کۆڵبەرێکی کورد لە ناوچەی سنوورییەکانی شلێر و شاری بانە لەلایەن هێزە ئینتزامییەکانەوە دراوەتە بەر دەستڕێژ گوللە و بەو هۆیەوە بریندا بووە.
لەماوەی چەند رۆژی رابردوودا، کۆڵبەرێکی کورد بە ناوی “عەلی وەیسی” لە ناوچەی سنووری شلێر، لەلایەن هێزە ئینتزامییەکانی ئێرانەوە تەقەی لێکراوە و فیشەک بەر پشتی کەوتووە و بە توندی بریندار بووە.
دەوترێت ئەم هاووڵاتییە کوردە تەمەنی ٣٤ ساڵە و خاوەنی ٢ منداڵە و بارودۆخی تەندروستی ناجێگیرە و هێزە ئینتزامییەکان بە برینداریی دەستبەسەر و پاش چەند کاتژمێرێک رەوانەی ناوەندە پزشکییەکانیان کردووە.
هەروەها، هێزەکانی رێژیمی ئێران دەستیان بە سەر کەلوپەلی عەلی وەیسیدا داگرتووە.
هاووڵاتییانی کوردی دانیشتووی ناوچە سنوورییەکان بە هۆی نەبوونی پیشەی شیاو و بێکاری لە رووی ناچارییەوە روو دەکەنە کاری مەترسیداری کۆڵبەری و بەداوی بەدەستهێنانی بژیوی ژیانیانن.
ئەو کۆڵبەرانە لە زۆربەی حاڵەتەکاندا دەکەونە بەر تەقەی راستەوخۆی هێزەکانی رێژیمی ئێران و بەو هۆیەوە کوژراو و بریندار دەبن.
بە پشت بەستن بە ئامارە تۆمار کراوەکان، لەسەرەتای ئەمساڵەوە هەتا ئێستا، ٢٤ کۆڵبەری کورد لەلایەن هێزەکانی رێژیمی ئیسلامی ئێرانەوە دراونەتە بەر دەستڕێژی گوللە و لە کۆی گشتی ئەو رێژەیە ١٢ کۆڵبەر کوژراون و ١٢کەسی دیکەش بریندار کراون.
