رزگار عه‌باسزاده: ‌بەرە دەتوانێ هێز و لایەنەکان لە ژێر چەترێک و بۆ وەدیهێنانی ئامانجە هاوبەشەکان کۆ بکاتەوە

0
1550

دۆسیەی تایبەتیی رۆژی کورد سەبارەت بە بەرەی کوردستانی

بۆچی لە پاش 37 ساڵ دەسەڵاتداریی کۆماری ئیسلامی ئێران، پارت و لایەنە سیاسییەکانی رۆژهەڵاتی کوردستان، هەوڵ نادەن هێز و توانای سیاسی و نیزامی خۆیان لە چوارچێوەی بەرەیەکی سیاسی یەکگرتوودا بەکار بێنن؟ لەمپەرەکانی بەردەم پێکنەهاتنی ئەو بەرە یان هاودەنگییە سیاسییە چییە؟ چۆن دەکرێ لایەنە سیاسییەکان لە دەوری یەک پلاتفۆرمی هاوبەش کۆ ببنەوە و خەباتێکی هاوبەشی سیاسی و نیزامی لەدژی کۆماری ئیسلامی بکەن؟
ماڵپەڕی رۆژی کورد لە پێناو لێک نزیککردنەوەی هێز و لایەنەکان و لێک تێگەیشتنیان لەسەر پرس و بابەتی پەیوەندیدار بە پێکهێنانی بەرەیەکی کوردستان ئەم دۆسیەی کردۆتەوە و ڕای ئەندامانی رێبەریی حیزبەکان و هەروەها کەسایەتییە سیاسییەکانی رۆژهەڵات و شرۆڤەکارانی سیاسی وەرگرتووە.
بەرێز رزگار عەبباسزادە، ئەندامی سەرکردایەتی، بەرپرسی پێوەندییەکانی پارتی ئازادیی کوردستان لە هەولێر و ئەندامی فەرماندەیی هێزی پێشمەرگەی پارتی ئازادیی کوردستان (پاک) وەڵامی پرسیارەکانی رۆژی کورد دەداتەوە.

ڕۆژی كورد: گرینگیی پێكهاتنی به‌ره‌ی كوردستانی بۆ كوردستانی ڕۆژهه‌ڵات له‌چی دایه‌و زه‌رووره‌ته‌كانی پێكهێنانی ئه‌م به‌ره‌یه‌چین ؟

عەبباسزادە: خستنە رووی ئەم تەوەرە بۆ باس و گفتوگۆ پڕۆژەیەکی پێویست و جێی دەسخۆشییە لێتان.

پارتی ئازادیی کوردستان هەر لە رۆژی دامەزرانەوە، بایەخێکی زۆری بەم پرسە داوە. لە راستیدا بۆ یەکەمجار پارتی ئازادیی کوردستان دروشمی پێکێنانی بەرەی کوردستانی لە رۆژهەڵاتی کوردستان هەڵگرتووە. لە یەکەم بەیاننامەی پاکدا، واتە راگەیەندراوی دامەزرانی، یەک بەندی تەواو لە سەر پێویستیی پێکهێنانی بەرەی کوردستانی نووسراوە. دواتریش رێبەری گەورەمان شەهید سەعید یەزدانپەنا بە تێر و تەسەلی لە بارەی پێویستیەکانی بەرەیەکی کوردستانی لە رۆژهەڵاتی کوردستان شیکاریی کردوە.

گرینگیی پێکهێنانی بەرەی کوردستانی لە رۆژهەڵاتی کوردستان لەوەدایە کە بەرەیەکی ئەو تۆ دەتوانێ لە سەردەمی خەبات و تێکۆشان بۆ ئازادیی کوردستان، هێز و لایەنە سیاسییەکانی گۆڕەپانەکە لە ژێر چەترێک و بۆ وەدیهێنانی ئامانجە هاوبەشەکان کۆ بکاتەوە، پێوەندیی نێوان هێز و لایەنە سیاسییەکان رێکبخا و ئەرک و مافەکانیان لە سەر یەک و لە نێو بزووتنەوەکەدا پێناسە بکا، ببێتە مەرجعی سیاسیی رۆژهەڵاتی کوردستان و بڕیار لە شەڕ و ئاشتی بدا. لە پاش راماڵینی داگیرکەر لە کوردستان و سەرکەوتنیشدا، تا بەڕێوە چوونی هەڵبژاردن بۆ پێکهێنانی حکومەت و پارلمانی کوردستان، حوکمڕانی دەکا.

زەرورەتەکانی پێکێنانی بەرەی کوردستانی ئەگەر بە خاڵ بیژمێرین دەکرێ لەم خاڵانەدا کورت و پووخت بکرێنەوە:

١-  هاوکێشەی هێز و پێگەی جەماوەریی حیزبەکانی رۆژهەڵاتی کوردستان، بە چەشنێکە کە هیچ هێزێک بە تەنیا، یان دوو هێز پێکەوە، ناتوانن یەکڕیزی سیاسیی و جەماوەریی پێکبێنن؛ چونکە رۆژهەڵات لە حاڵەتێکی فرەحیزبیی دایە و سەنگ و قورسیی هێزەکان زۆر لە یەک دوور نیین.

٢- هەم خەڵکی کوردستان و هەم کۆمەڵگای نێو دەوڵەتی باشتر تەعامول و هاریکاری لە گەڵ نەتەوە و حیزبگەڵێکی یەکگرتوو دەکەن.

