ڕۆژی کورد: بە پێی هەواڵی گەیشتوو بە بەشێ هەواڵی ناوەندی ڕۆژی کورد لە ناوچەی “تەرگەوەر”ـی سەر بە باژێری ورمێ، هێزەکانی سپای تیرۆریستیی پاسداران تەقەیان لە کۆڵبەرێکی کورد کردووە کە لە ئەنجامدا گیانی لە دەست داوە.
ڕۆژی پێنج شەممە ٢٣ی پووشپەڕی ١٣٩٥ هەتاوی، “دەروێش عادۆیی”، کوڕی عادڵ و خەڵکی گوندی “ستورە”، بە هۆی تەقەی هێزەکانی سپای تیرۆریستیی پاسدارانی ڕژیمی تاران بریندار بووە و لە ئەنجامدا دوای چەند ڕۆژ خەوتن لە نەخۆشخانە، بە هۆی تووندی و قووڵی برینەکانی، گیانی لە دەست دا.
شایەتحاڵێک لەمبارەوە ڕایگەیاند: “هێزەکانی سپای پاسداران نە تەنیا ئامادە نەبوون دوای پێکان، دەروێش ببەن بۆ نەخۆشخانە بەڵکوو تا ئێستاش هیچ ڕوونکردنەوەیەکیان لەمەڕ تەقە کردنەکە نەداوە”.
ناوەندی ڕٶژی کورد لە چەند سەرچاوەیەکی ئاگاداری سەربازیی ئێرانی زانیوە کە هێزەکانی ڕژیم لە ناوچە سنوورییەکان، فەرمانی تەقەیان پێیە و لە فەرمانەکەدا تەنیا ئاماژە بە کۆڵبەران نەکراوە، بەڵکوو هێزەکانی ڕژیم بۆیان هەیە، گومانیان لە هەر کەس بێ بیکوژن و تەقەی لێبکەن.
لەو فەرمانەدا ئاماژە نەکراوە کە ئیزنی تەقە پێدان کەی و چۆنە و دەبێ کام بەژنی لەشی مرۆڤەکە بگرێتەوە، هەر بۆیەش هێزەکانی ڕژیم کە زۆربەیان ناخۆجێین بە ڕق و قینی شەڕی پێشوو لە کورد، بە بیانووی گومان، تەقە لە شارۆمەندانی کورد دەکەن و جیا لە کۆڵبەران تا ئێستا چەند کەسی تریشیان کوشتووە لکە تەنانەت لە مەزرای خۆیان لە ناوچە سنوورییەکان گەڕاونەتەوە.
