” طرح توسعه سواحل مکران” پندلے په بلوچستـــان ءِ مدامی زوربرد کنگ ءَ

0
239
 (  سرجمیں نبشتانک   )
دراجیں مدتے انـت که پارسءِ سپاهی ءُ لشکـر ءُ تهـران ءِ بلوچ دشمنیں واکداراں اے پنـدل ءَ بزاں « طـرح توسعه سواحل مکـران » ءَ سازاِتگ۰   بیست سال ءَ پیش کلپییں ملا علی خامنه ایءِ جِند ماں یک گشتانکے ماں گُمبداں (بندر عباس) جار جـت که «سواحل مکران » بزاں مکران ءِ تیاب گوران ءَ آباد کنت  ءُ دیمروی دنتءُ اودان ءِ مردماں گیش کنگ لوٹیت، بزاں درآمدیں مردم چه دگه هَند ءُ دَمگاں دیم په بلوچستــانءِ  تیاب دپی شهر ءُ بندناں لڈینگ ءُ هموداں جاهمنند کنگ به بنت۰ بازکَسءَ پگر کُـت که آ گپ هنچنائیں ملائی وازے ات۰ لهتیں هم گلے چِـت  که ابلیسیں خامنه ای ملک ءَ آباد کنت۰  هنوں پدر انت که هما واز یک بلوچ دشمنیں پندلے ءِ بنگیجی گپ اَتنــت۰
گوں وهـد ءِ گوزگ ءَ پَـدَّر بیگ انت که  « طرح توسعـه سواحل مکـران» هنچیں بلـوچ دشمنیں پندل ایت که چه رضامیرپنچ ءِ دورءَ ڈنی یاں آرگ ءُ ماں بلوچستـــان نندارینگ باز گئیرانسانی تر ءُ اِبلیسی ترانت۰  آ زمانگ ءَ درآمـداں چه پارس ءَ آرگ ءُ ماں دزآپ ءُ هامون ءِ کش ءُ گوران ءُ حسین آباد ( زابل )ءَ جاهمنند بوتنت۰ آ درآمداں هشتاد سال پیش ءَ مُلک ءِ مستـریءُ کهدائیءِ تماه نیست اَت۰ بلئے اے مهاجـر که تیاب دپی شهـر ءُ بلوچستـــان ءِ بندناں آرگ بنت په ماڑیءُ لوگ ءُ کارے رزا نه بنت۰ اشاں په هاکمی ءُ ملک ءِ مدامی زوربردکنگ ءَ لڈینگ ءُ آرگ بنــت۰
پارسیانی سپاه ءُ ملا روحانی ءِ وزیرانی کابینه ءَ جار جتـگ که «طرح توسعه سواحل مکران» ءِ پروجیکت  آهانی هنونیں دور ءِ مستریں برنامه ءُ ایران ءِ « پروژه ملـی » انـت۰ هر وزیرے په وت ءَ وڑوڑیں اداره پیم کتگ۰ زابلی ٹولی ءُ بلوچستـــانءِ چم جهلیں گورنر هم گوں ملا روحانی ءِ کابینه همراه ءُ هم شوراِنت۰
بلوچ راج ءُ انساندوستیں سیاسی ءُ گئیر سیاسی مهلوکءَ  دلگوش گوَر کنگی انت که دگنیاے ءِ هچ جاگهے سی لک (  ۳۰۰۰۰۰۰ )  درآمدیں مردم  په یکبر ماں دگه  ملکے ءَ جاهمنند کنگ نه بوتگنت۰ نوں شما وَت ایرانی زورانسریـں واکدارانی « پروژه ملی» ءِ بلوچ دشمنیءَ اندازه به جنیت ۰اے وڑیں کلونیالیزم بزاں استعمار دگنیا ےءِ هچ جاگه گندگ نه بوتگ۰ اداں گوشگی انت که خامنه ای ءُ پارسیانی  واکداران ءُ سپاه ءَ  پیسله کتگ تنکه په اے پندلءِ دیما برگ ءُ پوره کنگ ءَ اولسرا یک سد ءُ هشتاد میلیارد   (  ۱۸۰۰۰۰۰۰۰۰۰۰)   تومُن هرچ بکننت۰
