ڕۆژی کورد :
لە ڕێوڕەسمێک کە لە لایەن یەکیەتی خوێندکارانی ڕۆژئاوای کوردستان، لە شاری پاریس پێنەختی وڵاتی فەڕانسە بەڕێوەچوو خەڵاتی ساڵانەی هۆنەرمەند “حۆسەین چەلەبی” بە سەر چەن نووسەر و ڕووناکبیری ناوداری گەلی کورد دابەش کرا.
ڕۆژی شەممە ڕێکەوتی ٢٦ی ئۆکتۆبر لە شاری پاریس ڕێوڕەسمی بەخشینی خەڵاتی ساڵانەی هۆنەرمەند و شاعیری ناوداری باکووری کوردستان “حۆسەین چەلەبی” بە بەشداری باوکی ناوبراو ئەحمەد چەلەبی و ژمارەیەکی زۆر نووسەر و کەسایەتیی ڕۆناکبیری کورد و شارەداری پێشووی وان لە باکووری کوردستان ڕێزدار “فەیسەل کەسەر” و سەرۆکی پارتی پ.ی.د لە ڕۆژئاوای کوردستان بەڕێز “شاهۆز حەسەن” بەڕێوە چوو و خەڵاتی ساڵانەی هۆنەرمەند حۆسەین چەلەبی لە لایەن باوکی ناوبراو و چەن کەسایەتیی و ڕووناکبیر بە سەر چەندین نووسەر و ڕووناکبیری کورد لە هەموو پارچەکانی کوردستان دابەش کرا.
سەرتای ڕێوڕەسمەکە بە وتاری یەکیەتی خوێندکارانی ڕۆژئاوای کوردستان بۆ پشتگیری لە ڕۆژئاوای کوردستان و یادی شەهیدانی نوێی گەلەکەمان لە ڕۆژئاوا دەستی پێکرد. دواتر باوکی هۆنەرمەند حۆسەین چەلەبی ڕێزدار “ئەحمەد چەلەبی” وتاری خۆی پێشکەش بە ئامادەبووان و بەشداربووان کرد و هاوخەمیی خۆی دەربڕی بۆ پشتگیری لە ڕۆژئاوای کوردستان. دواتر هاوڕێی ڕۆژنامەوان “کاکشار ئۆرەمار” وتارێکی پێشکەش بە بەشداربووانی ڕێوڕەسمەکە کرد و دواتر خەڵاتەکان لە لایەن باوکی هۆنەرمەند حۆسەین چەلەبی و کاکشار ئۆرەمار و چەن کەسایەتی دیکەوە پێشکەش بە نووسەران و ڕووناکبیرانی نەتەوەکەمان کرا کە لە ناو خەڵاتکراوەکان دا ئەتوانین ئاماژە بە ناوی “دوکتۆر ئیبراهیم سەیدۆ” و باوکی هۆنەرمەند حۆسەین چەلەبی و هۆنەرمەندی ناودار “مەعرووف” بکەین.
لە درێژەی ڕێوڕەسمەکە دا چەن پارچە موزیکی کوردی بە بەشداری دوو گرووپی موزیکی باکووری کوردستان و خانمە هۆنەرمەندی ناوداری کورد لە پارێزگاری خۆراسان خاتوو “یەڵدا عەبباسی” پێشکەش بە ئامادەبووان کرا.
جێگای ئاماژەیە هاوڕێی ڕاگەیەندکار و بەرپرسی ناوەندەکەمان ناوەندی “ڕۆژی کورد” ڕێزدار “ئەردەڵان عەبدوڵایی” بەشداری ڕێوڕەسمەکەیان کرد و خەڵاتیان بە سەر چەن نووسەری براوەی خەڵاتەکان دابەش کرد و هاوکات ڕێپۆرتاژ و وێنەکانیان بۆ ناوەندەکەمان گواستەوە.
