بەپێی زانیارییەکانی ڕۆژی کورد، لە دووهەمین فێستیڤاڵی نێونەتەوەیی فیلمی ” ئەتلەس” کە لە وڵاتی ئەمریکا، لە ڕێکەوتی ١٥ هەتا ٣١ی ژانوییە بەڕێوە دەچێت، سێ فیلمی دەرهێنەرێکی کوردی خۆرهەڵاتی کوردستان، نمایش دەکرێت.
سێ کورتە فیلمی “یەک هیچ”، ” گەڵاکانی پاییز” و” ماسی” ئەو سێ فیلمەی “سامان حوسێنپوور”، دەرهێنەری سینماکاری کوردی خەڵکی شاری سەقزن کە لە دووهەمێن فێستیڤاڵی نێونەتەوەیی “ئەتلەس” لە وڵاتی ئەمریکا بەشدار دەبێت و پیشان دەدرێت.
سامان حوسێنپوور، هەتا ئێستا سێ کورتە فیلمی بەرهەم هێناوە و لە بەشە جۆراوجۆرەکانی دروستکردنی زیاتر لە ٢٠ کورتە فیلمی تردا، هاریکار و بەشدار بووە.
ناوبراو هەتاکوو ئێستا براوەیدەیان خەڵاتی لە ئاستای پارێزگاکان، ئێران و لە ئاستی نێونەتەوەیی لە بەشی چیروک نووسین و دروستکردنی فیلم دا بووە.
سامان حوسینپوور لەدایکبووی ساڵی ١٣٧١ی هەتاویە لە شاری سەقز، و لە تەمەنی ١٤ساڵییەوە دەستی بە کاری شانۆیی کردووە و هەر لەو تەمەنەشدا چالاکییەکانی خۆی لە بواری سینماییەوە دەستپێکردووە.
