نزار زەکا ئەو کارناسە لوبنانی – ئامریکاییەیە کە مانگی خەرمانان ـی ساڵی ڕابردوو و لەسەر بانگهێشتی شەهین دۆخت مولاوێردی، جێگری حەسەن ڕوحانی لە کار و باری ژنان و بنەماڵەدا، لە سمینارێک لە ژێر ناوی “دەوری ژنان لە پەرەسەندنی جێگیردا” چووبوو بۆ تاران و شوێن بزر بووە، پەیامیکی دەنگیی داوەتە دەر.
زەکا لەو پەیامە دەنگییەدا کە لە زۆرێک لە میدیاکانی لوبنان بڵاو بۆتەوە داوا لە تەمام سەلام سەرۆک وەزیران، جبران باسیل وەزیری کار و باری دەرەوە و عەباس ئیبراهیم سەرۆکی ڕێکخراوی ئاسایشی گشیی لوبنان دەکات کە بۆ ئازاد کردنی لەدوای ٢٠٠ ڕۆژ لە دەست بەسەر بوون، هەوڵ بدەن.
ڕێکخراوی تەکنەلۆژی پەیوەندی و زانیاری عەرەب “ئەجمەع” (IJMA3-USA) کە لە بنکەکەی لە واشنگتۆن ـە دەڵێ، نزار زەکا ڕێکەوتی ٢٧ی خەرمانان (١٨ی سیپتامبر) لە دوای گەیشتن بە تاران، شوێن بزر بووە و ڕفێدنراوە. شایانی باسە کە ئەو رێکخراوە کار لەسەر ئازادی ئینتێرنێت لە خۆرهەلاتی ناوەڕاست دەکات و نزار زەکا، سەرۆکی ئەو ڕێکخراوەیە.
نزار زەکا لە پەیامە دەنگییەکەی خۆیدا بەو شێوەیە دەدوێ: “ئەو پەیامە ڕۆژی ٢ی ئاوریل ـی ٢٠١٦ لە بیست و یەکەمین ڕۆژی مانگرتن لە خواردنم کە ١٩٧ ـەمین ڕۆژی دزرانم لە لایەن سپای پاسدارانی ئێران و لە کاتی چوون بۆ ئێرانم تۆمار کراوە.من لەسەر داوای فەرمی جێگری سەرۆک کۆماری ئێران، هاتمە ئێران و لەو کاتیشەوە دزراوم و لە کاتی دزرانمەوە لە مانگی سیپتامبری ٢٠١٥ ـەوە نەمتوانیوە لەگەڵ هیچ پارێزەر یان نوێنەرێکی سەفارەتی وڵاتەکەم، چاوپێکەوتن بکەم”
شایانی ئاماژەیە کە نزار زەکا، لە سەردەمی دەسەڵاتداەریی ئەحمەدی نەژادیشدا سەردانی ئێرانی کردووە.
