ڕۆژی کورد
ڕێنووسی زمانی کوردی، بە هەر دوو جۆری ئارامی و لاتین، تا ئێستەشی لەگەڵدا بێ بەتەواوی ستاندارد نەکراون و ڕەنگ زەردییان بە ڕووەوە دیارە، بەڵام بەشێکی کە ستانداردیش کراوە، بە هۆی نەبوونی مافی خوێندن بە زمانی زگماکی لە سێ پارچەدا و کەمتەرخەمی لەو بارەوە لەلایەن کورد لە کوردستانی باشوور و گرنگی نەدان بە فێرکاریی خوێندن و نووسین بە زمانی کورد لە میدیاکانی ئەو بەشە ئازادە لە کوردستان (کە هیوا دەخوازین لەوە بەدواوە لە میدیا کوردییەکان و بەتایبەتی لە ڕووداو و کوردستان ٢٤، بیرێکی لێ بکرێتەوە و خۆشیان ئەو بەشە لە ڕێنووس و پەتی نووسین ڕەچاو بکەن)، تا ئێستاش نووسەری کورد، لە گۆڕانکارییەکان ئاگادار نیە.
لێرەدا هەوڵ دەدەین قامک بخەینە سەر بەشێک لەو کەمکووڕییانە و لە بابەتی تردا، قامک لەسەر بەشەکانی تر دابنێین و هیوادارین نووسەران و شارەزایان لەو بارەوە یارمەتیی ناوەندی خۆیان واتا ناوەندی ڕۆژی کورد بدەن و بە ناردنی بابەتی لەمبارەوە، ئەو بەشە دەوڵەمەند بکەن.
یەک: نووسینی (وو) لە سەرەتای وشە:
نووسینی (وو) لە سەرەتای وشە، یەکێک لەو هەڵە زەقانەیە کە تا ئێستاش زۆر بەرچاوە بەڵام بەپێی ئەوەی کە (وو) خۆی یەک پیتە و هیچ کاتیش لەسەرەتای وشەدا نایە، نووسینی هەڵەیە و زۆربەی نووسەرانی کورد یان کوردینووسەکان تا ئێستاش ئەو پیتە (واتا وو) لەگەڵ (و) بە هەڵە دەگرن و تێکەڵی دەکەن.
بۆ نموونە: ووشە هەڵە و وشە دروستە.
ووەرە هەڵە و وەرە دروستە.
وورە هەڵە و ورە دروستە.
دوو: نووسینی (ر) لە جیات (ڕ) لە سەرەتای ڕستەدا.
حاشاهەڵنەگرە کە (ر) و (ڕ) دوو پیتی جیاوازن ڕێک وەک (ع) و (غ) و بەکارهێنانی ڕ ـێی قەڵە و کز، هەڵەیەکە کە پێدەچێ لە ع ـێی عەلی و ح ـێی حەسەن ـی فارسەکان یان س ـێی سابوون و بابەتی لەو چەشنە وەرگیرابێ.
لەلایەکی ترەوە دانانی ئیستسنا (جیاوازی) لە ڕێنووسدا یەکێک لە خاڵانەیە کە فێربوونی نووسین و خوێندنەوە بەو زمانە بۆ منداڵان و کەسانی بیانی سەخت و دژوار دەکات و زمانێک ساناتر فێر دەکرێ کە ئیستسنا و جیاوازی کەمتر تێدا بێ. کە ئەوە کێشەی بەشێک لە زمانەکانە بۆ خەڵکانی بیانی کە باسی ئەو بابەتە نیە.
بەوپێیە کە باسی کرا پیتی (ڕ) لە هەر شوێنێک لە وشە بێت و دەبێ وەک خۆی بنووسرێت. هەروەک چۆن ناکرێت لە جیاتی (غ) بنووسین (ق) و بیانوو بێنینەوە کە چون لە فڵان شوێنی وشە هەڵکەوتووە کەواتە دەبێ (غ) بە (ق) بنووسرێ، بە هەمان شێوە ناکرێ بیانوویەک بۆ نووسینی (ر) لە جیاتی (ڕ) لە سەرەتای وشە بێنینەوە و باش و دروست ئەوەیە کە وەک خۆی بینووسینەوە.
بۆ نموونە
رەسوو هەڵە و ڕەسوو دروستە.
رێبوار هەڵە و ڕێبوار دروستە.
رێگا هەڵە و ڕێگا دروستە
سێ: قرتاندنی (ی) ـێی پێوەلکاندن:
یەکێک لەو هەڵە زەقانەی کە ڕۆژانە دەیان جار دەیبینین، لە نووسینی یای پێوەلکاندن دایە.
بۆ نموونە دەنووسین: کۆماری ئیسلامی ئێران
بەڵام دەبێ بنووسین: کۆماری ئیسلامیی ئێران
بۆ شیکاریی زیاتر لەو دوو ڕستە یان پەیڤەی خوارەوە بنواڕن:
دەروونناسی سیاسی
دروونناسیی سیاسی
بە فارسییەکەی:
روانشناس سیاسی
روانشناسییِ سیاسی
نموونەیەکی تر:
دەفتەری سیاسی حیزبی …. ئەوە هەڵەیە
دەفتەری سیاسیی حیزبی …. ئەوە درووستە.
یانیش:
لە کوردەواریی خۆماندا دەڵێین ….. درووست
لە کوردەواری خۆماندا دەڵێین ….. هەڵەیە
