تاوتوێكردنی ڕاسانه‌وه‌ و لێك گرێدانه‌وه‌ی خه‌باتی شار و شاخ وتووێژ له‌ گه‌ڵ ڕۆسته‌م جه‌هانگیری

0
317

به‌ مه‌به‌ستی تاوتوێكردنی ڕاسانه‌وه‌ و لێك گرێدانه‌وه‌ی خه‌باتی شار و شاخ ڕۆژی كورد به‌ پێویستی زانی وتووێژێك له‌ گه‌ڵ ڕۆسته‌م جه‌هانگیری ئه‌ندامی ده‌فته‌ری سیاسیی و له‌ ئه‌ندامانی شووڕای نیزامیی حیزبی دێموكراتی كوردستانی ئێران پێك بێنێ كه‌ لێره‌ دا سه‌رنجی خوێنه‌رانی ڕۆژی كورد بۆ ئه‌م وتووێژه‌ ڕاده‌كێشین 

ڕۆژی کورد: بەرگری چەکداری ، ڕاساناوەی نوێ و چەند دەستەواژەیەکی دیکە ڕەوایەت لە ئەنجامدانی کۆمەلێک چالاکیی هێزی پێشمەرگەی حیزبی دیمۆکراتی کوردستانی ئێران دەکا کە ڕاگەیەنەرە گشتیە ناوچەیی و نێو دەوڵەتیەکان بۆ ماوەیەکی بەرفراوانە  باس و ڕاوێژی لە سەر دەکەن ، ڕێبەرایەتیی ئەو حیزبە لە ژێر پارامیتری ئاوێتەکردنەوەی خەباتی شاخ و شار لە چەند مانگی ڕابردووە بە کردەوە دەستیان بە چالاکیەکی جیاوازتر لە ساڵانی پێشووتر کردووە ،  ئەو بزوتنەوە، بەرگرییە چەکدارییە بە مه‌فهوومی پشتگیری نافەرمانی مەدەنی لە خۆرهەڵاتی کوردستان خۆی بە ڕەوایی کرد … ئەوە هاوکات بوو لە گەڵ یەکەم مانۆڕی سیاسی تەشکیلاتیی حدکا کە لە ٢٢ی پوشپەری ٢٧١٦ی کوردی گاردی خۆی گرت.

 ئێوە پێتان وابوو ناردنەوەی هێزی پیشمەرگە توانی کارتێکەری تا ئەو ڕادەیە بە تایبەتی لە سەر ساڵرۆژی تیرۆری دوکتور قاسملوو دا هەبێ ؟ بە واتایەکی دیکە حزووری هێزی پێشمەرگەتان توانی پەیوەندی لە گەڵ ڕێکخستنەکانی حیزب بەو ڕادەیە قایم بکا کە ئەوساڵ دەنگدانەوەی ئەو حەرەکەتەی پڕ ڕەنگ کرد ؟

ڕۆسته‌م جه‌هانگیری
ڕۆسته‌م جه‌هانگیری

جه‌هانگیری : هەر وەک ئاگادارن حیزبى دێمۆکراتى کوردستانى ئێران بۆ ماوەى نزیک بە بیست ساڵ خەباتى چەکدارى راگرت، خەباتى سیاسى و مەدەنى و دیپلوماسى و ڕاگەیاندن لە ناوخۆ و باشوورى کوردستان(هەرێمى کوردستان) و لە دەرەوەى وڵات بەرێوە دەبرد، بەڵام ئەوەى راست بێت لە ناوخۆ دەرەتانى هیچ خەباتێک لە گۆڕێ دا نەبووە و نابێ.

