بانک سلمیٰ

بلوچ شہید وطن غلام محمد بلوچ ءِ لوگ بانک اِنت۔21فروریءَ ماتی زبانانی میان اُستمانی روچ ءِ درگتءَ ریڈیو سنگر ءِ مراگش ءِ واستہ مئے ٹیم ءَ آئی ءَ گوں کسانیں گند ءُ نندے کرتگ کہ ھاس پہ زبان ءِ سرا اِنت۔۔۔ریڈیو سنگر ءَ اے گلگلدار شنگ کنگ نبوتگ پمشکہ ما ایشیءَ سنگر ءِ تاکدیماں شنگ کنگا ئیں۔(ادارہ سنگر

جُست: زبا ن پہ راجی جہد ءَ چے بستار داریت ؟ شمئے ھیالاں زبان ءِ ارزشت چی اِنت؟

بانک سلمیٰ بلوچ : ہر راجی جہد ءِ بنیاد راجی پجّار ءِ سرا ایر بیت ۔بلوچ ہمے گشیت کہ من جتائیں راجے آں ،منی جتائیں زبانے ، جتائیں راجدپترے ،جتائیں زمین ے پمشکہ من چہ پاکستان یا ایران ءَ جتا ءُ آزاد بیگ لوٹاں ۔اگن بلوچ وتی راجی پجّار ءَ گار بہ کنت،راجی جہد ہم پشت نہ کپیت۔پمشکہ پہ قومی جہد ءَ زبان ءِ ارزشت بنیادی اِنت چیاکہ زبان تئی راجی پجاّر ءِ مستریں نشوندار اِنت۔
دومی گپ ایش اِنت کہ زبان تہنا تئی ہبرءَ دیم ءِ مردم سر نہ کنت بلکیں تئی مارشتانی ہم پاسپان اِنت۔بلوچی زبان ءَ رابلوچ ءِ راجی مارشت گون اَنت، بلوچءِ ہزاراں سالانی سکّی ءُ سوری گون اَنت۔من ترا مثالے دیاں۔۔۔۔بلوچی ءَ گشنت کہ ’’ منا پہ تو زہیر کنت ‘‘۔ہمے ’’زہیر‘‘ءِ معنا وَ اردو ءَ رجانک بیت بلے ایشی ءِ تہے ءِ مارشت ءَ تہنا بلوچے سر پد بیت ۔آ بلوچ مکران بیت شر یا ڈیرہ غازی خان ءِ۔۔۔۔یا براہوئی گپ جنوکے ۔۔۔۔پمشکہ من گشاں اگاں تو وتی زبان ءَ یلہ دئے بزاں تو وتارا چہ وتی ہزاراں سالانی راجی مارشتاں سنِدگائے۔۔۔۔۔
جُست:بلوچ راجی جہد ءَ یا پہ آئی ءِ دیمروئی ءَ اکیڈمک ءُ بلوچی لبزانک ءِ واستہ ادارہانی کرد چی اِنت ۔۔۔ءُ سیاسی گلّانی کرد چے بہ بیت؟
بانک سلمیٰ بلوچ :مئے چاگردءَ اکیڈمک یا علمی کار سک کم اِنت ۔گوستگیں پانزدہ سا لانی تہا من نہ دیستگ کہ بلوچ ءِ جہد ءِ سرا بلوچی ءَ شہمیں عملی کارے کنگ بوتگ۔۔انگریزی ءَ یک ءُ دو کتاب اتکگ بلے بلوچی ءُ براہوئی ءَ چشیں کارے منی دیما نہ گوستگ۔ علمی کار وتی جاگہ ءَ دنیگہ آوار جتگیں ءُ شہید کتگیں بلوچانی سرجمیں لڑے(لسٹ)مئے کِرّا نیست۔
