ئاگربەستێکی ٨ کاتژمێری لە حەلەب ڕاگەیێندرا

0
266

بەپێی هەواڵی هەواڵدەریی فەڕانسە، وەزیری بەرگریی ڕووسیە ڕایگەیاند کە بە مەبەستی بردنە دەری خەڵکی مەدەنی و هەروەها گەیاندنی یارمەتیی مرۆڤی، لە حەلەب، ئاگربەستێکی ٨ کاتژمێرەیان ڕاگەیاندووە.

ڕۆژی کورد: هەرچەند تا ئێستا داوا چەندپاتەکانی ڕێکخراوی نەتەوە یەکگرتووەکان و هەروەها کۆبوونەوە و دانیشتنی بەردەوامی ئەمریکا و ڕووسیە بە مەبەستی ڕاگرتنی شەڕ و پێکهێنانی ئاگربەست، بە ئەنجام نەگەیشتبوو، ئەمڕۆ سێ شەممە 27ی ڕەزبەری 1395ی هەتاوی، ڕووسیە و ڕژیمی ئەسەد، ڕایانگەیاند کە بۆ ماوەی ٨ کاتژمێر، شەڕ ڕادەگیرێ و ئاگربەستە.

سێرگی شویگو، وەزیری بەرگریی ڕووسیە وێڕای ڕاگەیاندنی ئەو هەواڵە گوتی: “ئەرتەشی ڕووسیە و هێزەکانی ئەسەد، کاتژمێر ٧ بە کاتی گرینویچ، بۆمبارانی سەر باژێڕی حەلەب ڕادەگرن”.

لە ڕاگەیێندراوەکەی وەزارەتی بەرگریی ڕووسیەدا هەروەها هاتووە کە بۆ بردنە دەری خەڵکی مەدەنی لە حەلەب، دوو ڕێگا دەکەنەوە و لەو ڕێکەوتەدا هیچ هێرشێکی سەربازی ئەنجام نادەن.

سێرگی شویگو هەروەگا گوتووشیەتی: “بە مەبەستی ڕاگواستنی خەڵکانی مەدەنی و دەرچوون و ڕۆیشتنی هێزە چەکدارەکان لەو شارەوە بەرەو لای ئدلب، ڕۆژی پێنج شەممە 29ی ڕەزبەرەوە لە کاتژمێر 8 تا 16 بە کاتی سووریە، ئاگربەستێکی تەواو دێتە ئاراوە”.

ڕاگەیاندنی ئەو ئاگربەستە لە حاڵێکدایە کە سەرچاوە هەواڵیە مافی مرۆڤییەکانی سووریە ڕایانگەیاندووە کە ئەژماری قوربانیەکانی هێرشە هەواییەکانی فڕۆکە شەڕکەرە ڕووسیەکان لە ماوەی ٢٤ کاتژمێری ڕابردوودا بۆتە ٥٠ کەس”.

 

سه‌رنج و كۆمێنت

كۆمێنت