە ڕوویان لە هەڵکشان کردووە و ئەمەش لە حاڵێکدایە کە زۆربەی کاتەکان بەرپرسانی حکوومەتی حاشا لە هەبوونی هەژاری و دیاردە و کێشە کۆمەڵایەتییەکان دەکەن.