پروجیکت ءِ نام  پر چے « طرح توسعه سواحل مکران » انت؟
هما وڑءَ که زانیت  ڈنی یاں وتی بلوچ دشمنیں پروجیکت ءَ «طرح توسعه سواحل مکران»  نام پِرکتگ۰ اے پندل ءِ نام ءِ پشت ءَ جَهل ءَ نبشته کتگیں ابلیسی مکســد ءُ بلوچ دژمنیں اِستراتجـی چیراَنت ۰
اول ایش که بلوچستـان ءِ پلیں نام ءَ ایرانی هکومـت ءِ جِند چه گلزمیـن ءِ زرباری بهـرءَ دور کنگ لوٹیت۰ بلوچستـان ءِ تیاب کرّاں گوں بدنیتی « سواحل مکران » گُشنت۰
دوئم  گوں لبزِ مکـرانءِ کارمرز کنگ ءَ  میدیا ءُ پارسی رسانکاں په بلوچستـان ءِ بهر بهر کنگ ءَ جاوران تیار کنگاینت۰ اگاں رندترا سواحل مکران ءِ جاگه ءَ مئی ڈیه ءِ زرباری بهرءُ سراوانءَ  استان مکـران به نامیننت ، واش ءُ دزاپ ءَ سرحد به گُشنت، گنجیں پهره ءُ بنپورءُ بزمانءِ  نام ءَ استان ولایت ایر بکننت ءُ ڈیهءِ گوریچی بهرسیستان نامینگ به بیت گڑا پلیں بلوچستــان ءِ نام ءَ گوں کست کینگ بلئے په رپک ءُ پندل چه وتی کاگدانی سـرا دورکننـت۰ سیم ایش که اگاں بلوچستـــان ءِ زربار ءُ تیاب دپی شهر ءُ بندناں توسعه بزاں دیم روی دینت  اے په بلوچاں نهنت۰ بلوچانی ملک ءُ زمیناں چه جاشک ءَ بگر تاں گواتر هنوں  زوربرد کنگاینت تنکه په سی لک بزاں سئے میلیون درآمدیں مردم لوگجاه به بندانت په آهاں کار باری جاوراں تیار بکننت۰
چارمی برباد کنوکیں گپ ایش انت که گوں سی لک ( ۳۰۰۰۰۰۰ ) درآمـد ءِ آیگ ءُ ماں گلزمیـن ءِ زربارءَ جاهمننـد بیگ بلوچاںی شمـارءَ ماں وتی بُن پیرکی گلزمیـن ءَ کمتـر بکننت ءُ ماں آیوکیں دورءَ په اے نیمـون که وت گیشتریک اَنت بلوچـاں ایردست بدارنـتءُ بلوچستانءِ زِرءِ نیامتان  په وت بکننت  ءُ بلوچستان ءَ مُـدامـی زوربرد بکننت۰   پنچم ایش که بلوچستــان ءِ بندنان ءُ پرنیامتیں زِر ءَ گوں تیاب کرّاں وتی پنجگانی چیرا بیارنت ءُ وتیگی بکننت۰ گوں بلوچانی راجی سرمایه هانی پل ءُ پانچ ءَ  آسودگ ءُ آسراتیں زنداِش بیت ءُ لکانی لک بلــوچ ءَ ماں بلوچانی وتی بُن پیرکی ڈیـه ءَ « استعمـار» ءُ مُهتاج به کننت ۰
