سەربەخۆبوون، كاركردنە بۆ بوونیادنانی گەل و تاكێكی وشیار، كە لە هەموو چەمكەكانی ژیاندا، ناسنامەی نیشتمانی و كولتووریی خۆی ناسب بكات. ڕسكانی كۆمەڵگایەكە، كە هەموو فۆرمەكانی چەوسانەوە، لە هەموو ئاستەكاندا ڕەتكاتەوە. خەلق و ئافراندنی مرۆڤێكە، هێزی پارێزگاریی ئازادی و دابین كردنی سەربەخۆیی و فرەچەشنی و هەڵكردن و ئاسانگیری هەبێت. دروست كردنی گەل و نیشتمانێكە، لەسەر پاراستنی كەرامەتی مرۆڤ و مل نەدان بۆ باڵادەستیی چەوسێنەرانەی هیچ گەل و هێزێكی باڵادەست، لانیكەم لە ڕووی فكری و لە ڕەهەندە ئەقڵانی و لۆژیكیەكەیدا. جووڵانی ویژدانی گشتیی گەل و تاكێكە كە هەست بەبوونی خۆی وەك كاراكتەرێكی چالاكی مێژوو بكات. بەرهەمهێنانی بوون و شارستانیەتێكە لە مێژوودا مامەڵەی ڕێبواری لەگەڵ نەكەن، نەسڕێتەوە.
سەربەخۆیی، خوڵقان و ڕسكان و ئامادەكردنی ئاوەها گەل و كولتوورێكە. بڕیار نییە تەنیا بریتی بێت، لە /جووڵەیەكی میكانیكی/ بۆ سازدانی شتێک بەناو دەوڵەت. ڕاستە ئەگەر ئاوەها كۆمەڵ و تاكێكت هەبوو، سەربەخۆیی هەمیشە گونجاوە و دەستت پێی ڕادەگات، وەگەرنە دەبێتە”مەحاڵێكی مێژوویی”، وەك ئەوەی تا ئێستا لە مێژووی كورددا بووە.
هێزی سەربەخۆییخواز، هێزی بوونیات نانی نەتەوەی مۆدیڕنە، خەڵقی وشیار و ویستی هاوشاری و هاووڵاتیە. بۆ گەل و كۆمەڵگایەكی وەها، هیچ هێز و دەسەڵاتێ ناتوانێ دیموكراتیك و دادوەر و خەڵكی بێت، ئەگەر هێزێكی سەربەخۆییخواز نەبێت.
سەربەخۆییخوازی شەڕی نابەرابەر و سەپانی ویستێكی ئێرادەگەرایانە نیە. ئەقڵانیەت و وشیاری و دادگەری و ویستی جەماوەرە، لە چركەساتی گونجاوی خۆیدا . یان دەبێت لە چەوسانەوە و دیكتاتۆریەتی سیاسی و چینایەتی ئازاد بیت، یان لە هەموو فۆرمەكانی چەوسانەوە .
هیچ بزووتنەوە و شۆڕش و هێزێكی كوردی (مانا پەیداناكات و نابێتە بوونێكی مێژوویی) ئەگەر كۆی فۆرمەكانی چەوسانەوە هەڵنەتەكێنێ. كورد هەرگیز بەتەواوی لە ئەو فۆرمانە ڕزگاری نابێت و بوونی مانا هەڵگرنییە، ئەگەر سەربەخۆ نەبێت. بوونی كورد تائێستاش بوونێكی ڕێبوارانەیە و مانەوەی بەسراوە بە وەدیهاتنی سەربەخۆییەوە لە چركەساتی گونجاوی خۆیدا. هەموو هەوڵ و جووڵەیەكیش دەبێ لە ئاراستەی ئافراندنی ئاوەها بوونێكا بێت، وەگەرنەسەرئەنجامی بێ دەرئەنجامییە.
