ڕۆژی کورد: سەرەڕای ئەوەی کە ڕاگەیێنەکانی سەرە بە دژبەرانی حکومەتی بەشار ئەسەد باس لە کوژرانی ٣ چەکداری ئێران و ٨ چەکداری حیزبووڵا لە شەڕی حەلەبدا دەکەن، ئێران ناوی ٢ کەس لە کوژراوانی خۆی لە شەڕی حەلەب ئاشکرا کرد.
محەممەد مرادی، ستوان سێیەم و خەڵکی شاری شەهرڕەزا و مەحمود نەریمانی پاسدارێکی خەڵکی پارێزگای ئەلبورز، دوو چەکداری ئێرانین کە ڕێکەوتی ١٠ی گەلاوێژ لە پارێزگای “حەما” لە شەڕ لەگەڵ دژبەرانی ڕژیمی ئەسەد، کوژراون.
هەواڵدەریی فارس لە زاری بەرپرسی گشتیی گرووپی تۆپخانەی 22ی ئەرتەشی ئێران لە شارستانی شەهرڕەزا، هەواڵی کوژرانی ستوان سێیەم، محەممەد مرادی ڕاگەیاند کە بۆ ئەرک پێ ئەسپێردراویەکی 45 ڕۆژ لەگەڵ 8 کەسی تر چووبوو بۆ سووریە و ٣ ڕۆژ بەر لە کۆتایی هاتنی ئەرکەکەی، لە شەڕی حەلەب کوژراوە.
ئەوە ٧ـەمین کەس لە ئەفسەرانی تۆپخانەی ڕژیمە کە لە شەڕی پاراستنی ئەسەد لە سووریەدا دەکوژرێ.
ڕاگەیێنەکانی دژبەرانی ئەسەد هەروەها هەواڵی کوژرانی فەرماندەیەکی حیزبووڵا و 8 کەسی تر لە ئەندامانی حیزبووڵایان هاوکاتی لەگەڵ هەواڵی کوژرانی ٣ ئەندامی سپای تیرۆریستیی پاسدران لە شەڕی دەورووبەری حەلەب، ڕاگەیاندووە.
ڕێکەوتی ٢٣ی خاکەلیوەی ١٣٩٥ی هەتاوی هەواڵی کوژرانی٥ ئەفسەر لە کڵاوکەسکەکانی ئەرتەشی ڕێژیمی ئێران، لە سووریەدا بڵاو بۆوە.
موحسێن قوتاسلوو، ستوان دووەم و ئەندامی تەکاوەرانی تیپی ٦٥ی هێزی تایبەتی هەوابۆردی ئەرتەشی ئێران و خەڵکی پاکدەشتی سەر بە شاری تاران بووە کە یەکەم ئەندامی ئەرتەشی ئێرانەبوو کە لە سووریە و لە شەڕ لەگەڵ گرووپە ئیسلامییەکانی دژبەری ئەسەد کوژراوە.
تەکاوەرانی تیپی ٦٥ی هێزی تایبەتی هەوابۆردی ئەرتەشی ئێران بە “کڵاو کەسکەکان”یش بەناوبانگ و ناسراون.