ششمی گپ ایش که خامنه ایءِ ٹولی ءُ رستریں سپاه لوٹنت  گنجیں بلوچستـــان ءِ زرباری بهــرءَ وتی شیعه یاں بیارنت ءُ جاهمنند بکننت،  تنکه زابلی ٹولی چه گلزمین ءِ گوریچی بهر ءُ نوکیں مهاجر چه زربارءَ بلـــوچ راجءِ آینده ءَ چه هنوں تهارتر بکننت ءُ تهــران ءِ بلوچ دشمنیں سیاست ءُ استعماری کارکرداں پرزورتِر بکننت۰
کئے لــڈینگ ءُ بلوچستـــــان ءَ آرگ بنــت ؟
مزنیں  بهـرے چه اے درآمـداں گوں تهران ءِ واکدارانــی برنامه ءُ هـرچ چه پارسیانی مزن شهـرءُ هَنـد ءُ دَمَگاں لڈینگ بنـت۰ تهـران ءِ واکدارانی پدریں سیاستے ماں گوستگیـں سی ءُ هشـت سالاں  اے بوته که شیعه ئیں پارس ءِ مردمانی شمارماں ایران زوت گیش به بیت اے مردم ماں کرمان، یزد ءُ اسپهـان ءِ هشکیں پٹ ءُ زمیناں جاهمنند وَ نه بنت۰ایشاں دیم په گلزمیـن ءَ لڈینگ بنت۰همے رُمب ءَ لهتیں زوالکاریں زابلی هم گون انـت۰
دگه بهرے چه اے مهاجـرکه بلوچستــان ءَ آرگ بنت اوگانستان ءِ درانڈیهیـں هزاره اَنــت۰ رند چه ۱۹۷۹ ءِ بدلی یاں خمینی ءُ خامنه ای ءِ شیعه ٹولی ایران ءِ سیاسی واک ءَ چه ایرانءِ آدگه سیاسی هوربندانـی دیم ءَ په زور ءُ پندل چَکاپت۰
گوستگیں سی ءُ هشت سالانی درگت ءَ اے ٹولی وتی همشـور ءُ هم پگریں شیعه یاں ماں اوگانستان، لبنان، شام، عراق ءُ پاکستان ءَ هر وڑیں کمک ءُ مدت کتـگ۰ ایران ءِ واکدارانی شنگ بوتگیں اوگان شماری ءِ هساب پیش دارنت که  چه تمامیں باهوٹیں اوگاناں که ماں ایران ءَ نشتگ اَنت چل ءُ هپت درسد ( ٪ ۴۷) هَـزاره اَنـت۰ بزاں اوگانستانءِ دوارسوچیں جنگ ءِ درگت ءَ کم ءُ گیش دوازده لک اوگانستان ءِ هـزاره آتکگ ءُ ماں ایران ءَ جاهمنند بوتگ انت ۰اشانی زبان دَری انت که بیه ءَ گوں پارسی ءَ یک اِنت۰ بهرے چه هـزاره یاں که شیعه هم هَست اَنت وت ءَ را گوں خامنـه ای ءِ ٹولـی ءُ  بسیـج ءُ سپـاه ءَ هـوار کتگ۰هـزاراں نپر چه ایشاں ایرانی پاسپورٹ ءُ سجل دیگ بوتگ۰اے  ماں ایرانءَ گوں واکـداراں شریک اَنت ءُ رمبے چه ایشاں هنوں پهـره ءُ ایرآپ ءَ جاهمنندانـت۰ سپاه ءُ ملاخامنه ای ءِ جند لوٹنت تاں جلاوتنیں هـزاره یاں چه پارسءِ شهرءُ میتگاں به لڈین انت  ءُ گلزمینءِ زربارءَ جاهمننـد به کننت۰گپ اوداں سربوتگ که چه مَشَـد (مشهد) شـال (کویٹه)، بامیـانءُ کابل ءَ هم هـزاره چِن ءُ لانچ انت تنکه گوں پارسیانی رمب ءَ هور بنت ءُ  بلوچستــان ءِ بنـدن ءُ تیاب کرّاں وتیگی به کننت
