بەپێی هەواڵی گەیشتوو بە ناوەندی “ڕۆژی کورد” لە ناوچەی مەرگەوەر، سۆما، ئەنزل، برادۆست و تەرگەورەی شاری ورمێ، کۆماری ئیسلامی بە فەرمی بانگهێشتی بەسیجەکانی ناوچەی کردووە تا لە کۆبوونەوەیەکدا بە مەبەستی بەشداری گشتگیری خەڵک لە هەڵبژاردن، کۆ ببنەوە.
ئەو کۆبوونەوەیە کە ڕێکەوتی ٢٤ی ڕێبەندان واتا سبەی شەممە، لە بەشی سیلوانای ورمێ بەرێوە دەچێ بە مەبەستی هاندانی خەڵکە بۆ بەشداری گشتگیر لە هەڵبژاردنی خولی دەیەمدا.
بڕیارە لەو کۆبوونەوەدا هەندێک خاڵ و تێبینی بدرێ بە بەسیجەکانی ناوچە تا بۆ هاندانی خەڵک ڕەچاوی بکەن.
شایانی ئاماژەیە کە هەرچەند ئەو کۆبوونەوە بە ناوی عابد فەتاحی کراوە بەڵام ڕۆژی کورد زانیوێتی کە لەلایەن بەسیجی ناوچە و شۆڕای ناوچەی سیلوانا و شارەداری ئەو شارەوە کراوە و بە ئانقەست حابد فەتاحی هەڵبژێردراوە چونکە بە ناو نوێنەری کوردە.
شایانی ئاماژەیە کە بەتایبەتی دوای ڕەدی سەلاحیەتی ٥٥% کاندیدەکان و هەروەها ڕەدی سەلاحیەتی گشتگری بە ناو ڕیفۆرمخوازەکان، بانگەشە بۆ بەشداری لە ناو خەڵکدا یەکجار کەم بۆتەوە.
هەروەها بەشێک لە مامۆستایانی زانکۆ و پارێزەرانی ئێران، بە فەرمی ولە نامەیەکی سەرئاواڵەدا داوایان لە ڕوحانی کرد کە هەڵبژاردن ڕابگرێت. ئەوان هۆکاری ئەو داواکارییەیان بۆ یەک دەست ىوونی هەڵبژاردن و بەشدار نەبوونی جیا بیران گەڕاندەوە.
پێویست بە ئاماژەیە کە تا ئێستا زۆربەی هەرە زۆری حیزبەکانی خۆرهەڵاتی کوردستان ئەو هەڵبژاردنەیان تەحریم کردووە و پێدەچێت لە ڕۆژانی داهاتوودا هەر هەموویان بایکۆتی بکەن.
