ماوەیەکە کۆماری ئیسلامی جووڵەکانی خۆی لە سنوورەکانی نێوان کوردستانی ڕۆژهەڵات و کوردستانی باشوور زۆرتر کردووە، ئەوەش دەگەرێتەوە بۆ ڕاگەیاندنەوەی خەباتی چەکداری لە لایەن حیزبی دێموکراتی کوردستانی ئێران کە دواتر پارتی ئازای کوردستانیش ئامادەیی خۆی بۆ چوونەوە کوردستانی رۆژهەڵات و شەڕ لەگەڵ کۆماری ئیسلامی ئێران ڕاگەیاند.
جیا لە ڕاگەیاندنی چوار مانۆڕی تایبەت لە ماوەی چەند مانگی داهاتووە دا و هەروەها باس کردن لە پەیوەست ىوونی چەند خێلی بەلووچ بە هیزەکانی دەوڵەت، کۆماری ئیسلامی باس لە دامەزراندنی بنکەی مووشەکی لە سنوورەکانی نێونا کوردستانی خۆرهەڵات و کوردستانی باشوور دەکات.
بە گوێرەی ڕاگەیاندنی هەواڵدەرییەکانی کۆماری ئیسلامی، ئهرتهشی ئێران 33 بنكەی مووشهك هاوێژ و تۆپخانە لە شارەكانی ڕۆژھەڵاتی كوردستان جێگیر دەكات.
فەرماندەی لەشكری 28 ی پیادەی ئهرتهشی ئێران لە ڕۆژههڵاتى كوردستان ڕايگهياند، یەكە تایبەتەكانی ھێزی پیادەی ئەرتەش و 33 بنكهی مووشهك هاوێژ و تۆپخانە لە شارەكانی ڕۆژھەڵاتی كوردستان جێگیر كراون.
بە وتەی ئەو فەرماندەیە، دامەزراندنی ئەو بنكه و یەكە تایبەتانە بۆ ڕووبەڕووبوونەوەی پیلانی دوژمنان و گرووپە تەكفیرییەكانە.
ئەمیر ئەبولفەزل بەزرگەری بە ھەواڵدەری فارسی گوتووە، لە شارەكانی سەقز، مەریوان و بانە، یەكەی تایبەتی ھێزی پیادەی ئەرتەشی ئێران لە ڕۆژههڵاتى كوردستان جێگیركراون.
چهند ڕۆژێك له مهوبهر فەرماندەی ھێزی ویشکانی سوپای پاسداران ڕایگەیاندبوو، لە سنوورە ھاوبەشەكانیان لەگەڵ ھەرێمی كوردستان و عێراق، لەبهر سهقامگیریی و ئاساییش یەكەی تایبەت دادەمەزرێنن، ھەرێمی كوردستانیشی بەوە تۆمهتبار كردبوو، كە توانای كۆنتڕۆڵی سنوورەكانی نییە و ئاماژەی بە سنورەكانی رۆژئاوا و باكووری رۆژئاوای ئێران كردبوو كە سنوورەكانی رۆژھەڵاتی كوردستانن.
شایانی ئاماژەیە کە ڕۆژی سێ شەممە ٢٤ی خاکەلێوە، شایەتحاڵێک لە شاری ڕەبەت بە ڕۆژی کوردی ڕاگەیاندووە کە ژات ژمێر ٣ی ئێوارە، ٣ ترۆمبیلی هەڵگری مووشەک بە پێش چاوی خەڵکدا ڕاگوازراون بۆ سنوورەکان.
ئەو شایەتحاڵە هەروەها گوتیشی مەبەستی دەوڵەت لەو کارە دەنگدانەوەی هەواڵ و هەروەها ترساندن و تۆقاندنی خەڵکی کوردستانە چونکە پێشتر ئەگەر کاری هاوشێوەیان کردبا لە شەودا دەیانکرد یان تەنانەت کارەبای شوێنەکان بە گشتی دەپچڕێندراون بەڵام ئەو جارە بە پێش چاوی خەڵکدا و بەوپەڕی ئامادەکارییەوە ئەو کارەیان کرد.
شایانی باسە کە لە ماوەی نەورۆزی ئەمساڵ تا ئێستا میدیا و ماڵپەڕ و ڕۆژنامەکانی سەر بە ڕژیم بە شیوەیەکی چڕ و پڕ دەستیان کردووە بە پروپاگەندا بە دژی حیزبی دێموکراتی کوردستانی ئێران و بە هەڵایسێنەری شەڕ لە کوردستانی ئیرانی دەناسێنن و چەندین وتووێژیان لەگەڵ جاشەکان و کەسانی تر کردووە کە تێید باس لە بکوژی و ئاژاوەگێڕی پێشمەرگەکان و حیزبە کوردییەکان دەکەن.
