رۆژی کورد؛
دەستەیەک لە ڕۆژنامەنووسانی قەڵادزێ بە دەرکردنی بەیاننامەیەک پشتیوانیی خۆیان بۆ داواکانی محەمەد سەدیق گیراوی سیاسی كورد، ڕۆژنامەنووس و ھەڵسوڕاوی بواری مافەکانی مرۆڤ لە ڕۆژھەڵاتی کوردستان دەربڕی و ئیدانەی ھەرھەنگاوێکی نامرۆڤانەی کاربەدەستانی ڕژێمی ئێران دەکەن کە دژبە ماف و خواستەکانی کەبوودوەند و باقی گیراوانی دیکەی سیاسی کورد لەناو گرتووخانەکانی ئێراندا پەیڕەو دەکرێت.
ئەمەی خوارەوە دەقی بەیاننامەکەیە کە نووسخەیەکی بۆ رۆژی کورد نێردراوە؛
“کەبوودوەندەکانی ناو چاڵەڕەشەکانی ئێران لەبیر ناکەین”
بەدڵ و بەگیان پشتیوانی لە داوا ڕەواکانی “محەمەد سدیق کەبوودوەند”، گیراوی سیاسی كورد، ڕۆژنامەنووس و ھەڵسوڕاوی بواری مافەکانی مرۆڤ لە ڕۆژھەڵاتی کوردستان، و ھەروەھا داخوازی ڕەوای سەرجەم گیراوانی سیاسی کورد دەکەین کە ئێستا لەناو چاڵەڕەشەکانی کۆماری ئیسلامی ئێراندا بە بیانووی جۆربەجۆر بەند کراون.
“کەبوودوەند” ماوەی ٩ ساڵە لەناو چاڵەڕەشەکانی ئێراندا بەند کراوە و بە خۆڕاگرییەوە ماوەی بەندکردنەکەی بەڕێدەکات.
بەڵام ھەنووکە دەزگا ئەمنییەکانی ڕژێمی ئێران، لەھەوڵی ئەوەدان دۆسییەی دیکە لەدژی بکەنەوە بۆئەوەی ماوەی سزاکەی درێژتر بکەنەوە، بەھۆیەشەوە کەبوودوەند ماوەی نزیکەی مانگێکە مانی لەخواردن گرتووە و دۆخی تەندرووستیشی ناجێگیرە.
ئێمە دەستەیەک لە ڕۆژنامەنووسانی قەڵادزێ، ئیدانەی ھەرھەنگاوێکی نامرۆڤانەی کاربەدەستانی ڕژێمی ئێران دەکەین کە دژبە ماف و خواستەکانی کەبوودوەند و باقی گیراوانی دیکەی سیاسی کورد لەناو گرتووخانەکانی ئێراندا پەیڕەو بکرێت.
لەونێوەشدا، داوا لەسەرجەم کۆڕ و کۆمەڵە نێودەوڵەتییەکان و ڕێکخراوەکانی مافی مرۆڤ و ھێز و لایەنە سیاسیەکانی ھەموو بەشەکانی کوردستان دەکەین کە بەدواداچوون بۆ کەیسی کەبوودوەند و تەواوی بەندکراوانی سیاسی کورد لە ئێران بکەن و ڕەفتارە دور لە ئینسانییەکانی ڕژێمی تاران بەرامبەر بە بەندکراوانی سیاسی لەقاوبدەن و ڕایگشتی لێ ئاگادار بکەنەوە.
ھەروەک بە پێویستیشی دەزانین کە ڕووی داوامان بکەینە وڵاتانی زلھێز و بڕیار بەدەستی جیھان کە بەھۆی ڕێکكەوتنی ئەتۆمی ئێران و وڵاتانی (۵+۱) ، دۆخی مافی مرۆڤ لە ئێران و داخوازییەکانی کورد لە ئێراندا فەرامۆش نەکرێت.
ئێمە وای دەبینین کە ھەرچەشنە سەودا و مامەڵەیەکی سیاسی کە لەنێوان ڕژێمی ئێران و وڵاتانی ئەمریکا و ھاوپەیمانەکانیدا بکرێت، کە بەوھۆیەوە پێشێل کرانی مافەکانی مرۆڤ لە ئێران نادیدە بگرێت،بە ھەنگاوێکی دور لە بەھا مرۆییەکانی دەزانین.
بەھەمووشێوەیەک، پشتیوانی لە داخوازییەکانی کەبوودوەند و باقی گیراوانی سیاسی کورد لەناو گرتووخانەکانی ئێراندا دەکەین.
دەستەیەک لە ڕۆژنامەنووسانی قەڵادزێ
١/ ٦/ ٢٠١٦
