ڕۆژی کورد: بەشێک لە زیندانیانی سیاسیی زیندانی گەوهەردەشتی کەرەج (ڕەجایی شار) لە ڕاگەیێندراوێکدا مانگرتنی خۆیان بۆ پشتیوانی لە نەسیم نەقاش زەرگەران، ڕەسووڵ حەردانی، ئەرژەنگ داوودی و باتیرشا محەممەدۆف، ڕاگەیاند.
ئەو زیندانیانە لە ڕاگەیێندراوەکەیاندا گوتویانە بۆ پشتیوانی لەو چوار زیندانیە کە ماوەی ٣ مانگە بۆ دەستەبەربوونی داوا یاساییەکانی خۆیان مانگرتنیان ڕاگەیاندووە، ڕۆژی پێنج شەممە و هەینی، ٧ و ٨ی گەلاوێژ، مان دەگرن.
زیندانیانی سیاسیی بەندیخانەی گەوهەردەشتی کەرەج لەو ڕاگەیێندراوەدا دڵەڕاوکێی خۆیان لەمەڕ دۆخی تەندرووستیی ئەو ٤ بەندکراوە ڕاگەیاندووە و هۆشداریشیان بە کۆمەڵگای نێونەتەوەیی داوە کە لە ئەگەری پێڕانەگەیشتن، گیان و ژیانی ئەو ٤ زیندانیە لە مەترسی دایە.
ڕەسووڵ حەردانی 26 ڕۆژە مانی گرتووە و نەسیم نەقاش زەرگەان ـیش ٢٤ ڕۆژە لە مانگرتن دایە.
ڕەسووڵ حەردانی کە بە تاوانی دزینی فڕۆکەیەک دەستبەسەر کراوە، دەبا ٣٠ خەرمانانی ١٣٩٤ی هەتاوی ئازاد بووبا بەڵام بەرپرسانی ڕژیم پێشیان بە ئازادبوونی ناوبراو گرتووە.
نەسیم نەقاش زەرگەران، نوێ ئایینێکی مەسیحیە کە ساڵی ١٣٩١ی هەتاوی بە تاوانی جووڵانەوە بە دژی تەناهیی نەتەوەیی و پرۆپاگەندا بە دژی ڕژیم، ٤ ساڵ زیندانی بەسەردا سەپاوە.
ئەرژەنگ داوودی زیندانیەکی سیاسیە کە ماوەی ٨ ساڵە لە زیندانی گەوهەردەشتی کەرەج بەند کراوە و بەشێک لە بیستن و بینینی خۆی لە ژێر ئەشکەنجەدا لە دەست داوە.
باتیرشا محەمەدۆف خەڵکی تورکەمەنستانە و بە تاوانی سیخوڕی، ٢٠ ساڵ زیندانی بەسەردا سەپاوە، ناوبراو ساڵی ١٣٩٤ی هەتاوی نامەیەکی بۆ حەسەن ڕوحانی نووسی و داوای کرد شێوەنامەی دادڕەسیی چەسپاوی کۆماری ئیسلامی لەبەرچاو بگیردرێ.