سیمی مزنیں رُمب  که بهـرے چه آیوکیں مهاجـران اَنت عراق ءُ شامءُ لبنان ءِ باهوٹیـں شیعه اَنت که  ایران ءَ په باهوٹی آتکگ ءُ ماں مزں شهـراں جاهمنندانت۰ اشانی زنـد ءُ آینـده گوں سپاه ءِ پلینـڈی یان ءُ تهـران ءِ واکدارانی سیاستاں همگرنچ اِنـت۰ اے هم هزاره یا نی پیمءَ سجل ءُ ایرانی پاسپورت دیگ بوتگ ءُ شمارے چه هـَمشـاں هنوں وتا را ایرانی هم زاننت۰
اداں اے گپ پدّر کنگی انت که ایران ءِ جاهمنندیــں هزاره ءُ لبنانیءُ عراقی باهوٹاں که شیعـه اَنت چه ایردستیں راجاں بزاں کورد، بلــوچ، الاحوازی عرب، تورکمن، آزری تورک ءُ لُـراں گیشتر واک هست انت۰ اشانی زندجـاور چه ایردستیـں مردمانی زندجاوراں باز گهتـراَنت ءُ لهتیں ماں سپاه ءُ چاروگی اداره ءُ آدگه هکومتی اداره ءُ کارجاهاں کاردیگ بوتگنـت۰اشانی زرداریں مردم سرمایه کاری ءُ تجارت ءِ اجازت ماں ایران ءَهسـت۰ایرانی سپاه ءُ خامنه ای ءِ ٹولی په همے جلاوتنیـں مردمانی آسراتی ءُ وشهالـی ءَ اِشانی جِندِ په ایردستیں بلوچانی مِلک ءُ زمینانی زوربرد کنگ ءُ بلوچستـــانءِ راجی سرمایه یانی پل ءُ پانچ ءَ شَریک کنگاینـت۰
ماں اے بلوچ دشمنیں پروجکت ءَ کئے هـورانت؟
  1.   اداں چار ناشریں دمگی مردم نام گِرَگی انت که ماں “طرح توسعه سواحل مکران”  ءُ  “تقسیم بلوچستان” گوں درآمدیں دژمن ء لدیگی سپاه همشور ءُ هم کوپگ اَنت۰ اے ناشراں که وتا را  گوں وتی بلوچ دژمنیں کارکرداں  پاشک کتگ ایش انت: امان الله تمندرو ،هدایت میرمرادزی، نعیم ڈمنی امینی فرد ءُ سعید اربابی۰ اے هر سئے ملا هامنه ای مریدءُ سپاه ءِ گلام انت۰ اے زوالکاراں بلوچءِ  پدریچانی بدیں دوا ءُ ابدی پٹ ءُ لانتاں گون انت۰

طرح توسعه سواحل مکـران  بیه ءَ خامنه ای ءِ  فاشیستی ٹولی ءُ  پارس ءِ سپاه ءُ لشکـرِءِ پَنـدل اِنت۰ اے لوٹنت هما زلم ءُ رستری گوں بلــوچ راج ءُ بلوچستـان بکننت که گجـرءُ صفوی بادشاهاں کت نه کرت۰ اے پنـدل  تهـران ءِ مجلسءَ  مَنِّ اتگ ءُ هنوں دولت بزاں هکومت ءِ دست ءَ انت۰
ملا روحانی گوں وتی کابینه ءِ تمامیں وزیر اے پندل ءَ « یک طرح ملی » زاننت۰ وڑوڑیں اداره اش جوڑ کتگ تاں په سی لک درآمدیں مردمانی آرگ ءُ جاهمنند کنگءَ کار بکننت۰برنامه اش تیار کتگ تاں شهرءُ بندناں مزنتربکننت، لوگجاه بندآنت، وانگجاه ءُ زانتجاه اڈ بکننت، په ریل گاڑی ءُ موٹلان ریل ءُ  راه اد بکننت  ءُ په گئیر بلوچ ءُ درآمداں کارجاورءُ کارجـاه شــر بکننت۰پارسیآں  چنت دگه ملک ءَ وتی شریک کتگ تاں بلوچانی مال ءُ مڈی یاں هوریءُ پل ءُ پانچ بکننت۰
