حیزبەکانی رۆژهەڵات وشیاری پیلانی رووداو و ک.٢٤ بن

0
6778

ناوەڕاستی مانگی سەرماوەزی ساڵی ٩٥ی هەتاوی ژمارەیەک لە میدیاکارانی سەربە یەکیەتی و گۆڕان سەردانی ئێرانیان کرد، کە لە ناو تۆڕە کۆمەڵایەتییەکان و چالاکانی سیاسیی کوردی رۆژهەڵات‌دا کاردانەوەی زۆری لێکەوتەوە.

هاوکات لەگەڵ ئەو سەردانەی رۆژنامەنووسان بۆ ئێران، سەرکونسولی رژیمی ئێران لە هەولێر سەردانی ک.٢٤، رووداو و باس نیوزی نزیک لە پارتی دیمۆکراتیان کرد.

سەردانی سەرکونسولی ئێران لەگەڵ ئەوەیکە سەرجەم ژووری ئەو سێ میدیایەی پشکنی‌بوو، لەمەڕ رووماڵ کردن و شێوەی رووماڵی هەواڵەکانی سەبارەت بە رۆژهەڵاتی کوردستان و ئێران هۆشداریی پێدابوون.

هەواڵی پەیوەندیدار: سەرکونسولی ئێران بۆ هۆشداری دان سەردانی (رووداو، K24 و باس‌نیوز)ی کرد

دوابەدوای سەردانەکەی کونسولی ئێران بۆ ک.٢٤، ئەو کەناڵە لە تاران لقی خۆی کردەوە و لە چوارچێوەیەکدا کە هیچ دژایەتیەکی مەسڵەحەتی رژیمی ئێرانی تێدا نەبێ، هەندی هەواڵ و راپۆرت لە ناوخۆی ئێرانەوە ئامادە و بڵاو بکاتەوە.

دوو کەناڵی ک. ٢٤ و رووداو بۆچی جێگەی مەترسین؟

لە سەرەتای دامەزرانی ئەو دوو کەناڵەوە، دەیان هەواڵ و راپۆرت و وتووێژ لەگەڵ رێبەرایەتیی حیزبەکان ئەنجام دراوە، بەڵام سەرلەبەری ئەو وتووێژانە تەنیا وڵامدانەوە بە پرسیاری پێشکەشکاری بەرنامەکان بووە. هاوکات حیزبەکانی رۆژهەڵات سەرجەم بینەری خۆیان بەو کەناڵانە دۆڕاندوە و درگای تەلەفزیۆنەکانیان گاڵە دا.

بێگومان لە کاری پیشەیی رۆژنامەوانیدا، هەمیشە پێشکەشکار یان دیمانەکار هەوڵ ئەدات سیاسەتی میدیایی خۆی لە رێگەی ئاراستە کردنی پرسیاری تایبەتیی خۆیەوە، بە میوانی بەرنامەکەی بڵێتەوە. بێگومان دوو کەناڵی ک. ٢٤ و رووداو کە هەڵگری گوتاری پارتی دیمۆکراتن بەدەر لەو رێسا رۆژنامەوانیە نین.

یەکەم: لە بەرەبەری هەڵبژاردنی رژیمی ئێراندا، کەناڵی رووداو دیبەیتێکی بۆ حیزبەکان ساز کرد، کە لەوێدا ئەحزابی بایکۆتکار، ئەساسی بایکۆتی خۆیان بردە ژێر پرسیارەوە. چونکە پێش لەوەی بە بەردەنگی خۆیان لە رۆژهەڵات بڵین ئێمە کێشەی خاک، ناسنامە(هویت)، مێژوو، تاڵانکردنی هەزاران کانگە و قەرەبوو کردنەوەی سەدان ساڵ بە هەژاری هێشتنەوەی ئابووری، سیاسی، کۆمەڵایەتی و کولتووریمان لەگەڵ داگیرکەران هەیە، باس‌یان لە خودی سیستم و ئەسڵی هەڵبژاردن لە رژیم‌دا دەکرد، کە ئەمە بەپێچەوانەی ئەسلی بایکۆت کردن لەلایەن لیدری سیاسییەوەیە، بەڵکوو لە باشترین حاڵەتدا ئەوە ئەرکی رۆژنامەوانە شرۆڤەی شێوازی هەڵبژاردن لە ئێراندا بکات.

دووەم: رووبەڕوو کردنەوەی رێبەرایەتیی حیزبەکان لەگەڵ کۆمەڵێک کەسی سەربە رژیم کە رێبەریی حیزبەکان ناچار دەکا تەنیا پەرچەکرداریان بە قسەی کەسانی سەربە رژیم هەبێ و ئەحزاب دەخەنە “موضع دفاعی”یەوە و قەت لە ئاستی بایکۆت و دژایەتیی رژیمدا دەرناکەون.