خیر بخش مری ، غلام محمد بلوچ ءُ بالاچ مری ءِ وڑیں سروکانی سرا دنیگہ یک کتابے ہم دیما نیاتکگ۔انیگیں بلوچ جہد ءِ شریءُ ہرابی چی اَنت ۔۔۔؟ ۔۔اے سر حال ءِ سرا ہم علمی کار ءِ ضرورت اِنت ۔۔اے کار تہنا سیاسی پارٹیانی نہ اِت ،ہر سرپدیں بلوچ ئیگ اِنت۔
جُست:بی این ایم ءُ ایندگہ آزاتی لوٹوکیں گلّانی کرد ءَ پہ زبان ءَ شما چون گندئے ؟شمئے ھیالاں آہانی طریقہ کار پہ بلوچ جہد ءِ دیمروئی ءَ چے بہ بیت؟
بانک سلمیٰ بلوچ : کوتاہی ءُ نزوری بیتگ اَنت۔۔بلے من سر پد باں کہ دیم پہ شرّیءَ اِنت ۔۔پیش ءَ بی این ایم ءِ آئین اردو ءَ بیتگ بلے انوں بلوچی ءَ ترّینگ بیتگ۔۔۔بی این یم ءِ جہد ہمیش اِنت کہ آئی ءِ تاکانی تہا گیشءَ چہ گیش نبشتانک بلوچی یا براہوئی ءَ بہ بنت۔
بلے من گشاں آزاتی لوٹوکیں گلّاناں اے پِڑءَ انگت باز کار کنگی انت۔لہتیں گلاّنی مردم گشنت کہ بلوچستان ءِ آزاتی ءَ رند زبان ءِ دیمروئی ءِ واستہ جہد کنگ بہ بیت ۔۔۔چوش نہ اِنت ۔کس نزانت کہ بلوچستان کدی آزاد بیت ۔اے دراجیں سپرے ۔۔۔بلکیں سد سال لگیّت ۔۔اگاں اے نیام ءَ ما وتی زبا نءَ گار بہ کنیں ۔۔مئے راجی پجاّر چہ مئے دستءَ رؤت۔۔
جُست: بحیثیت بی این ایم ءِ رہشون شما بلوچی زبان ءَ سیاسی ءُ راجی زبان ءِ دیمروئی ءِ واستہ چے کنگا ئے ؟
بانک سلمیٰ بلوچ : انچو کہ من پیسر ا گشت بی این ایم ءِ جہد ہمیش اِنت کہ آئی ءِ آئین ،تاک ءُ تاکبند ،پمفلٹ ارد و ءِ بدلءَ بلوچی ءَ بہ بنت ۔ہمے ھساب ءَ بی این ایم وتی باسکاں سکین دئیگا اِنت کہ سوشل میڈیا ءِ تہا بلوچی کارمرز بکن اَنت۔۔
یک زمانگے بیتگ کہ سیاسی پارٹیاں گشتگ کہ سیاسی سر حال بلوچی ءَ گشگ بیت نہ کن اَنت۔۔۔پمشکہ آہاں وتی آئین اردو ءِ تہا کتگ اَنت۔اے انیگّیں گپّے نہ اِنت ۔۔یوسف عزیز مگسی ءَ وہد ءَ چہ انچو بوتگ۔۔بلے انّی بی این ایم اولی بلوچ سیاسی گلّ اِنت کہ آئی ءَ وتی آئین بلوچی ءِ تہا کتگ ءُ ثابت کتگ کہ بلوچی ءِ تہا سیاسی سرحالانی نبشتہ کنگ ناممکن نہ اِنت۔۔۔
من ہمے ہبرءَ منوکاں کہ اگاں پاکستان ءَ چہ آزات بئیگ مئے وتی دستءَ نہ اِنت ۔۔۔چہ اردو ءَ آزات بئیگ مئے واک ءَ اِنت۔۔۔اول ءَ ہمے کار ءَ وَ ما بکنیں۔۔۔وتی راجی سیاستءَ چہ اردوبہ سِندیں۔