ڕۆژی کورد: دوابەدوای هاتنە ئارای گەمارۆی نوێ لەسەر ئێران لە لایەن ئەمریکاوە، مایکێل فلین، ئەمڕۆ هەینی ١٥ی ڕێبەندانی ١٣٩٥ی هەتاوی، ڕاگەیێندراوێکی بڵاو کردەوە کە تێیدا وێڕای ئاماژەکردن بەو گەمارۆیانە کە بەهۆی تاقیکارییە موشەکییە بالستیکییەکان لەلایەن ئێرانەوە، هاتوونەتە ئاراوە، دەڵێ، دەوڵەتی ئەمریکا ناتوانێ چیتر ئەو کردەوە هەڕەشەئامێزانەی ئێران کە هەڕەشە لە بەرژەوەندییەکانی ئەمریکا دەکەن، قەبووڵ بکات.
فلین لەو راگەیێندراوەدا هەروەها دەڵێ: “کۆمەڵگای ناونەتەوەیی تا ئێستا لەڕادەبەدەر، کردارەکانی ئێرانی قەبووڵ کردووە و ئیتر کاتی چاوپۆشین لەو کردەوە دوژمنکارانانەی ئێران بەسەرچووە.
ڕاوێژکاری ئاسایشی نەتەوەیی ترامپ هەروەها دەڵێ: “کۆماری ئیسلامیی ئێران، گرنگترین پشتیوانی تیرۆریسمە و لە پشتی هەموو ئەو کردەوە توندوتیژانەیە کە خۆرهەڵاتی ناڤینیان ناجێگیر کردووە و بەشدارییان تێدا دەکا. بەپێی ڕێکەوتنێک کە دەوڵەتی ئۆباما لەگەڵ ئێران ئەنجامی داوە و بە قازانجی ئێران بووە، ئەو کردەوانە هەروا بەردەوامن، گەمارۆکان ئەمڕۆ ئەو کردەوانەی ئێرانیان کردە ئامانج.”
مایکێل فلین باس لە زێدەبوونی هێرشەکانی ئێران لە ناوچە دەکا و دەڵێ: “لەو کاتەوە کە ڕێکەوتنی بەرجام کرا، کردەەوە هێرشکەران و نایاساییەکانی ئێران زێدە بوون، یەکێک لەو کردەوانە دەستبەسەرکردنی مەلوانە ئەمریکاییەکان و تاقیکاریی موشەکییەکانی ئێرانن کە ئەنجامی بەرجامن”.