کۆمارى ئیسلامى هیچ ئاڵوگۆڕێک قەبول ناکات بۆیە نەدەکرا لەوە زیاتر چاوەڕوانى بین کە هەم شۆرش و حیزب و خەباتکاران لەو زیاتر بەرەو کزى و لاوازى ترسناک بڕوات. لە لایەکى دیکەوە ئەو ئاڵوگوڕەى ناوچە و ڕۆژهەڵاتى ناوەراست بە خووە بینیوە، دەبێ گەلى کورد لە رۆژهەڵاتى کوردستان کارێک یا حەرەکەتێک لە خۆى نیشان بدا، ناکرێت رۆژهەڵات لەوە زیاتر فیدا بکرێت و ئەو جار نادیدەی بگرن و ئەوەش بە زەعفى کوردى رۆژهه‌ڵات دابنێن و کۆمارى ئیسلامیش بە زلهێزى ناوچە و دوستى گەلى کورد لە قەلەم بدەن. رۆژهەڵاتى کوردستان لە سیاسەتى هێندیک لایەنى سیاسى پارچەکانى دیکەى کوردستان سڕا بووە و باسى لێوە نەدەکرا.

ئێمە لە رێبەرى حیزب هەموو لایەنەکانى مەسەلەى خەبات لە کوردستانى ئێرانمان لێک داوەتەوە و ئامادەى هەموو نرخێکین، ئێمە تەنیا و تەنیا لە سەر حیسابى خۆمان و گەلى خۆمان لە کوردستان دا خەباتمان زیاتر لە جاران دەمانهەوێ پەرە پێ بدەین، پێم خۆشە یەک شت وەبیر خوێنەرانى بەڕێزى ئێوە بێنمەوە کە ئەگەر پشتیوانى گەلى خۆمان نەبا نەماندەتوانى یەک هەنگاو بەرەو پێش بروین. گەلى کورد لە رۆژهەڵات خەبات و بەرخۆدانى لە ئێمە دەوێت و ئەوانیش لە پشتمان راوەستاون بە هەموو ئیمکاناتی خۆیان رێنوێنى و یارمەتیمان دەدن بە خوێن و بە ماڵ، ئامادەى هەموو فیداکارییەکن. بویە حیزب دەیهەوێ خەباتى شاخ و شار پێکەوە ببەسترێت و لە یەک سەنگەردا بەڵام بە تاکتیکی جیاواز خەبات لە دژى کۆمارى ئیسلامى تا بەدیهێنانى ئامانجى گەلەکەمان لە رۆژهەڵاتى کوردستان یانى خەباتى شاخ و خەباتى مەدەنى لە رێگاى رێکخراوە مەدەنییەکان پەرە پێ بدەین ئینجا دەکرێ ئەو رێکخراوە سەربەخۆش بێت، کە هێزى پێشمەرگە لە شاخ پشتیوانیان دەبێ.

نایشارمەوە کاتێک کە دەنگى چەکى پێشمەرگە هات، کۆمەڵگا گەشایەوەو هاتە مەیدان و ئەوەی هەرچی لە توانای دایە دەیکا. بازاڕی و ئیداری و رێکخراوە سنفییەکانی دیکەو وەک رۆژنامەنووس و کرێکاران و رۆشنبیرو ژنان و لاوان و ئائینى، هەر یەکەو بە شێوەی خۆی سەنگەری خەباتی خۆیان گرتووە و خەباتى خۆیان درێژە پێدەدەن. دوژمن لەوە تۆقیوە بۆیە بە هەڕشەو گوڕەشە و گرتن و بێسەروشوێن کردن و نیشاندانی وێنەی شێوێندراوى سەربەرزی شەهیدان کە بێڕیزی بە تەرمیان کرابوو، نیشانى خەڵک دان بۆ چاو ترسێن کردنى خەڵک، رێژیم ئێستا لە سێبەرى خۆشی بە شکە و دەترسێ.

بەڵێ ئێمە پێشبینی ئەوەمان کردبوو ئەگەر لە مەیداندا بین خەڵک لە پشتمان دەبن. لە رۆژی شەهیدبوونی رێبەری مەزن د.قاسملوودا گەل نیشانی دا کە چۆن لە سەختترین بارودۆخدا رۆڵە شۆڕشگێڕەکانی بە تەنیا بەجێ نایەڵێ و لە سەر مافە رەواکانى پێداگر و پشت ئەستووە و بە رێژیم دەڵێ نەخیر.

