مستەفا هیجری، سکرتێری گشتیی حیزبی دێموکراتی کوردستانی ئێران، دوای شەهیدبوونی پۆلێک لە پیشمەرگەکانی حدکا، لە پەیامێکی ڤیدیۆیدا داوا لەو چەکدارانە و هەموو ئەو کوردانە دەکا، کە لە دژی جوڵانەوەی کورد خزمەت بە ڕێژیم دەکەن، چەکی خەیانەت بە گەل و نیشتمان فڕێ دەن، ئەگینا هێزی پێشمەرگە و خەڵکی تێکۆشەر و شۆڕشگێری کوردستان نایانبەخشن و درەنگ یا زوو بەرپرسیار دەبن لە بەرانبەر درێژەدانی کردەوە دژی مرۆڤانەکانیان .
مستەفا هیجری سەبارەت بە چوونەوەی پیشمەرگەکانیان بۆ نێو خاکی رۆژهەڵاتی کوردستان دەڵێت: “ئەوان کۆترەکانی ئاشتین کە پەیامی برایەتی و یەکسانیان بۆ هەموو دانیشتوانی کوردستان پێیە، ئەوان ئەو هێزەن کە هاتوون تا دەست لە دەستی ئێوە خەباتی شاخ و شار لێک گرێ بدەن، خەبات بۆ مرۆڤایەتی و ژیانی سەربەرزانەی سەردەمیانە، کە لە پەیامی نەورۆزی ئەمساڵدا ڕامان گەیاند”.
سکرتێری گشتیی حیزبی دێموکراتی کوردستانی ئێران لەدرێژەی پەیامەکەیدا ڕایدەگەیەنێت:” بە پێویستی دەزانین ڕوو بکەینە هەموو ئەو کەسانەش کە بە هەر هۆیەک چەکی ڕێژیمیان پێیە، یان بە هەر شێوەیەکی دیکە لە دژی هێزی پێشمەرگە و خەڵکی خەباتکار لە پێناو ئامانجە چەپەڵەکانی ڕێژیم هەڵسوورن، پەیامی ئێمە بۆ ئەو کەسانەش ئەوەیە کە: پێشمەرگە تەنیا یەک دوژمن دەناسێ ئەویش ڕێژیمی کۆماری ئیسلامییە کە هەموو مافەکانی ئەو گەلە و لەپێشدا مافی ئەو کۆمەڵە کوردانەی پێشێل کردووە کە بە چەکدار کردنیان پیلانی کورد بە کورد بەکوشت دان بەڕێوە دەبا و، لە بەرچاو خەڵکی کوردستان سووک و بێبایەخیان دەکا، ڕێژیمێک کە هەلوومەرجێکی وای بۆ کورد پێکهێناوە ژمارەیەک لەوان لە پێناو پەیدا کردنی نانێکی سەرشۆڕی بۆ خۆیان و منداڵەکانیان ئامادە دەبن دەستیان بە خوێنی پێشمەرگە، ڕۆڵە خەباتکارەکانی هاونەتەوەی خۆیان سوور بێ.”
مستەفا هیجری داوا لەو کۆمەڵە چەکدارانە و هەموو ئەو کوردانە دەکا، کە لە دژی جوڵانەوەی کورد خزمەت بە ڕێژیم دەکەن، تا درەنگ نەبووە، چەکی خەیانەت بە گەل و نیشتمان فڕێ دەن و دەست لە خەیانەت بە نەتەوەی خۆیان هەڵگرن و، نەفرەت بکەن لەو نانەی بە قیمەتی ڕشتنی خوێنی خەباتکارانی کورد پەیدای دەکەن.”
سکرتێری گشتیی حیزبی دێموکراتی کوردستانی ئێران لە درێژەی پەیامەکەیدا دەڵێت: “ئێمە لە سەرەتاکانی پاییزی ساڵی ١٣٨٨ی هەتاویش لەو ڕاستایەدا پەیامێکمان بەو کەسانە دا و، دڵنیامان کردنەوە ئەگەر چەکی خەیانەت فڕێ بدەن و دەست لە کردەوە دژی نەتەوەییەکانیان هەڵگرن، پێشمەرگە دوژمنایەتی ئەوان ناکا، ئێستاش ئێمە بە ناوەڕۆکی ئەو پەیامە وەفادارین و داواتان لێ دەکەین بگەڕێنەوە ڕیزی خەڵک با هەموومان شان بە شانی یەکتر ڕۆژ بە ڕۆژ زیاتر ڕێژیم داماو و ڕیسوا بکەین، یان لانیکەم لە بەدوا دا گەڕانی پێشمەرگە و چاوساغی کردن بۆ هێزە سەرکوتکەرەکانی ڕێژیم و هێرش کردن بۆ سەر پێشمەرگە خۆ بپارێزن، لە غەیری ئەوەدا دڵنیا بن هێزی پێشمەرگە و خەڵکی تێکۆشەر و شۆڕشگێری کوردستان ناتانبەخشن و درەنگ یا زوو بەرپرسیار دەبن لە بەرانبەر درێژەدانی کردەوە دژی مرۆڤانەکانتان”
