بەرپرسانی خۆجێی ویلایەتی بەلخ دەڵێن ئەمڕۆ چوارشەممە 21ی ڕەزبەری 1395ی هەتاوی، بە هۆی تەقینەوەی بۆمبێک لە ولسوالی ـی باژێڕی بەلخ لە ئەفغانستان، لانیکەم ١٤ کەس کوژراون و 28 کەس بریندار بوون.
ڕۆژی کورد: مونیر فەرهاد ئەحمەد، وتەبێژی بەڕێوەبەری ویلایەتی بەلخ بە بی بی سی گوتووە کە ئەو بۆمبە لە تیری کارەبایەکدا داندراوە و لە ڕێگای دوورەوە تەقێندراوەتەوە.
فەرهاد هەروەها گوتووشیەتی کە ئەو تەقینەوەیە کاتێک ئەنجام دراوە کە کەسانیتازێدار لە مزگەوتەکە چوونە دەر.
پێشتر لە بەلخ هیچ هێرشێک نەکراوەتە سەر باوەڕمەندانی شیعە و ئەوە یەکەم جارە لە ولسوالی، هێرشێکی ئەوتۆ هاتۆتە ئاراوە.
بەشێک لە شایەت حاڵان بە هەواڵنێری بی بی سی یان ڕاگەیاندوە کە ئەوان سەرەتا بینیویانە کە بۆمبێکی دەستی هاویژراوەتە ناو خەڵکەکە و دواتر دەنگی تەقینەوە هاتووە و بەدوایئەودا دەنگی تەقینەوەیەکی بەربڵاو بیستراوە.
هەروەها شەوی ڕابردوو لە باژێڕی کابول، هێرش کراوەتە سەر باوەڕمەندان و تازێدارانی شیعە لە ڕێوڕەسمی تاسووعا دا کە لە ئەنجامدا 16 کەس کوژراون و 56 کەس بریندار بوون.
بەپێی هەواڵی ڕۆیتێرز، ڕێکخراوی تیرۆریستیی داعش، بەرپرسیارەتیی تەقینەوەکەی دۆینێ شەوی وەئەستۆ گرتووە.
