کینە ئەم؟
جوتکار و کارکەر
گوندی و رێنجبەر
ھەموو پرۆلەتەر
گەلێ کوردستان
شۆرەش و ڤۆلقان
تەڤ دینامێتن
ئاگر و پێتن
سۆرن وەک ئێتوون،
ئاگر گھا قەپسوون
گاڤا بتەقن
دنیا دھەژی
ئەڤ پێت و ئاگر
دژمن دکوژی
کینە ئەم؟
ھەی ھەی ھەی کینە ئەم؟
ئەمن رۆژھلات،
تەڤ برج و کەلات.
تەڤ باژار و گوند،
تەڤ زنار و لات.
ژ دەستێ دژمن:
دژمنێ خوینخوار،
خورت و کۆلەدار
ژ رۆم، ژ فرەنگ،
د رۆژێن پر تەنگ،
ب کووشتن و جەنگ.
پاراست، پاراست
پاراست من ئەڤ رۆژھلات
کینە ئەم؟
ھەی ھەی ھەی کینە ئەم؟
کینە ئەم؟
گەلێ سەرفراز
دژمنێ دژمن
دۆستێ ئاشتیخواز.
ئەم خوەش مرۆڤن،
نە ھرچ و ھۆڤن
لێ چبکم بێ شەر
دژمن ناچی دەر.
باڤ و کالێ مە
دخواستن سەربەست،
ناخوازن بژیم
تا ئەبەد بندەست.
کینە ئەم؟
ھەی ھەی ھەی کینە ئەم؟
ئەمن ئەو کوردێ سەرھشک و ھەسن،
ئیرۆ ژی دژمن ژ مە دترسن
بینا باروودێ
کەتە پۆزێ من
دخوازم ھاویر،
بتەقم ژ بن،
دیسا وەک شێرا،
بکەڤن چیا.
ناخوازم بمرن،
دخوازم بگرن.
کوردستانا خوە
ئاخا میدییا،
کینە ئەم؟
ھەی ھەی ھەی کینە ئەم؟
ئەمن ئەو کاردۆخ خالدێوێ کەڤنار،
ئەمن ئەو میتان، نایری و زۆبار.
ئەمن ئەو لۆلۆ،
کاردۆخ و کودی،
ئەمن ماد و گۆش،
ھۆری و گودی.
ئەمن کورمانج و کەلھۆر، لۆر و گۆر،
ئەمن، ئەم کوردن ل ژێر و ل ژۆر
چەند ھەزار سالن
کوردستانا مە
پەرچە پەرچە ما
بندەستێ دژمن!
ئیرۆ ژ لۆر و کەلھۆر و کورمانج
ژ دەست خوە بەردان ئەو تەخت و ئەو تاج
ھنەک بوون ئاخا، ھنەک ژێن بوون بەگ
ھنەک ژێن بوونە جاھشێ ژاردارا
کوردستان فرۆت وان تەڤ نەیاران
بوونە مەزھەبدار،
بوونە ئۆلپەرەست،
بوونە پاشڤەروو، ب تزبی و خشت
تا کو دژمن شکاند ل مە سەر و پشت
مە دان بن لنگان دەولەت و ھەبوون،
بوون دژمنێ ھەڤ پەرچە پەرچە بوون.
تا کو کوردستان،
تا کو کوردستان
ژار و پەریشان
کەتە بن دەستان!
کەتن خەوێ، کەتن خەوێ
کەتن خەوا زلم و زۆرێ
کەتن خەوا بندەستیێ
راکەتن، راکەتن…
یەکجاران سەرێ خوە راکرن
لێ دژمن سەری زوو ژێکرن
یەک جارنا سەرێ خوە ب ھێز راکرن
لێ دژمن سەری زوو ژێکرن
لێ ل ڤی خاکی، ل ڤی ئەردی تۆڤێن ژیانێ ھاتیە چاندن
ئەڤ ئەردێ ژیانێیە
گەرم دبە، سار دبە
دکەلە، دکەلە، دپشقینە
برووسکێ تاڤێ تاڤان ھلتینە
رۆناھی دکە رۆژێ ل وەلات ھلتینە
ھەر وەکێن کاوا ل سەر خوە پێک تینە
نشتمانپەروەران دوەلدینە
ئەمن ئەو گەلا
بەلێ ئەمن ئەژدەھا
ژ خەوا دیلی
شیار بوون نھا
دخوازن وەک مێر
تەڤ مەژی و بێر
رابن ھەر وەک شێر
سەرێ خوە ھلدن
چ سەربلندن
ب جیھان جارەک
ئەم بدن زانین
رێچکا مارکیس،
رێچکا لەنین.
کورێ گوھدەرز و فەرھاد و روستەم،
کورێ سالار و شێرگۆھ و دەیسەم.
بەژن بلندن
وەک دێو بلندن
ئەم دەست درێژن
سەربەست دبێژن
دخوازن ب لەز
گاڤان باڤێژن!
کینە ئەم؟
ھەی ھەی ھەی کینە ئەم؟
نە خوینخوارن ئەم، ئاشتیخوازن ئەم
سەردارێن بلند، گەرناسن ھەردەم
ئەم شەر ناخوازن،
دڤێن وەکھەڤی،
ئەم پاش ڤە ناچن،
لێ دژمن درەڤی!
دڤێن ب شێورێ، لێ ئەو قەبوول ناکی
دڤێن براتی، لێ ئەو قەبوول ناکی
بوویە وەک رووڤی
ل پاش خوە نانێری
کنە ئەم…
گەلۆ باڤێم چ بکن؟
ناخوازن ئینسانی
ئێریش بکن و بگرن
ھستو بشکینن
ئەڤ پیسێن مردار
ژ ناڤ مە دەرخینن
ژ بۆ مرۆڤان ئەم تەڤ دۆست و یار
بژی کوردستان، بمری کۆلەدار!
کینە ئەم؟ا
Comments