ئەو دوو کەناڵە (رووداو و ک.٢٤) بە شێوەیەکی زۆر ئامانجدار، دوو دیمانە لەگەڵ سکرتێری پێشووی یەکێک لە حیزبەکان ئەنجام ئەدەن، کە خودی لێدوانی ئەو کەسە، خاوەن هیچ چەشنە نەخشە رێگەیەک و گوفتمانێک نیە، بەڵکوو زیاتر وەکوو ئەستاندنەوەی مەشرووعی سیاسی لە حیزبە کوردییەکان دەردەکەوێ.

ناردنی هەواڵنێرانی کەناڵی رووداو و ک.٢٤ بۆ تاران و بڵاو کردنەوەی راپۆرتیکی جیگەی تێڕامان لە کەنالی رووداو، کە سەرلەبەری راپۆرتەکە رەوایی سیاسیی حیزبە کوردییەکان دەباتە ژێر پرسیارەوە.

هەواڵنێری رووداو، ئەمڕۆ سێ‌شەممە راپۆرتێکی بڵاو کردۆتەوە کە تیایدا نووسیویەتی: “ئەو کاتەی من و هاوکارانم بە مایکی رووداو گەیشتینە خاكی ئێران، لە شاشەی رووداو سکرتێری حیزبەکانی رۆژهەڵاتی کوردستان کە لە ئێران قەدەخەن، باسی هەڵبژاردنەکانیان دەکرد، ئێمەش ترسمان لە کاردانەوەی دەزگا ئەمنییەکان هەبوو، بەڵام بەپێچەوانەوە هەموو شتێک ئاسایی رۆیی“.

لە درێژەدا دەنووسێ: “دوا شەوی هەڵمەتی هەڵبژاردن بوو، دەبوو زوو چەند شوێنێک بکەین بۆئەوەی هەندێک وێنەی هەڵمەتی گەرموگوڕی هەڵبژاردن بگرین“.

هەواڵنێری رووداو، ئەگەرچی باسی لەوە نەکردووە، کە لەسەر چ رێکەوتنێک ئیزنی چوون بۆ تارانیان پێدراوە، بەڵام دەتوانین چەند پرسیار ئاراستەی رای گشتی و ئەو کەناڵە بکەین:

١. ئایا ئیزنی چوون بۆ تاران، تەنیا بە مەرجی تاریف کردن لە رژیمی ئێران و وێنا کردنی سیمایەکی دیمۆکراتیک و جوان لە رژیمی ئێران بووە؟

٢. ئەم رێکەوتنە لە ئەنجامی سەردانی سەرکونسولی رژیمی ئێران بۆ کەناڵەکان بوو؟

٣. لەو رێکەوتنەدا رووداو و ک٢٤ چیان داوە و چیان وەرگرتووە؟

٤. ئەحزابی رۆژهەڵات چەندە لەو رێکەوتنەدا معامەلەیان لەسەر کراوە؟

٥. چۆنە کە کەناڵی بی‌بی‌سی کە هەم لە نووسین‌دا و هەم لە سیاسیەتی کاری‌دا بە شاهیدی حیزبەکانی رۆژهەڵات داکۆکیکاری ناسنامەی فاشیسمی فارسە، رێگەی چوونە ئێرانی پێ نادرێ، بەڵام ئێوە کە دوێنێ کۆبوونەوەتان بۆ حیزبەکان کرد کە وەک خۆتان دەلین بایکۆتی هەلبژاردن بکەن، رێگەی چوون بۆ تارانتان پێ ئەدرێ؟ مەگەر جگە لەوەیە کە گوتاری ئەحزابی کورد هەتا ئاستی ئیسلاح تەڵبی بێننە خوارەوە؟ ئایا جگە لەوەیە کە بەپێی سیاسیەتی دەوڵەتی حەسەن رۆحانی ئەحزابی معاند بکەن بە ئەحزابی منتقد؟

دوابەدوای سەردانی سەرکونسولی ئێران بۆ کەناڵەکانی رووداو و ک.٢٤، هەر کامەیان هەواڵێکیان لەمەڕ حیزبەکانی رۆژهەڵات بڵاوکردەوە، کە دەستبەجێ لە هەموو میدیاکانی رژیمی ئێراندا کاردانەوەی لێکەوتەوە.

بڵاو کردنەوەی هەواڵی کشانەوەی هێزەکانی حیزبی دێمۆکرات لە سنوورەکان لەلایەن کەناڵی ک.٢٤ و بڵاو کردنەوەی راپۆرتێکی ساختە لە زاری ئەحمەد شەهیدەوە کە بە پێی راپۆرتی رووداو ئەحمەد شەهید “خەباتی چەکداری بۆ تێکدانی دۆخی رێفۆرم لە ئێران” وەسف کردبێ. ئەو دوو هەواڵە بوون کە دەستبەجێ دەنگدانەوەی لە کەناڵەکانی رژیمی ئێراندا هەبوو.

