ڕۆژی کورد: بەپێی هەواڵی هەواڵدەریی فارس، ناڕەزایەتیی دەربڕین بە ڕاگواستنی ئاو لە شاری “بلداجی” لە پارێزگای چوارمەحاڵ و بەختیاری، لە نێوان خەڵک و پۆلیس، پێکدادان و تووند و تیژی لێکەوتەوە.
لەمبارەوە لە تویتێری هەواڵدەریی فارسدا باس لە ئاگر گرتنی بینای دادگای بلداجی لەو پێکدادان و ئاڵۆزییەدا کراوە و دەگوترێ چەند پۆلیسیش بریندار بوون.
شایەتحاڵان باس لە دەستبەسەرکرانی لانیکەم ٥٠ کەس و برینداربوونی دەیان کەس دەکەن.
ماڵپەڕی بی بی سی لەمبارەوە دەنووسێ: “هەندێک ڕاپۆرتی پشتڕاست نەکراوەش باس لە کوژرانی ٢ مەئمووری پۆلیس دەکەن.”
ئەو ئاڵۆزی و پێکدادانە کاتێک دەستی پێکردووە کە بەشێک لە خەڵکی ئەو شوێنە لە نزیکی تاڵاوی چغاغوور کۆبوونەوە و ویستوویانە پێش بە دەست بە کار بوونی عەمەلیاتی بۆڕی دانانی پرۆژەی ڕاگواستنی ئاو بۆ کارخانەی فولادی سفیددەشت بگرن.
دوای کۆبوونەوەی خەڵک پۆلیسی دژەشۆڕش بۆ بڵاوە کردن بە خەڵک و جێ بە جێ بوونی ئەو پرۆژەیە ڕژاونەتە شوێنەکە و بەو هۆیەشەوە ئاڵۆزی لە نێوان خەڵکی ناڕازی و پۆلیسی دژەشۆڕشی ڕژیم دەستی پێکردووە.
