دوابەدوای ڕێککەوتنی ناوکی (ناسراو بە بەرجام) لە نێوان ئێران و وڵاتانی پێنج کۆی یەک، حەسەن ڕووحانی دەستی کردووە بە بەرفراوانکردنەوەی پەیوەندییەکانی بەتایبەتی لە ڕووی ئابوورییەوە لەگەڵ وڵاتانی جیهان و تا ئێستا سەردانی دوو وڵاتی بەهێزی ئیتالیا و فەڕانسەی کردووە، لە سەردانی فەڕانسەدا ئێرانییەکان و بەشێک لە چالاکانی بەرهەڵستی فەڕانسەوی (بەتایبەت فێمینیستەکان) و لە پێش گشتیانەوە کوردەکانی دانیشتووی فەڕانسە هەڵوێستی خۆیان بە ئاشکرایی دەربڕی کە ناوەندی سەربەخۆی وەشان و ڕاگەیاندنی ڕۆژی کورد یەکێک لە ڕێکخەرانی ئەو ڕێپێوانە بوو.
لە ئێستادا بە پێی هەندێ زانیاری و دەنگی نافەرمی کە لە تۆڕە کۆمەڵایەتییەکان بلاو کراوەتەوە، سبەی چوارشەممە ٣٠ مارس، حەسەن ڕووحانی، سەرۆک کۆماری کۆماری ئیسلامی ئێران و هەیئەتێکی هاوڕێی سەردانی وڵاتی ئوتریش یان هەمان نەمسا دەکەن.
خاڵی بەرچاو لەو سەفەرەدا، دەنگۆی بوونی محەممەد جەعفەر سەحراڕوودی، تیرۆریستی بەناوبانگی ئێران و تیرۆریست و بکوژی دوکتور عەبدووڕڕەحمان قاسملوو، یەکێک لە گەورە ڕێبەرانی هاوچەرخی کورد و سکرتێری پێشووتری حیزبی دێموکراتی کوردستانی ئێران ـە لە ناو ئەو هەیئەتەدا.
بەو بۆنەوە کۆمەڵێکی بەرچاو لە چالاکوانانی کورد لە وڵاتانی جیهان و بەتایبەتی وڵاتی ئوتریش بەو بۆنەوە ڕێپێوانێکیان ڕێکخستووە و داوا لە کوردانی وڵاتی ئوتریش دەکەن بەشداری چالاکانە لەو رێپیوانە ناڕەزایەتییەدا بکەن.
ناوەندی ڕۆژی کورد، دەنگی خۆی دەخاتە پاڵ دەنگی ناڕازییەکانەوە و داوا لە هاونیشتمانیان بەتایبەتی لە وڵاتی ئوتریش دەکات، لەو ڕێپێوانە ناڕەزایەتییەدا بەشداری بکەن و بە هەر جۆرێک کە بۆیان دەگونجێ، ناڕەزایەتی خۆیان دەرببڕن.
محەممەد جەعفەر سەحراڕوودی تێروریستی ڕژیمی کۆماری ئیسلامییه کەله ساڵی ١٩٨٩دا وێڕای چەند تێروریستی دیکه، د. عەبدولڕەحمان قاسملوو و هاوڕێیانی له شاری ڤییەن لە پایتەختی وڵاتی ئوتریش شەهید کرد، وەک ئەندامی هەیئەتی نوێنەرایەتیی کۆماری ئیسلامیی ئێران بۆ بەشداری لە ١٢٩ـەمین کۆبوونەوەی رێکخراوی یەکیەتیی نێونەتەوەیی پارلمانتاران ”IPU” هاتۆتە ژنێڤ.
دادگای ئوتریش لە ٢٨ی سەرماوەزی ١٣٦٨ی هەتاوی بەرانبەر به ١٩ی دسامبری ١٩٨٩ی زایینیدا، حوکمی گیرانی نێونەتەوەیی بۆ سەحراڕوودی دەرکردووە و ئەو حوکمە هەربە کراوەیی ماوەتەوە.
ناوەندی ڕۆژی کورد