پلینڈیـں مـلا خامنه ای ءُ آیی ءِ سپاه ءُ بلـوچ دشمنیں لشکر زوالکاریں سعید اربابی، هدایت میرمـرادزی، ناشریں نعیم امینی فرد ءُ چنت دگه نپرءَ مـاں اے پروجیکت ءَ هوار کتگ اَنت۰ زابلی یانی ٹولی گوں شهریاری، نورا، کیخاءُ حسینی ءِ سروکی ءَ هم ماں اے بلوچ دشمنیں کارءَ شریک انت. ایرانی واکداراں رند چه یک سیمینـارے ماں یک چهبارءَ جار جت که گیش چه سی ءُ پنچ ( ۳۵ ) ایرانی ( پارسی ) سرمایه کاری بینک ءُ کمپنی هور گـوں سی ( ۳۰ )  دَرملکی مزنیں کمپنی ءِ نمائنده یاں ماں آ سیمینارءَ بهـر زرتگ اَت۰

اگاں چه ایرانی واکداراں لهتیـں مُلک نام گِر کتگ اَنت بلئے اے گپّ ءَ چیر دیگنت که په بلوچستــان ءِ سرمایه یانی  پل ءُ پانـچ ءَ گوں کجام ملکاں بید چه روس، چین، هندوستانءُ پنجاپ اوگانستاں ءُ گوں کجام کمپنی یاں کئول ءُ کرارِاش کتگ۰ اے پَـدّرانت که  روسی سرمایه کار وتی چست ءُ ائیر ماں گلزمین ءِ سیریک ءُ هندوستان ءَ ماں چهبـار بنگیج کتگ انت۰ چینی جنگی ازباب، لوگی سامان، لیبوک ءُ ورگی چیز همک روچ ماں بلوچستان ءِ بندناں چه باری لانچاں ایرگیجگ بنت۰ تَـن تَـن کابُـلی اوگاناں هم مزنیں زمینے ماں چهبـارءَ اجاره کتگ! چهبارءِ بندنءِ مزنیں کارءُ بار هندوستانی سرمایه کاراں دست گپتگ۰
گنجیں میناب ءِ مادن ءُ کیمتی ڈل ءُ ڈوکاں جنوبی کوریاے ءِ سرمایه کار په ۳۷۵ میلیون دلارءَ چه ڈنی یں پارس په بها زرتگنت۰ تهران ءِ پارسی واکداراں گوں زابلی ٹولی یانی دیما آرگءَ بلوچانی لوگ ماں چهبارءُ کنرک ءُ جاسک ءُ سیریک ءِ کش ءُ گوراں لُمبین انت ءُ زمینان اش زور بُـرد کنگاینت۰ بلــوچ مهلـوک ءِ درکنگ چه وتی بُـن پیرکی مُلکءِ زرباری شهر ءُ بندناں تهران ءِ بلـوچ دشمنیں پندل ءِ بهـرے اِنت۰
اے زوال کاریاں گوں « توسعه سواحل مکـران » ءِ نام ءَ کنگا ینت۰ ڈنی یں پارس مئی مکران ءُ بلوچستــان ءِ تیاب کرّاں توسعه بزاں دیمروی ندینت که هچ اِشاں بلوچستــان ءُ بلوچ راجءِ دشمن ءُ بدواه انـت۰ اشاں گوں سی لکّ درآمدانی آرگ ءَ لوٹنت مئی گلزمین ءَ  مدامی زوربرد بکننت ءُ چه زهرکنی ءَ بلوچستــان ءِ پلیں نام ءِ دور کنگ لوٹنت تاں بلوچانی پدریچاں هم وتی گلام ءُ ایردسـت بدارنت ءُ بلــوچ ءِ راجـی وجـود ءُ پجارءَ گار ءُ گمســار بکننت  ۰
