ئەمڕۆ سێ شەممە ١ی بانەمەڕی ١٣٩٥ی هەتاوی مانگرتنی شاری بانە دوای ٣ ڕۆژ شکا و دووکان و بازاڕەکان کرانەوە، لە شاری مەریوان ناڕازییەکان چوونە بەر دەرگای فەرمانداری و کۆبوونەوە.
هەرچەند مانگرتووانی شاری بانە لە راگەیێندراوێکدا باس لەوە دەکەن: دوای ئەوەی وەک ناڕەزایەتی دەربڕین بەرامبەر داخستنی خاڵە سنوورییەکان ماوەی سێ رۆژ دووکانەکانمان داخستن، ئێستا رەچاوی بەڵێنی بەرپرسانی حکومی بۆ کردنەوەی خاڵە سنوورییەکان و بەرژەوەندی بازاڕ دەکەین و، دووکانەکانمان دەکەینەوە، بەڵام دۆینی ئیتلاعاتی شاری سەردەشت و ئەماکن هەڕەشەیان لە دووکانداران و بازاڕییەکان کردووە کە لە ئەگەری نەکرانەوەی بازاڕ و دووکان بە شێوەی ئەمنیەتی لەگەڵییان دەجووڵێنەوە.
شایانی باسە کە لە هەمان کاتدا ماڵپەڕی بانە نیوز بە تاوانی ئاژاوە و دووبەرەکی نانەوە لە لایەن دەوڵەتەوە داخراوە.
لە هەمان کاتدا بەرپرسانی شاری بانە بەڵێنی ئەوەیان داوە کە بە بەڕیارەی وەزارەتی وڵات، بۆ ماوەیەکی کاتی ڕێگا کۆڵبەرییەکان بکرێنەوە بەڵام تا ئێستاش هیچ هەواڵێک لە کرانەوەی ئەو ڕێگایانە لە ئارادا نیە.
لە شاری مەریوانیش ئەمڕۆ خەڵکی ناڕازی وێڕای داخستنی دووکان و بازاڕەکان بۆ ڕۆژی چوارەم، لە بەردەم فەرمانداریی ئەو شارە کۆبوونەوە، تەنیا وڵامی فەرمانداریی ئەو شارە (لە دەسەڵاتی من دا نیە) بووە و گووتوویە کە ئەوە بە دەست وەزارەتی وڵاتە و بڕیاری ئەوانە.
بڕیارە سبەینێ و ڕۆژانای داهاتووش کۆبوونەوە لەبەر دەم دەرگای فەرمانداریی شاری مەریوان بەردەوام بێ.
لە شاری سەردەشت، بەپێی هەواڵی هەواڵنێری ڕۆژی کورد، ئەمڕۆ بە شێوەیەکی نیوەچڵ دووکان و بازار داخراون، دۆینی ئیتلاعات و ئەماکنی سەردەشت هەڕەشەیان لە بازاڕیان کردووە کە ئەگەر دووکان و بازاڕ نەکەنەوە قفڵی دووکانەکانیان دەشکێنن و خۆیان دووکانەکان دەکەنەوە.
لە هەمان کاتدا دۆخی شاری سەردەشت تەواو ئەمنیەتییە و لە ناو شار مەئـوورەکانی دەوڵەت و گاردی تایبەت دەبیندرێن.
بڕیارە لە ئەگەری چارەسەر نەبوونی ئەو کێشە و نەکرانەوەی سنورەکان، سبەی خەڵکی سەردەشت لە بەر دەم دەرگای فەرمانداریی ئەو شارە کۆ ببنەوە.
