ڕۆژی کورد: بەپێی هەواڵی بەشی فارسیی ناوەندی ڕٶژی کورد، ئەمڕۆ شەممە ٢٧ی پووشپەڕ، ٢ کەس لە لایەن دەزگای نادادوەریی ڕژیم لە مێهرشاری، کەرەج بە تاوانی “دەستدرێژی کردن” لەبەر چاوی خەڵک لە سێدارە دران.
دەگوترێ ئەو دوو کەسە بەهۆی سکاڵای کچێکی خوێندکار لە ژێر ناوی دەستدرێژی کردن، لە سێدارە دراون.
لە لایەکی ترەوە بەپێی هەواڵی هەواڵدەرییەکانی ئێران، لە بەرەبەیانی ئەمڕۆ ٢٧ی پووشپەڕدا، سێ هاووڵاتی لە شاری بیرجەندی سەر بە پارێزگای خوراسانی باشوور، بە تاوانی پەیوەندیدار بە مادەی سڕکەر لەسێدارە دران.
هەواڵدەریی کوردپا شوناسی ئەو سێ هاووڵاتییە بە “مەنسوور زەعفەرانی، یووسف براهویی و قاسم دڵشاد” ڕاگەیاندووە.
هەر لەو پەیوەندییەدا، ڕۆژی پێنجشەممە ٢٥ی پووشپەڕ، دوو زیندانیی دیکە لە زیندانی ناوەندیی شاری لاکانی ڕەشت بە تاوانی پەیوەندییدار بە مادەی سڕکەر لەسێدارە دا. ئەو دوو هاووڵاتییە تەمەن ٤٠ و ٤٩ ساڵە هەر کامیان بە تاوانی هەڵگرتنی ٦٧٥گرەم شیشە لەدار دراون.
هەواڵدەریی کوردپا هەروەها ڕایگەیاند، ڕۆژی دووشەممەی ڕابردوو ٢١ی پووشپەڕ، پێنج زیندانیی دیکە بە تاوانی پێوەندیدار بە مادەی سڕکەر، بە ناوەکانی مەسعوود تەقی پوور، حەسەن فەرەج پوور، مێهدی بافری، باقر جەلیلی و حەمید حقوقین، لە زیندانی ناوەندیی شاری ئەراک ئیعدام کران.
ئەو پێنج هاووڵاتییە بە تاوانی کڕین و فرۆشتنی مادەی سڕکەر بە ئێعدام مەحکووم کرابوون.
شەپۆلێکی نوێی ڕەوتی ئێعدامەکان کە بە بۆنەی مانگی ڕەمەزانەوە ڕاگیرابوو، سەر لە نوێ دەستی پێکردووەتەوە.