بلوچ دژمنیں ایرانی واکداراں پیسله کتـگ که  په سی لک (۳۰۰۰۰۰۰ ) ڈنّی یانی  لڈینگ ءُ ماں گنجیں بلوچستــان ءِ تیاب دپی شهـر ءُ بندناں جاهمنند کنگ ءَ بیست ءُ دو هزار و پانصد میلیارد ( ۲۲۵۰۰۰۰۰۰۰۰۰۰۰ )  ریال هـرچ بکننت۰  اے گپ پدّرانت که پارسیاں اے مزنیں زرءَ چه یَزد ءِ هشکیں پَٹّ  یا  تهـران ءُ اسپهانءَ وَ نیارنت۰ اے  بلـوچ گلزمین ءُ آدگه ایردستیں راجانی دُّزِتگیـں  سرمایه انت که په بلوچانی مال ءُ مڈی یانی گیشتر پل ءُ پانچ ءَ هرچ کنگ بنت۰
هنوں پدرانت که روس، هند، پنجاپ، جنوبی کوریا، چین ءُ اوگانستان په بلوچستان ءِ راجی سرمایه یانی پل ءُ پانچ ءُ گوں ڈنی یں پارسیاں هورانت۰ اگاں چه تهران ءِ لدیگیں واکداراں په وتی ابلیسی مکسدانی  پوره کنگ ءَ لهتیں مُلک ءُ کمپنی گوں وت ءَ هور ترینتگ ءُ چنت تگارلاپ ءُ ناشریں بلوچ اِش هم وتی گلام کتگ اَنت بلئے اے مُلک ءُ سرزمین بلوچانی کانودی ءُ راجدپتری ڈیــه انت۰
ما بلوچانءَ تپاک بیگی انت
اے سبزیں زرءُ گنجیں مُلک ءُ ڈیه ایرانی واکدارانی میراس نَهنت۰گنجیں بلوچستــان میرکمبرءُ میر همل ءِ گلزمین اِنت، اے بلوچ راج ءِ وتن انت که ڈنی یں پارس آوارجتگ ءُ هنوں لوٹنٹ په بیه ءُ مدامی زوربرد بکننت۰هنونیں دور په بلوچستان ءُ مئی راجی وجود ءُ پجّارءِ مانگ یا بیگواهی ءَ پیسله ءِ دورانت۰ اے پیسله بلـوچ راج وت کرت کنت که گوں زالم ءُ زورانسراں جهد بکنت ءُ وتی ملک ءَ پچ بگیپت ءُ وتی راجی وجـودءَ به رکینیت۰ ما را زانگی انت که بے تـواری، کرمه گوشی ءُ سیل چارگ مئے بیگواهـی اِنت۰
دگه هچ راهے پَشت نه کپتگ ما بلوچانءَ تپاک بیگی ءُ پادآیگی انت تاں وتی بُن پیـرکی ڈیه ءَ چه لدیگانی ایردستیءَ آزات بکنیـن ءُ وتی پدریچاں چه پارسیانی گلامی به رکینیـں۰ ما را دلگوش گور کنگی انت که په ڈنی یانی در کنگءَ چه گلزمین  انگت ءَ دیر نهنـت۰ اگاں مروچی هوری ءَ جهد مه کنین ءُ چِست مه بئیں بوت کنت که باندات باز دیر به بیت۰
اگاں ما هنوں  وت ماں وتی ءُ دگه اڑ ءُ جنجالاں مه شموشین ءُ په ملک ءُ راج ءِ هاترا تپاک مه بئیں دلجم اوں که بانداتءِ پشومانی بے نپ ءُ سیت اِنت۰ اے راه ءَ هروڑیں جـد ءُ جهـد په ما جائزانت۰ په هر بلوچے  واجب انت که په ملک ءُ راجءِ رکّینگ ءَ وتی کوشست ءَ بکنت اگاں ناں آینده ءُ راجءِ پدریچاں ما را میاریگ کننت ءُ هچ کَس ءَ پهـل نه کننت۰ آ جست گرنت پرچا  پارس ءِ سپاه ءُ لشکرءِ دیم  دارگ نه بوت؟
