بەپێی زانیارییەکانی ڕۆژی کورد، حوکمی لە داردانی هێمن هەورامی، مێرمنداڵی کوردی خەڵکی سنە کە پێشتر سزای سێدارەی بۆ دەرچووبوو لە لایەن دەزگای دادوەری ئێرانەوە چەسپا.
هێمن هەورامی لە دایک بووی مانگی گوڵانی ساڵی ١٣٧٣ی هەتاویە و ساڵی ١٣٩٠ لە شەڕ وپێکدادانێک کە لە شاری سنە ڕوویدا دەست بەسەر کراوە و تۆمەتی مرۆڤ کوژی خراوەتە پاڵ.
هێمن لە کاتی دەستبەسەر کرانەکەیدا تەمەنی ١٧ ساڵان و لە ژێر تەمەنی یاسایی واتا ١٨ ساڵی بووە.
بە پێی مادەی ٩١ لە یاسای سزادانی ئیسلامی، هەر کات کەسێک لە کاتی ئەنجام دانی تاوان، تەمەنی کەمتر لە ١٨ ساڵ بێ و لە هەمان کاتدا لە گەورەی و چۆنی و چەندی تاوانەکەی تێنەگەیشتبێ یان گومان لە تەواوی ئەقڵیی کەسەکەدا هەبێ، ئەوا سزای (تۆڵەی بەرانبەر)ی بەسەردا ناسەپێ.
شایانی باسە کە پزشکیی یاسایی بۆ ڕوون بوونەوەی تێگەیشتوویی و کامڵ بوونی ئەقڵی هێمن هەورامی نەژاد، هیچ تاقیکارییەکی زانستی ئەنجام نەداوە و تەنیا یەک دوو پرسیاری هەڕەمەکیان لێ کردووە.
سزای لەدار دانی ئەو مێرمنداڵە کوردە دوابەدوای دەرچوونی ئیزنی بەرپرسی دەزگای دادوەری و لە ئەگەری لێ نەبووردنی بنەماڵەی کەسە کوژراوەکە، بەڕێوە دەچێ.
هەنووکە هێمن هەورامی لە زیندانی سنە دەست بەسەرە.