رۆژی کورد: کومیسیۆنی سیاسی نیزامی حدکا و کومیسیۆنی تەشکیلاتی ئەو حیزبە دوو ئۆرگانی پێکەوە گرێدراوی عەمەلی کردنی گەشە پیدانی خەباتی شاخ و شەقامن وێدەچی پێشتر لە لایان ئەو دوو ئۆرگانەوە هاوئاهەنگی زیاتر کرابێ کە دەسکەوتی نافەرمانی مەدەنی لە بۆنەی تیرۆری شەهید قاسملوو ئەو ساڵ وەک راگەیەنەرە گشتیەکان باسیان لێ کرد پڕ رەنگتر بوو ئایا حزووری هێزی پێشمەرگە بۆ پەیوەندی گرتن بە شانە رێکخستنەکانی نەهێنی بوو تا ئەو نافەرمانیە باشتر سازمان بدەن  یان زیاتر حزوری سیاسی  و تەبلیغی بوو ؟

جه‌هانگیری : ئێمە حیزبین، زاتەن هەمانگی لە نێوان ئۆرگانەکانی حیزبیدا هەیە، بڕیارات و دەستووری کار لە ئاستی رێبەری لەسەرێ دەدرێت و شۆڕ دەبێتەوە بۆ نێو ئۆرگانەکانی پێوەندیدار و ئەوانیش دادەنیشن و تاوتوێی مەسەلەکە دەکەن. هێزی کاری هەر لایەکی بە پێی ئوسوولی کاری خۆیان دەکەونە بواری جێبەجێ کردنەوە و دەبنە پشتیوانی یەکتر. هێزی تەشکیلات و هێزی پێشمەرگە وەک دەست و پێی جەستەی یەک ئینسانە. بۆیە هەردوو هێزی حیزب زۆر چاک کاری خۆیان دەکەن، بەڵام بە موتالعە و هەڵسەنگاندن دەبنە موکەملى یەکتر.

رۆژی کورد: ئێوە دەتانتوانی لە بۆنەی ٢٢ی پووشپەردا هێزی پیشمەرگەتان لە ناو شارەکاندا زیاتر بکەن تا لە ئەگەری هێرشی نیزامی هێزەکانی کۆماری ئیسلامی هێزی پێشمەرگە دیفاع لە نافەرمانی مەدەنی بکا ئایا هێزی پێشمەرگەی حیزب بۆ ئەوە رێکخرابوو  لە ئەگەرێکی ئەوتۆدا لە پاڵ خەباتی مەدەنی بەرگری چەکداری بکا؟

جه‌هانگیری : لەوەتەی دوژمنی کورد هەیە کوردستانی بۆ بۆتە مۆته‌کەى مەرگ. ئەلحەق نەتەوەی کوردیش ئەگەر چی بە درێژایی مێژوو خەباتی کردووە بەڵام بە ئازادی کامڵی خۆی نەگەیشتووە. بەڵام کورد نەیهشتووە لە سەر کورسى حوکمرانى خۆیان بۆ یەک رۆژیش بە راحەت دابنشن، هەمیشە کورد و کوردستان و رۆڵە خەباتکارانى لە بیر و هزریان دابووە کە چۆن ئەو خەباتکارانە لە ناو بەرن و چوون پیلانیان بە دژیان بەریوە بەرن، ئەوان قەت بە ئاواتى خۆیان نەگەیشتن و ئەوە کورد و کوردستان هەر ماون تەسلیم نەبوون و سەرهەڵدان و خەبات بۆ رزگارى و دێموکراسى و مافى نەتەوایەتى لە خەباتدان هەروا درێژەی هەیە.
هێزەکانی دوژمن ئێستا نەتەنیا شارەکانی کوردستان بگرە گوند و چیاکانی کوردستان و خاڵە سنوورییەکانی بە دروست کردنی پایگاو دانانی دووربینی چاوەدێری و تەنانەت بە تێلبەندیش تەنیوەتەوە بەڵام نەیانتوانیوە پێش بە خەباتکارانى گەلی کورد بگرن. ئێستا بە ئاسانی دەتوانین بڵێین کە بە هەزاران هێزی جۆراوجۆری چەکداری خۆی پۆشتەو پەرداخ بە پێشکەوتووترین جۆری چەک و تەقەمەنى لە کوردستان جێگیر کردووە. بەڵام نە پێشمەرگەو نە کوردستان  لە یەکتر دوور نەکەوتوون. بۆ نمونە بەرخودانى رۆڵەکانى گەل و حیزبى دێموکراتى کوردستانى ئێران زەربەی جەرگبڕی  لە دوژمن وەشاند، کە خۆى بە هێزى لە شکان نەهاتووى رۆژهەڵاتی ناڤین دەزانى. وڵاتانی ناوچە بە تەواوی ترسیان لێنیشتبوو، پێشمەرگەی حیزبی دێموکراتی کوردستانی ئێران هەیبەتی کۆماری ئیسلامی تێک شکاند و نیشانیان دا کە لە بەرانبەر هێزی گەل هیچ هێزێک توانای نیە خۆی عەلەم بکا. سەدان کەسیان لە نێو جەرگەی شار و گوندەکانی کوردستان لێ کوشت و بریندار کرد.

