نووسەر: دیاكۆ ڕۆژهەڵاتی
دوای ئەو گەمارۆ ئابوورییەی بە هۆی هەڕو گیفەكانی خامنەیی و ئەحمەدی‌نژادـەوە كەوتە مل گەلانی ئێران و ئابووری ئەم وڵاتەی هەتا ئاستی لەناوچوون برد، قەیرانێكی زۆر لە ژیانی خەڵك دا سەری هەڵدا. بەرەبەرە سەرانی ئێران دوای ڕۆچون لە زەلكاوی دەیان شەڕ و بێ‌پووڵی، مافەنگی بوون، هاتنە سەر ئەو باوەڕەی، هەڕ و گیف و چاوسووركردنەوەكانیان هەمووی بێ بنە مابوون و بێ‌خوێندنەوەی وردبینانە دەستیان دابوە كارێكی ئەوەندە گرینگ كە خەریك بوو سەرو ماڵیان تێدابەرێ.
ئەوە بوو سەرەنجام خامنەیی هاتە سەر ئەو باوەڕەی هەڵەیەكی گەورەی كردووە و بۆ ئەو قەتارە پێشەنگییەكی باشی نەبووە و ئەوە خەریكە لە قوڕ هەڵدەچەقێ، باری شەنەكەی گۆڕی و لە بەناو هەڵبژاردنی سەرۆک کۆمارییدا هەلێكی داڕەخساند هەتا بە هەر شێوەیەك بێ ڕووحانی بێنێتە سەر كار و بە هۆی ئەوەوە، سیاسەتەكانی نەرمتر نیشان بدا و لەگەڵ هێزە گەورەكانی جیهان‌دا بكەونە وتووێژ و دەست لە هەڕوگیڤ و خۆ ماساندن هەڵگرن و بێنە سەر میزی وتووێژ و سەر بۆ داخوازییەكانی زل هێزەكان داخەن و دەست لە سەربزێوی هەڵگرن. ئەوە بوو پاش ماڕاتۆنێكی قورسی سیاسی و وتووێژ كردن، پێمل بوون و سەریان بۆ داخوازییەكانی ئەوان داخست و دەستیان لە لەچەری هەڵگرت و دەرگا داخراوەكانی جیهانیان بە ڕوودا كرایەوە.
ئەم نزیك بوونەوەی ئێران لەگەڵ زلهێزەكان بە تایبەتی ئەمەریكا، ئەو پرسیارەی لای گەلێك كەس گەڵاڵە کردبوو كە ئەدی چۆنە ئێمە کە خۆمان بە زلهێزێكی گەورەی جیهان دەزانی و هێزمان لە سەرچاوە بان سرووشتییەکان وەردەگرت، چۆنە ئاوا بە سانایی دەستمان لە گەڵاڵە ناوکییەکان هەڵگرت و لە ژێر گوشاری “شەیتانی گەورە”دا چۆكمان دادا و ملكەج بووین؟
لێرەدا بوو خامنەیی لە دوای ڕێكەوتنەكە بۆ ڕاگرتنی هەر دوو لا، جارێك لە ناڵ دەدا و جارێك بزمار دەكوتێ و سیاسەتێكی دووفاقییانەی گرتۆتە بەر. رۆژێك بە شاخ و باڵی ڕێكەوتنەكەدا هەڵدەڵێ و ڕۆژێك باسی بێ باوەڕی خۆی بە ئەمەریكا دەكاتە سەردێڕی قسەكانی و هەر جارە و دەیان ڕۆژنامە بۆی لە بانگ و سەڵا دەدەن و بە قسەكانی دا هەڵدەڵێن و بە حەكیمانە و زانایانەی لە قەڵەم دەدەن، بێ ئەوەی سەرنجی دووقاتی قسەكانی بدەن. وەك دەڵێ: “ئەوان نۆكەری ئاغان نەک نۆکەری شەلەم”.
ئەوەی ڕاست بێ، قسەی دڵی خامنەیی زۆر ڕوونە و ئەوەیەكە زۆر بە گەرمی لایەنگری ڕێكەوتنەكەیە و باشترین بژاردەی دەزانێ و باش لەوە ئاگادارە ئەگەر هەروا لەسەر قسەكانی سەرەتایی سوور بوایە، ئێستا دەسەڵاتەكەی دارێتی خامنەیی بە سەر بەردییەوە نەمابوو.
باشترین بەڵگەش ئەوەیە خامنەیی لەم دواییانەدا، ئاوی گوێی ئەحمەدی نژادی داداوە كە خۆی بۆ هەڵبژاردنی داهاتوو نەپاڵێوێ، ئەو باش دەزانێ بە سەركەوتنەوەی ئەحمەدی‌نژاد دەبێ بچێتەوە، سەر خەتەكەی جارانی و پێوانیش بەو “گەزومەنە” هەم بۆ خۆی و هەم بۆ دەسەڵاتەكەی سەرئێشەساز دەبێ و ئەو كارە تووشی قەیرانێكی گەورەی دەكات، هەر بۆیە بە ئەحمەدی‌نژادی گوتوە واباشە خۆی لەو كارە بكێشێتەوە و كێشەی بۆ نەنێتەوە، چۆنكە زۆرن ئەو كەسانەی لەو ڕێكەوتنە زەرەرمەندن و دەستیان لە دەسەڵات و سامان بەربوو و خراونەتە لاوە و بە هاتنەوەی ئەحمەدی‌نژاد، ئەوانە لێی دەهاڵان و دووبەرەكییەكە گەورە دەبۆوە، هەر بەو هۆیەش خامنەیی بە لادانی ئەحمەدی‌نژاد هەم ئەو لایەنە سەركوت دەكا و هەم بە ئاواتی خۆی كە نزیك بوونەوەیە لە ئەمریكا و زلهێزەكان، دەگات و قەیرانەكان لەسەر دەسەڵاتەكەی هەڵدەگرێ.
دیارە ڕووحانی دەیان وادەی بە نەتەوەکانی ئێران داوە و هیچی نەهاتۆتە دی، ئەوەی ئەو باسی دەكرد هەر بۆ بانگەشەی هەڵبژاردن بوون و هیچی دیكە. كلیلەكەی بەتەواوی ژەنگی هێنا و هیچ دەرگایەكی بەرەو ڕووی خەڵك پێ نەكراوە. ئەوەی دەیكوت ئێمە ئامانجمان پڕكردنی سفرەی خەڵكە هەر ئاوڕی لێنەداوە و لەو ماوەیەدا كە دەوڵەتەكەی هاتۆتە سەر كار، هەر لە سفرەی خەڵكی هەڵگرتوە و لە گیرفانی دەسەڵاتی ئاخنیوە. لەبەر نەبوونی هەلی كار، بێكاری پەرەی سەندووە و تەنانەت زۆربەی بێماڵەكان بۆ كرێماڵەكانیان داماون.
ئەم كارەی خامنەیی نیشانی دەدا كە ئەو كابرایە چەند لایەنگری ئەو ڕێكەوتنەیە و ئەوەی جار جارە دەیڵێ، هەر بۆ دەمكوتكردنی پرتەوبۆڵەكانی نێوخۆی ڕژیمە و بۆ دەرەوەی ئێران نییە، کەوایە پێوەندی بە سیاسەتی دەرەوەی ئێرانەوە نییە. بەدڵنیاییەوە خامنەیی هەتا سەر ئێسقان لەگەڵ ڕێكەوتنەكەیەو دەزانێ بێ ئەو ڕێكەوتنە چ سەر ئێشەیەكی بۆ ساز دەبوو.
