ڕۆژی کور: ناوەندی “میترۆ”، ناوەندی پشتگیریی ڕۆژنامەوانان لە هەرێمی کوردستان، بێ ڕێزی و تووندوتیژی و هەڵکوتانە سەر ڕۆژنامەوانی تۆڕی میدیایی ڕووداو، “ڕەنگین شەرۆ” لە لایەن هێزەکانی ئاسایشی یەپەگەی سەر بە پ ک کای مەحکووم کرد.
ئەو ناوەندەی پشتگیری لە ڕۆژنامەوانان کە ساڵی 2009 دامەزراوە و ناوەندەکەی لە سڵیمانی ـتە، هێرش کردنە سەر و لێدان و تووندوتیژی بۆ سەر ڕەنگین شەرۆ ـی لە لایەن هێزەکانی پارتی کرێکارانی کوردستانی بە “نامرۆڤانە و هۆڤانە” وەسف کردووە،
سەنتەری میترۆ لە بەیاننامەیەکدا رایگەیاند “چەند ئەندامێکی میلیشیاکان دەستدرێژیان کردە سەر تیمێکی تۆڕی میدیایی رووداو و ئامێرەکانیان شکاندن و کامێرا و ئامێرەکانی پەخشی راستەوخۆیان دزین“.
ڕەحمان غەریب، بەرپرسی گشتیی میترۆ لە سلێمانیە لەمبارەوە ڕایگەیاندووە: “بەپێی ئاگاداریی ئێمە، هەواڵنێرێکی ڕووداو کەوتۆتە بەر هێرش و لێدان و بێ ڕێزی پێکراوە کە ئەوە لە ڕوانگەی ئێمەوە وەک کردەوەیەکی هۆڤانە مەحکووم دەکرێ”.
رۆژی 22-9-2016 پەیامنێری نێوداری تۆڕی میدیایی رووداو ، رەنگین شەرۆ ، دوای ئەوەی کاژێر 12 ی نیوەڕۆ لە دەروازەی پێشابیر – سێمالکا لە باشووری کوردستان دەپەڕێتەوە بۆ رۆژئاوای کوردستان بەمەبەستی سەردانی کەسوکاری نەک کاری رۆژنامەڤانی ، لەلایەن کارمەندانی سنوور کە سەر بە کانتۆنی جزیرەی رۆژئاوای کوردستان ، کاروبارەکانی دەربازبوون بۆ رۆژئاوای کوردستان تەواو دەکات و لەلایەن باوکییەوە پێشوازی لێدەکرێت ، بەڵام لە شوێنی سوواربوون لە مینی باسەکان ، لەلایەن ئاسایشی کانتۆنی جزیرە بانگدەکرێت و پێیدەڵێن نابێ بچێتە رۆژئاوای کوردستان و دەبێ بگەڕێتەوە باشووری کوردستان و، بە قسەی ناشیرین زۆر سووکایەتی بەکاری خۆی و رووداو دەکەن . دوای ئەوەی رەنگین شەرۆ ، پێیاندەڵێت ئەو بۆ سەردانی گوندەکەی و کەسوکاری هاتووەو پاش ئەوەی هەموو کاروباری دەربازبوونی تەواوکردووە ، نایەوێت بگەڕێتەوە ، کارمەندێکی پیاوی ئاسایش و چەند کارمەندێکی ژنی ئاسایشی کانتۆنی جزیرە ، هێرشدەکەنە سەر رەنگین شەرۆ ، جلوبەرگی دەدڕن و ئازاری دەدەن ، سەرەڕای ئەوەی کە زانیویانە کە دووگیانیشە. کە باوکی کچەکەی بەوشێوەیە دەبینێ هاوار دەکات و داوایان لێدەکات : ” بۆ خاتری خوا و بۆ خاتری پێغەمبەر وا لە کچەکەم نەکەن و ، رێگەی لێنەگرن “، بەڵام ئەو کارمەندانە پێیدەڵێن : ” ئێمە خواو پێغەمبەر ناناسین “. بەوشێوە تووندوتیژە رێگەی چوونە رۆژئاوای کوردستان لە رەنگین شەرۆ دەگرن و بە بەلەمێک دەینێرنەوە باشووری کوردستان.