مڑاداریں وانوکاں
*پارسیاں جار جتگ که بیست ملک ءِ کمپنی ءُ نماینده ماں چهبارءِ سیمینارءَ بهرزرتگ اَت ۰ آ نام گپتگیں ملک ایش اَنت فرانس ، ژاپن،  جنوبی کوریا، چین، جرمنی ، روس ، ناروے، هندوستان، اسلواکی، لبنان، فنلاند، بنگلادش، اسپانیا، قزاقستان، ترکمنستان، پاکستان، هلند، ترکیه، اوگانستان و سوئد۰
    *بلوچانی سیاسی هوربند، انسانی هکانی انجمناں، درانڈیهیں بلوچاں اے ملکانی هکومت ءُ کمپنی یاں؛ بید چه بلوچ دژمنیں پاکستان ءَ کاگد ءُ اے میل راه دیگی ءُ گوشگی انت که بلوچاں آهانی کرارداد ءُ بلوچ دشمنیں معاهده گوں ایرانی واکداراں نه منّ اَنت۰
  *تپاکیں راجانی هوربندءَ چه اے زورانسری ءُ بلوچستان ءِ دموگرافی  ءِ بدلینگ ءَ سهی ءُ سرپد کنگ هم درانڈیهیں بلوچانی کارانت ۰
         *ما را تمامیں یوروپی ملکانی دیوانان ءُ هوریں یوروپءِ پارلمان ءَ چه بلوچستان ءِ جاوران ءُ ایران ءِ انسان دشمنیں پندلاں سهی کنگی انت۰
 * بلوچانی سیاسی ءُ سلهبندییں جهدکارانی رهشون ءُ ادبی مچیءُ انسانی هکانی انجمناں باز مزنیں زمّه واری ءُ اگده اے هست انت۰ په بلوچ راج ءُ ملک ءِ نپ ءَ هاله ئیں تپاکی ءُ یکویی ءَ پکار ءُ لازمی انت۰ تپاکی ءِ مانا اے نهنت که درستاں ماں یک پارٹی یا هوربندے شامل ببنت۰ بلکه ایش انت که چنت بن گپ ءِ سرا هوریں جبهه اے اڈ بکننت۰ په درور یکے چه اے بن گپ همے پندل ءِ زد ءَ کارکنگ انت۰بزاں گوں راج ءِ همراهی ءَ مئیلنت که سی لک ڈنی ملک ءِ بندنان آرگ ءُ جاهمنند به بنت۰
 * ایرانی واکدارانی بلوچ دژمنیں هلاپ ءَ هوری ءُ  سیستماتیکیں وڑے کار کنگی انت۰اگاں چه آهاں  جنگی ازباب باز هست بلئے زورانسر اَنت ءُ کارکرداِش لَدیگی اَنت۰ آ هر چی بکننت سوب بلوچانی انت۰
اگاں چه دگه ملکان اِش په بلوچستان ءِ مدامی زوربرد کنگءَ گوں وت ءَ هورترینتگ بلئے میاں استمانی کانودانی ردا  اے مُلک گوں سبزیں  زر ءُ گنجیں تیاب کراں بلوچانی بیه ءُ ڈیه اِنت، اے بلوچانی هک انت که وتی آوارجتگیں ملک ءَ پد بجننت ءُ چه رستریں ڈنّی یاں پچ بگر نت۰ پارسیانی وڑوڑیں پندل گوں تپاکی ءُ هوریں جهداں پروش دیگ بنت۰
آزات ءُ آباد بات گنجيـــں بلوچستـــــــــان
پروشت ءُ پروش باتنـــت ايران ءُ پاکستان
محمــد کریــم بلــوچ

Comments

comments

‎ثبت نظر