بەرپرسانی دەزگای دادوەیی ڕژیمی ئێران، هەواڵی قەمچی لێدان لە ٣٥ کوڕ و کچیان لە قەزوێن، بە تاوانی بەشداری کردن لە میوانییەک، بڵاو کردەوە
ڕۆژی کورد: بەپێی هەواڵی هەواڵدەریی میزان، سەر بە دەزگای دادوەریی ڕژیمی ئێران، ڕۆژی پێنج شەممە ٦ی جۆزەردان، لە شاری قەزوێن و بەپێی حوکمی دادگای گشتیی ئەو شارە، ٣٥ گەنج کە بە تاوانی بەشداری کردن لە میوانییەک لە ویلایەک لە قەراغ شار، دەست بەسەر کرابوون، قامچی (حەدی شەرعی – شەلاق) یان لێدرا.
بەپێی لیدوانی ئیسماعیل سادقی نیارەکی، دادستانی گشتی و شۆڕش ـی قەزوێن، ئەو ٣٥ کەسە بە تاوانی نەریت شکێنی، سزای ٩٩ قامچیان بۆ براوەتەوە کە ئەو سزایەیان لەسەر بەڕێوە چووە.
شایانی ئاماژەیە کە ئەو ٣٥ کچ و کوڕە بە بۆنەی جەژنی کۆتایی هاتنی خوێندن لە ویلایەک لە قەراغ شاری قەزوێن، کۆببوونەوە و جەژنیان گرتبوو.
شایانی باسە کە لەو چەند ڕۆژەی دواییدا، هەواڵنیرەکانی ئێران، هەواڵی دەست بەسەر کرانی چەندین کچ و کوڕیان لە ناو میوانیی تایبەتیدا بڵاو کردۆتەوە کە لە ناویاندا باس لە دەست بەسەر کرانی ٢٣ کچ و کوڕ لە شاری کرمان دەکرێ.
شایانی ئاماژەیە کە دەست بەسەر کراوان لە هێرشی پۆلیس بۆ سەر ئەو ماڵانە دەست بەسەر کراون و تاوانی “خواردنەوەی ئەڵۆکڵی”، “شکاندنی نەریت و نۆرم”، “سەمای بە کۆمەڵ و تێکەڵاویی کچ و کوڕ” یان دراوەتە پاڵ.
شایانی ئاماژەیە کە چالاکانی مەدەنی و سیاسی ئەو جۆرە هێرشانەی پۆلیسی ئێران بە دەست درێژی بۆ سەر ئازادییە تاکەکەسییەکانی تاکی ناو ئێران دەزانن و لایان وایە ئەوە جۆرێکە لە پێشێلکاریی مافی مرۆڤ.