٣- رۆژهەڵاتی کوردستان جگەلەوەی لە گەڵ دوژمنێکی گەورەی وەک دەوڵەتی ئێران تەڕەفە، لە نێو خۆیشیدا، زۆر کێشە و پەڕت و بڵاوی هەیە. بەرەی کوردستانی دەتوانێ هەم خەبات دژی تاران رێکبخا و هەم ئەو کێشە و کەلێنە نێوخۆییانە پڕ بکاتەوە.

رزگار عه‌باسزاده: ‌بەرە دەتوانێ هێز و لایەنەکان لە ژێر چەترێک و بۆ وەدیهێنانی ئامانجە هاوبەشەکان کۆ بکاتەوە

ڕۆژی كورد: هۆكار، به‌ربه‌ست و له‌مپه‌ره‌كان له‌به‌رده‌م پێكنه‌هاتنی به‌ره‌ی كوردستانی له‌كوردستانی ڕۆژهه‌ڵات چین؟

عەبباسزادە: زۆر هۆکار و لەمپەڕی  ورد و درشت لە بەر دەم پێکهێنانی بەرەی کوردستانیدا هەن. رەنگە ئەم دیمانەیە توانای شیکردنەوەی وردیانی نەبێ. بۆیە تەنیا دەتوانین بە پوختی وەک ئاماژە باسیان لێوە بکەین. یەک لە هۆکارەکان نەدیتنی زەرورەتی بەرەی کوردستانییە. ئەوەش لە باوەڕ و سیاسەتەکانیانەوە سەرچاوە دەگرێ. بڕێ هێزی سیاسیی پێیانوایە کە بەرە پێویست نییە. هۆکارێکی دیکە ئەوەیە کە برێک هێز تەنیا وەک درۆشمێکی عامە پەسند کاری لە سەر دەکەن و نەک هیچ هەنگاوێکی جدییان بۆ هەڵنەگرتووەتەوە بەڵکوو، خۆیان لەمپەڕیش بوون. لە هۆکار و بەربەستەکانی دیکە دەتوانین ئاماژە بە خاڵێکی گرینگی دیکەش بکەین کە بریتییە لە خوێندنەوەی ناواقعی برێک لایەن لە سەر خۆیان و لایەنەکانی دیکە. ئەو هێزانە نایانەوێ گۆڕانکارییە قووڵەکانی ٢٥ساڵی رابردوو ببینن و وا دەزانن جیهان و کوردستان هەر هی ٣٠ ساڵ لەمەوبەرە.لە حاڵێکدا لەم ٢٥ ساڵەدا زۆر هێز ورد و خاش وبوون و هێزی دیکە سەریان هەڵداوە. برێک لایەن بەرەی کوردستانیان بۆ تەسفییە حیساب لە گەڵ رکەبەرەکانیان دەوێ. هێندێکی دیکە خۆیان هەڵگرتووە کەی رکەبەرەکانیان نەمان و لە ناو چوون ئەوان ببنە تاکە پاڵەوانی گۆڕەپانەکە. دیارە بەم روانگە و دیتنانەوە بەرەی کوردستانی ناتوانێ پێک بێ. لە پاڵ ئەمانەدا دەکرێ ئاماژە بەو جیابوونەوانە بدەین کە لە ریزی حیزبەکاندا لە ٢٠٠٦ بەملاوە روویان دا.

ڕۆژی كورد:به‌ره‌ی كوردستانی به‌چ مكانیزم و شێوه‌یه‌ك پێك بێ كه‌هه‌موو لایه‌نه‌كان خۆی تێدا ببینه‌وه‌؟

عەبباسزادە: هەتا پرسی پێوەندیی لایەنە جیابووەکان لە یەکتر چارەسەر نەکرێ، زۆر بە زەحمەتی دەبینم بەرەیەک پێکبێ کە هەموو لایەنەکان خۆیانی تێدا ببیننەوە. یان دەبێ لایەنە لێکجیاوە بووەکان لە گەڵ یەک ، یەکبگرنەوە، یان دەبێ بوونی یەکتر بە فەرمی بناسن و ئامادەی پێوەندیی و هاوکاری یەکتر بن.

ڕۆژی كورد:پێشنیارتان بۆ خێرایی به‌خشین به‌دروست بوونی به‌ره‌یه‌كی یه‌كگرتوو چیه‌و چ ڕێكارگه‌لێك ده‌توانن ببنه‌ڕێخۆشكه‌ر بۆ پێك هێنانی به‌ره‌؟

عەبباسزادە: وەک باسم کرد بە زەحمەتی دەبینین بەم حاڵەی ئێستامانەوە بەرەیەکی یەکگرتوو پێک بێت؛ مەگەر لەم حاڵەتانەی خوارەوەدا:

١- لایەنە لێک جیاوە بووەکان یەک بگرنەوە.

٢- لایەنە لێک جیاوە بووەکان یەکتر بە فەرمی بناسن و ئامادەی تەعامول لە گەڵ یەک بن

٣- لایەنە جیاوە بووەکان ناوی خۆیان بگۆڕن.

٤- هێزێکی زۆر گەورەتر و کاریگەرتر لە هەموومان، بمانخاتە بەر گوشار و ئیمتیازی سیاسیی و هیچ کەس نەوێرێ لە ژێری دەربچێ.

بەڵام ئەگەر بە دەست ئێمە وەک پارتی ئازادیی کوردستان بێ، هەر بەیانی بانگهێشتی هەموو حیزبەکان دەکەین و گفتوگۆ لە سەر چۆنیەتی دامەزرانی بەرە دەست پێدەکەین و پێکەوە هەنگاوەکانی بۆ دیاریی دەکەین و دەست پێدەکەین.

berey-kurdistani-rizgar-abbaszade-berey-kurdistani-pak

سه‌رنج و كۆمێنت

كۆمێنت