ئێمە پێکەوەین: بەیاننامەی بزووتنەوەی سەربەخۆییخوازانی کوردستان لە پێوەندی بە جمووجۆڵەکانی سپای پاسدارانی ئێران لە سنوورە دەستکردەکانی نێوان ڕۆژهەڵات و باشووری کوردستان.

0
129

ئێمە پێکەوەین،
بەیاننامەی بزووتنەوەی سەربەخۆییخوازانی کوردستان لە پێوەندی بە جمووجۆڵەکانی سپای پاسدارانی ئێران لە سنوورە دەستکردەکانی نێوان ڕۆژهەڵات و باشووری کوردستان.

گەلی تێکۆشەری کورد
کوردستانیانی ئازیز و خۆشەویست
هاونیشتمانانی دەروەست و نەتەوەیی

لە ماوەی چەند ساڵی ڕابردوو، بە هۆی هەڵکشان و پەرە سەندنی بیری نەتەوەیی و ئاگایی و وشیاریی نەتەوەیی نەتەوەی کورد، حکوومەتی داگیرکەری ئێرانی بە شێوازێکی زۆر توندتر و خێراتر لە جاران، بە کوشتن و بڕین و دەستبەسەر کردنی چالاکانی سیاسی و خەباتکارانی کورد و هەروەها ملیتاریزە کردنی زیاتری کوردستان هەوڵی داوە بە سەرکوتکردنی خەڵکی ڕۆژهەڵاتی کوردستان ترس و دڵەڕاوکێی بخاتە سەراسەری جوغڕافیای جەعلیی ئێرانەوە.

رژیمی ئێران جیا لە سەرکوت و کوشت و کوشتار لە ناوخۆی ڕۆژهەڵاتی کوردستان، هەر جار ناجارێک لە ڕێگەی درۆن و مووشەکی بالستیکیەوە لە بێدەنگیی جیهانیدا، سەروەریی خاکی هەرێمی باشووری کوردستانیش دەبەزێنێ و جیا لە بنکە و بارەگای هێزە سیاسیەکانی ڕۆژهەڵاتی کوردستان،” پارتی ئازادیی کوردستان-پاک، حیزبی دێموکراتی کوردستانی ئێران، کۆمەڵەی شۆڕشگێری زەحمەتکێشانی کوردستانی ئێران”، ماڵ و منداڵ و ڕەز و باغات و شوێنە سڤیل و مەدەنیەکانیشی کردۆتە ئامانجی دەستدرێژی و هێرشەکانی و هاوکات لە گەڵ تیرۆرکردن و ڕفاندنی چالاکانی کورد لە باشووری کوردستانەوە، دەیان ژن و منداڵ بوونەتە قوربانی و لە ئەنجامی ئەم هێرشە سەرەڕۆیانەی ئێراندا شەهید بوون و گیانیان بەختکردووە.

لە ماوەی سەرهەڵدانی شۆڕشی ژیناوە کە تا ئێستاش لە ڕۆژهەڵاتی کوردستان هەر وا بەردەوامە، هێرشەکانی ئێران بۆ سەر کوردستان چەن قات بەرز بووەتەوە و ژینۆسایدی نەتەوەی کورد لە ئاستی زۆر بەرزدا بەردەوامە و دۆخی نەتەوەیی کوردستان لە ئاستێکی مەترسیدار دایە،هاوکات حکوومەتی ئێران بە چەکی قورسەوە بەرەو سنوورە دەستکردەکانی نێوان ڕۆژهەڵات و باشووری کوردستان ڕێگەی گرتۆتە بەر و بە نیازی جێبەجێکردنی پیلانێکی شوومی ترە بۆ هێرش کردنە سەر خاکی هەرێمی کوردستان.
ڕاستیەکی حاشاهەلنەگرە کە ڕژیمە داگیرکەرەکانی کوردستان و یەک لەوان کۆماری ئیسلامیی ئێران، توانای قەبوولکردن و بوونی کورد و کوردستانیان نییە و هەر بۆیە بەردەوام لە هەوڵی سڕینەوەی نەتەوەی کورد دابوون و لەم سیاسەتە دوژمنکارانەیەیان بەردەوامن.

ئامانجی سەرەکیی هێرشی ئێران، جیا لە تێکدان و شێواندنی یەکڕیزی و تەبایی ناوماڵی کورد، لەناو بردنی تاک بە تاکی هەموومانە، هەر بۆیە پێکەوە بوونمان و یەکڕیزیمان گرینگی و پێویستیەکی مێژوویی و هەنووکەییە.
بزووتنەوەی سەربەخۆییخوازانی کوردستان، داوا لە خەڵکی ڕۆژهەڵاتی کوردستان، ناوەندە مەدەنی و هێز و لایەنە سیاسیەکان و هاوکات ئەندام و لایەنگرانی نهێنیی بزووتنەوە دەکا: ئاگادار ئامادە بن بۆ هەر چەشنە ئاڵووگۆڕێکی خێرا و بە پەلە کە بە تایبەتی لە ئەگەری دەستپێکی شەڕ، پێویستە وەکوو مافی خۆپاراستنی نەتەوەیی، خۆمان و ماڵ و منداڵ، ژن و پیاوی کوردستان بپارێزین و یەکگرتووانە دەست بدەینە دەستی یەکتر بۆ بەرگریی ڕەوا و هاوکات شەقامەکانی کوردستان بۆ داگیرکەران بکەینە ئاگر و خوێن و دروشمی ڕاستەقینەی شەقامی ڕاپەڕیوی ڕۆهەڵات ” کوردستان، کوردستان، گۆڕستانی فاشیستان” بکەینە کردار و بیخەینە بواری جێبەجێکردنەوە.

بە هێزترین و گەورەترین وانەی شۆڕشی ژینا بۆ هەموومان، ئەوەیە کە: ئێمە تەنیا نین و گشتمان پێکەوەین و هێزمان لە یەکگرتووییمان دایە، پێکەوەبوونمان هێز و دەسەڵات و سەروەریمان بۆ دەگەڕێنێتەوە.

سەرکەوتنی نەتەوەی کورد و ڕزگاریی خاک و نیشتمانی کوردستان و دامەزرانی دەوڵەتی کوردستان نزیک و مسۆگەرە

بزووتنەوەی سەربەخۆییخوازانی کوردستان
١٣ی جۆزەردانی ٢٧٢٣ی کوردی
٣ی ژووەنی ٢٠٢٣ی زایینی

سه‌رنج و كۆمێنت

كۆمێنت

Leave a Reply

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.