بەپێی زانیارییەکانی ڕۆژی کورد، باروودۆخی گشتیی ڕەمەزان ئەحمەد کەماڵ، زیندانیی سیاسیی کوردی کوردستانی ڕۆژئاوا لە زیندانی ڕەجایی شاری کەرەج، دۆینێ پێنج شەممە لە پێنجەمین ڕۆژی مانگرتن لە خواردنیدا، نالەبارە و مەئموورانی زیندان بە زۆرەملیی دەستبەند، سیرۆمیان دەرخوارد داوە.
ڕەمەزان ئەحمەد کەماڵ کوڕی موسلیم، زیندانیی سیاسیی کوردی کوردستانی ڕۆژئاوا لە هۆڵی ژومارە ١٢ی زیندانی ڕەجایی شار کە بە هۆی کێشەی جوومگە و ژانی زۆری دەستەکانی لە دۆخێکی نالەباری جەستەیی دایە، وەک ناڕەزایەتی دەربڕین بە پێڕانەگەیشتنی پزشکی و گوێ پێنەدانی بەرپرسانی زیندان بە دۆخی نالەباری خۆی، ماوەی شەش ڕۆژە واتا لە ڕۆژی یەکشەممەوە دەستی داوەتە مانگرتن لە خواردن.
ئەو زیندانییە سیاسییە کوردەی کوردستانی ڕۆژئاوا لە ڕۆژی مانگرتنییەوە تا ئێستا لە ماوەی ٢ ڕۆژدا، سێ جار ڕاگوازراوە بۆ بێهداری زیندان، ڕۆژی پێنج شەممە، مەئموورانی زیندان بە زۆرەملیی دەستبەند، سیرۆمیان لە ناوبراو داوە.
ڕەمەزان ئەحمەد کەماڵ، خەڵکی شاری کوبانی یە و ساڵی ١٣٧٨ و دوای ئەوەی کە بە هەڵە هاتە ناو سنووری ئێران، کەوتە بەر دەستڕێژی سنوورپارێزانی ئێران و لە لای زگ و شانی چەپ و ڕان ـەوە پێکراو و دواتر دەست بەسەر کراو و ڕاگوازرا بۆ زیندانی مهابد و بە تاوانی ئەندامەتی لە پ ک ک، سزای سێدارەی بەسەردا سەپا و دواتر دیوانی باڵای ئێران ئەو سزایەی کرد بە دە ساڵ.
ئەو زیندانییە سیاسییە کورد، پێشتریش بۆ جاری پێنجەم، ڕۆژی شەممە ١ی ڕەشەممەی ساڵی پاریش دەستی دابوو بە مانگرن کە دوای ٤ ڕۆژ و دوای ڕەزامەندی بەپرسانی زیندان بۆ ناردنی بە نەخۆشخانە، مانگرتنەکەی شکاندبوو.
