وەزیری كارەبای حكوومەتی عێراق، قاسم فەهداوی، ئاماری كۆتایی قوربانیانی ئەو هێرشی تیرۆریستانی داعش بۆ سەر وێستگەی كارەبای قەزای دووبزی سەربە باژێڕی كەركووكی ڕاگەیاند و گوتی: “بەپێی ئاماری كۆتایی كە گەیشتووەتە دەستمان، 34 كەس كوژراو و بریندار بوون و لەناویاندا شارەزای ئێرانیش هەیە”.
ڕۆژی کورد: بەیانی ئەمڕۆ هەینی 30ی ڕەزبەری 1395ی هەتاوی، ژمارەیەك تیرۆریستی داعش لەچەند لایەكەوە بەجیا هێرشیان كردە سەر ژمارەیەك باڵەخانەی حكوومی لە شاری كەركووك لەوانە، “بەڕێوەبەرایەتی پۆلیس، بنكەی پۆلیسی عەدالە، بنكەی پۆلیسی دۆمیز، بارەگایەکی یەكێتی نیشتمانی كوردستان، وێستگەی كارەبای دووبز”.
فەهداوی، لە لێدوانێكدا بۆ ئاژانسی ئانادۆڵو باسی لەو هێرشە کردووە وڕایگەیاند: “بەپێی ئەو ئامار و زانیارییانە كە بەدەستمان گەیشتووە، لەكاتی هێرشەكە بۆ سەر وێستگەی كارەبای دووبز، تیرۆریستانی داعش هەشت فەرمانبەری ژووری كۆنترۆڵكردنی وێستگەیان لەسێدارەداوە و هەروەها چوار شارەزایی ئێرانیشیان كوشتووە كە لەناو وێستگەكە كاریان دەكرد”.
فەهداوی هەروەها گوتیشی: “هەر لەو هێرشەدا 22 فەرمانبەر و پاسەوانی وێستگەكە بریندار بوون”.
بەپێی هەواڵی وەزارەتی دەرەوەی ئێران، ٤ پسپۆڕی ئێرانی لەو هێرشەدا کوژراون و ٣ کەسیشیان بریندار بوون.
وەزیری كارەبای عێراق زانیاری زیاتر لەسەر هێرشەكە باس كردووە و ڕایگەیاند: “تیرۆریستانی داعش بە بۆمبی دەستی ژووری كۆنترۆڵكردنی وێستگەی كارەباكەیان تەقاندووەتەوە كە بەهۆیەوە كاركردن لە وێستگەكە وەستاوە بەڵام ئێمە كەرەستە و كەلوپەلی پێویستمان رەوانەی وێستگەكە كردووە بۆ ئەوەی بخرێتەوە كار”.
قاسم فەهداوی دەشڵێت: “سەرجەم وێستگەكانی كارەبا لە بەغدا و پارێزگاكانی دیكە خراوەنەتە باری لەناكاو و ڕێوشوێنی ئەمنی توند لە دەوروبەریان گیراونەتە بۆ ئەوەی رێگری لە هێرشی تیرۆریستانی داعش بۆ سەر ئەو وێستگە كارەبایانە بگیرێت.
هاوكات شانەی ڕاگەیاندنی جەنگی سەربە وەزارەتی بەرگریی عێراق لە بەیاننامەیەكدا پشتڕاستی كردەوە، پێنج شوێنی ئەمنی لەلایەن هێزەكانی ئەمنییەوە كۆنترۆڵكرانەوە كە تیرۆریستانی داعش لە شاری كەركووك هێرشیان كردبووە سەریان.
پێشتریش سەرچاوەیەكی ئەمنی لە ناو شاری كەركووك بە ئاژانسی ئانادۆڵوی راگەیاند، دوو تیرۆریستی خۆكوژی داعش لە ناو وێستگەی كارەبای دووبزدا،خۆیان تەقاندووەتەوە كە بەهۆیەوە 13 فەرمانبەری وێستگەكە كوژراون بەڵام وەزیری كارەبای عێراق رایگەیاندووە كە ژمارەی كوژراوەكانی هێرشەكە 12 كەسە.
