لە دوای نەورۆزی ئەمساڵ و پەیامی سکرتێری گشتیی حیزبی دێموکراتی کوردستانی ئێران بۆ ڕاسانەوە و دەست پێکردنەوەی خەباتی چەکداری، گوشاری هێزەکانی ڕژیم بۆ سەر گوندنشینان زیاتر بووە.
ڕۆژی کورد: بەپێی هەواڵی گەیشتوو بە ناوەندی هەواڵدەریی ڕۆژی کورد، ئەمڕۆ هەینی ڕێکەوتی ٢٨ی سەرماوەزی ١٣٩٥ی هەتاوی، فەرماندەی سپای تیرۆریستیی پاسداران لە شاری کامیاران سەردانی گووندەکانی ئەو ناوچەیەی کردووە و وەرزێڕ و گوندنشینەکانی کۆکردۆتەوە.
فەرماندەی سپای تیۆریستیی پاسداران لە کامیاران بە گوندنشینەکانی ئەو دەڤەرەی کوتووە کە باش دەزانین و ئاگادارین کە هێزی پێشمەرگە لەو ناوچەیە بوونیان هەیە، هەر بۆیەش دەبێ گوندنشینەکان هاوکارییان بکەن و هەر چەشنە هەواڵ و زانیارییەک لەو بارەوە ڕابگوازن.
ئەو بەرپرسە سەربازییەی ڕژیم لە کامیاران هەروەها بەڵێنی داوە بە گوندنشینەکان کە لە ئەگەری هاوکاری و ڕاگواستنی زانیاری، پاداشتی باشیان دەدرێتێ و بە پێچەوانەش سزای تووند چاوەڕوانیانە.
شایانی باسە، هەروەک لە هەواڵەکانی پێشووی ڕؤژی کورددا هاتووە، لە شاری سەڵماس و ماکۆش، جاشەکانی ڕەژیم لەسەر بڵندگۆی مزگەوتەکان هەڕەشەیان لە کوردەکانی ئەو شارە کردووە کە لە ئەگەری پەنادانی پێشمەرگە، ماڵەکانیان بەسەردا کاول دەکرێ.
لە هەمان کاتدا ماوەیەک لەمەوبەریش هەروەک لە هەواڵەکانی ناوەندی هەواڵدەری سەربەخۆی ڕۆژی کورددا هاتبوو، هیزەکانی ڕەژیم و بەتایبەت حاسڵە شێت کە جاشێکی بەناوبانگە لە پیرانشار، هەڕەشەیان لە هەوارچیەکان کردبوو کە لە ئەگەری نان پیدان و خزمەت کردنی پێشمەرگە بێ ئەم لا و ئەو لا دەکوژرێن و فەرمانی تەقە کردنیشیان پێدراوە.
پێویست بە ئاماژەیە کە هەندێک سەرچاوەی هێشتا پشت ڕاست نەکراوە باسی هاتنە ئارای شەڕ و پێکدادان لە جەڵدیان لە دۆینێ شەو واتا شەوی پێنج شەممە ٢٧ی جۆزەردان لەسەر هەینی ٢٨ی جۆزەردان دەکەن کە هێشتا هێچ زانیارییەک لەم بارەوە لە ئارادا نیە.
