رووسیە و سەعوودیە پەیوەندیەکانی نێوانیان پەرە پێدەدەن و لەو چوارچێوەیەشدا مۆسکۆ سیستەمی دژە مووشەکی پێشکەوتوو بە ریاز دەفرۆشێت.
میدیاکانی سعودیە بڵاویانکردەوە، مۆسکۆ سیستەمی دژە مووشەکی جۆری ئێس 400 بە ریاز دەفرۆشێت و شارەزایانی سەربازیی رووسیاش یارمەتی هاوبەشە سعودیەکانیان دەدەن بۆئەوەی پیشەسازیی بواری سەربازییان بەرەو پێشەوە ببەن.
ئێس 400 بە پێشکەوتووترین سیستەمی دژەمووشەکی رووسیا دادەنرێت و دەتوانێت سێ جۆر مووشەک هەڵبگرێت بۆ تێکشکاندنی مووشەکە بالیستیکی و کروزەکان.
پەرەدان بەم پەیوەندیانە لەکاتێکدایە شاندێکی باڵای سعودی بە سەرۆکایەتی شا سەلمان لە رووسیایە و رۆژی پێنجشەممەش پاشای سعودیە لەگەڵ ڤلادیمیر پوتین کۆبووەوە.
