ڕۆژی کورد: بەپێی هەواڵی گەیشتوو بە ناوەندی ڕٶژی کورد، بنەماڵەی چالاکێکی مەدەنی و سیاسیی کوردی شاری جوانڕۆ لە ژێر هەڕەشە و گوشاری بەردەوامی وەزارەتی ئیتلاعاتی ڕژیم دان و ڕۆژ بە ڕۆژ زیاتر تووشی سزای کۆمەڵایەتی و یاسایی دەبن.
کەسێکی نزیک لە بنەماڵەی وەهاب فەخری چالاکی مەدەنی و کە لەژێر گوشاری ئیدارەی ئیتلاعاتی ڕژیم وڵاتی بەجێهێشتووە، لە شاری جوانڕۆوە بە پەیوەندییەکی تەلەفوونی لەگەڵ ناوەندی ڕۆژی کورد ڕایگەند: بنەماڵەی فەخری لە پێشووتر و بەتایبەتی لە دوای وتووێژ و ئاشکراکردنی باند و گروپ مافیایی و قاچاحی ئاسەوارە مێژووییەکان و زەمین خاری لە هەورامان کە لە رۆژی کورد بڵاو بۆتەوە، کەوتوونەتە بەر گوشاری ئیدارەی ئیتلاعات و بە بەردەوامی هەڕەشەیان لێدەکرێت. وەهاب فەخری، چالاکی مەدەنی کوردی شاری جوانڕۆ بووە و دواتر لە ژێر گوشارەکانی ئیدارەی ئیتلاعات بەناچاری وڵاتی بەجێهێشتووە.
شایانی باسە عەدنان فەخری برای گەورەی وەهاب فەخری لە ماوەی پێشوو بەردەوام بۆ ئتلاعات بانگ دەکرێت و ڕووبەڕووی هەڕەشەی جۆراوجۆر دەکرێتەوە.
سەرچاوەکەی ڕۆژی کورد هەوەها گوتی: “ئیدریس فەخری برای بچووکی وەهاب فەخری (کە کارمەندی ئیدارەی کارەبابووە) بە مەبەستی گوشار بۆ سەر بنەماڵەیان لە لایەن ئیتلاعاتەوە لە سەر کار دەرکراوە و لە وەڵامی هۆکاری لە سەر کار دەرکردنەکەی ئیدارەی پێوەندی دار وتوویانە بابەتەکە لە دەستی ئێمە دا نییە و لە لایەن هێزە ئەمنییەکانەوە ئێمەیان راسپاردوە کە ئیزن و رێگەی کار کردن بە ئێوە نەدەین”.
ئەو سەرچاوەیە هەروەها ئاشکراشی کرد: “ئەو گوشارانەی ئیدارەی ئیتلاعاتی جوانڕۆ بۆ سەر بنەماڵەی فەخری لە کاتێکدایە کە پەریناز، دایکی وەهاب تووشی نەخۆشی دڵ بووە و بەردەوام ناچار بە سەردانی دوکتور و بەکارهێنانی دەرمانی پەیوەندیدارە.
لەلایەکی ترەوە، وەزیر حوسێنی، نیشتمانفرۆشێکی سەر بە ئیدارەی ئیتلاعات و ئەندامی باندی مافیایی ئاشکراو لە لایەن وەهاب فەخری لە دیمانەی لەگەڵ ڕۆژی کورددا، لە ڕێگای فەیسبووکەوە و بە ئەکاونتی جیاوازەوە بەردەوام بابەتی نەشیاو و هەڵەشە و دەستەواژەی ناشێرینی لەسەر وەهاب فەخری بڵاو دەکاتەوە، ئەمە لە کاتێک دایە وەزیر حسەینی هۆکاری سەرەکی گوشار خستنە سەر وەهاب فەخری بۆ بە جێهێشنی وڵات بووە.
ڕۆژی کورد بۆ بەدواداچوونی زیاتر لەمبارەوە لە پەیوەندییەکی تەلەفوونیدا ڕاستی و درووستیی ئەو هەواڵەی لە وەهاب فەخری پرسیوە و ناوبراو کۆی گشتیی و وردەکارییەکانی ئەو هەواڵەی پشتڕاست کردۆتەوە.
بۆ خوێندنەوەی دەقی وتووێژی لەقاودەرانەی وەهاب فەخری لێرە کرتە بکە