رۆژی کورد:  زیاتر میلیتاریزە بوونی شارەکانی رۆژهەڵاتی کوردستان لە ٢٢ ی پووشپەر دا ئەوەی دەسەلماند کە دەسەڵات حیسابێکی جیاوازتری بۆ هێزی پێشمەرگە کردبێ ئەوە دەتوانێ تایبەتیمەندییەکی جیاوازتر بێ لە بەراوەرد لە گەڵ بزوتنەوە مەدەنیەکانی ساڵانی پیشوو دا؟

جه‌هانگیری : لە خەباتی شاردا ئێستا ئیدی لاوان رۆڵی سەرەکی دەبینن. ترسیان لە کۆماری ئیسلامی نەماوە و لە لە هەموو بوارەکاندا لە مەیدان دان. هێزە چەکدارە کوردەکانی رێژیم کە بە جاش ناسراون ئێستا ئیدی بە دڵ شەڕی پێشمەرگە ناکەن. دەزانن بۆ!؟ لەبەر ئەوەی کە کچ و کوڕی ئەوانیش لە باوک و کەسی خۆیان  قەبووڵ ناکەن کە لە خزمەت دوژمنی نەتەوەی خۆیاندا بن. بۆیە کاریگەرییەکی زۆر باشی داناوە. ئەمن دڵخۆشم بەوەی کە ئێستا ئیدی ئەوەی کە پێی دەڵێن خۆناسینی نەتەوەیى یا خودشناسی ملی، لە ناو گەلی ئێمەدا بە تەواوی چەکەرەی کردووە. ئیدی بەو ئاسانیە رۆڵەکانی کورد تەسلیمی خواستی دوژمن نابن. خەباتى بەرفرە لە ناو تێکڕاى چین وتوێژەکانى کۆمەڵگاى کورددا بە شێوەى جوراوجور دەستى پێ کردووە و بەردەوامە.

دوژمن یەک رێگای هەیە، یان دەبێ خواستی گەلی کورد کە ئازادی و سەربەستی نەتەوەیی‌یە قەبووڵ بکا، یان بە زەبر لە کوردستان دەردەکرێ.

رۆژی کورد :بەرێز رۆستەم جەهانگیری ئەندامی دەفتەری سیاسی و بەرپرسی کۆمیسیۆنی سیاسی نیزامی حدکا سپاس بۆ کات و راتان

جه‌هانگیری : “ئەمنیش زۆر سپاسى ئێوە خەباتکارانى راگەیاندنى ئازادى کورد دەکەم، هیوادارم هەروا بە گڕتر و خۆراگرتر لەو سەنگەرەى خۆتان هەم یار و یاوەرى خەباتکارانى ناوخۆیى وڵات بن و دەنگى بە هێز و راستگۆی پێشمەرگە بن. تکام وایە زۆر جار راگەیاندنى ئازاد لە کاتى شەڕدا زوو هەواڵ بڵاو دەکەنەوە کە دوایى راست نابێ کە ئەوە دەبێتە هۆى بێ متمانەیى لە نێو بینەر و بیسەرى خۆى کە ئەوەش باش نییە، یان نەخیر دەبێتە هۆى ئەوە کە هێندێک زانیارى نهێنى لە مەیدانى شەڕدا ئاشکرا دەبێ و بە سود نیە”.

سه‌رنج و كۆمێنت

كۆمێنت