“حاجی كەریم مارف عەزیز” تەمەن 74 ساڵ کە ماوەی 18 ساڵە لە بەندیخانەکانی کۆماری ی ئێران دایە، ماوەی دوو رۆژە بە نیشانەی ناڕەزایەتی بە دۆخی نالەباری زیندان، مانی لە خواردن گرتووە.
ئەو هاووڵاتییە کوردە کە هاوکات چەندین نەشتەرگەریی بۆ کراوە و باری تەندروستیشی تەواو نییە، هەتا ئێستە چەندین جار داوای مەرەخسی و گەڕاندنەوە بۆ باشووری کوردستانی کردووە کە داواکارییەکەی بێ وڵام مانەتەوە.
“حاجی كەریم مارف عەزیز” تەمەن 74 ساڵ لەلایەن دەزگا دادوەرییەكانی كۆماری ئیسلامیی ئێرانەوە بە زیندانی هەتاهەتایی مەحكووم كراوە و ماوەی 18 ساڵە لە بەندیخانە دایە.
بەپێی ئەو هەواڵانەی لەلایەن چالاکوانانی مافی مرۆڤەوە بڵاو کراونەتەوە، حاجی كەریم کە خەڵكی شاری سلێمانیەیە بەهۆی دۆخی خراپی زیندانی رەجایی شاری کەرەج و ئازار و ئەشكەنجەوە تووشی چەندین نەخۆشی بووە.
ئەو هاووڵاتییە کوردە مانگی ئۆكتوبری 2014 دوو نەشتەرگەری دڵ و لاقی بۆ كراوە و دوای پێنج رۆژ لە نەشتەرگەرییەکەی دەگەڕێندرێتەوە بۆ زیندانی رەجایی شاری كەرەج .
دەزگا دادوەری و ئەمنییەكانی ئێران ئەو هاووڵاتییە كوردەیان بە تۆمەتی چالاکیی سیاسیی لەناو ئێران دەستگیر و بە زیندانی هەتاهەتایی حوكمیان داوە.