هەبوونی ژمارەیەکی ئیجگار زۆر کۆمپانی ئێرانی (ژمارەیان بە ٥٠٠ دانە مەزندە دەکرێ) سەربە قەرارگای رەمەزان لە باشوور و چاوەدێری کردنی هەموو دامودەزگاکانی باشووری کوردستان، سەلمێنەری ئەو راستیەیە کە رژیمی ئێران هەیمەنەی بەسەر هەموو دامودەزگاکانی هەریمی کوردستاندا هەیە.

هەواڵی پەیوەندیدار: قەرارگاکانی سوپای قۆدس لە هەرێمی کوردستان

سەرکونسولی ئێران لە کاتی سەردانی بۆ کەناڵ ک. ٢٤ بە بەرپرسی ئەو کەناڵەی راگەیاندبوو کە لە یەک مانگی رابردوودا ٢٢٣ هەواڵ و راپۆرتیان لەسەر ئێران و رۆهەڵاتی کوردستان ئامادە کردووە.

ئەستاندنەوەی مەشرووعی سیاسیی حیزبەکانی رۆژهەڵات لە ناو خەڵکی هەرێمی باشووری کوردستان

وەسف کردنی سیمای دێمۆکراتیک لە رژیمی ئێران و لە بەرامبەریشدا بچووک نیشاندانی داخوازیی حیزبەکانی رۆژهەڵات، هەتا رادەیەکی زۆر ئەو قەناعەتەی لەلای خەڵکی باشوور دروست کردووە، کە حیزبەکانی رۆژهەڵات خاون هیچ گرفتێکی ئەوتۆ لەگەڵ رژیمی ئێران نین.

بێگومان ئەگەر پرۆژەی دەرکردنی حیزبەکانی رۆژهەڵات لەلایەن پارلمانی عێراقەوە هاتبێتە بەر باس، دیمۆکراتیک وەسف کردنی سیمای دیکتاتۆرانەی رژیمی فاشیستیی ئیران لەلایەن کەناڵەکانی رووداو و ک.٢٤وە بۆ خەڵكی باشوور، بێ ئەملاولا جیىەجێ کردنی پلانی دەرکردنی حیزبەکانی رۆژهەڵات لە خاکی باشووری کوردستانە.

راستیی ئەو مەسەلەیە ئەوەیە ، ئەگەر حیزبەکانی رۆژهەڵات بەو هیوایەن جارێکی دیکە لە رێگەی میدیاوە وەکوو کۆتاییەکانی دەیەی ٨٠ی هەتاوی لە رژهەڵات خاوەن  گوفتمان و بەردەنگی تایبەتیی خۆیان بن،  پێویستە ئاوڕ لە کەناڵێک بدەنەوە کە ئاوێنەی ویست و خەباتی سەدان ساڵەی کورد لەو بەشە بێت.

ئەگەر خاوەن میدیاکانی باشوور مەبەستی شاراوە و گوماناویان لە رووماڵ کردنی هەواڵەکانی رۆژهەڵات و دابەزاندنی ویستی حیزبەکانی رۆژهەڵات نیە، دەکرێ بە یارمەتیدانی ئابووری رێگە بۆ بووژاندنەوەی کەناڵی حیزبەکانی رۆژهەڵات خۆش بکەن و چیدیکە حیزب و خەلکی رۆژهەڵات نەکەنە قوربانی و کڕینی بەردەنگی رۆژهەڵاتی.

بێگومان لە دنیای ئەمڕۆدا کە راگەیاندن وەکوو دەسەڵاتی چوارەم لە دنیادا پێانسە کراوەو گەورەترین ئامارازی ئاراستە کردنی رای گشتی‌یە، حیزبەکان بەر لەوەی بیر لە جوڵاندنی هێزی پێشمەرگەیان بە دژی دەسەڵاتی داگیرکەردا بکەنەوە، پێویستە بە شێوەی جیددی ئاوڕ لە زمانحاڵی شۆڕشەکەیان واتە میدیای سەربە گوتاری شۆڕشی خۆیان بدەنەوە.

ناوەندی رۆژی کورد، کە بێگومان دەنگ و رەنگی بزووتنەوەی رۆژهەڵات بەبێ جیاوازیی فکریی حیزبەکانی رژهەڵات بووە، وەکوو ئەرکی نەتەوەیی دژ بە داگیرکەری کوردستان و خزمەتی پێشمەرگانە، ئامادەیە وەکوو میدیای هەموو حیزبەکان رۆڵ ببینی و دەنگی بزاوتی کورد لە رۆژهەڵاتی نیشتمان بێ.

سه‌رنج و كۆمێنت

كۆمێنت