هرجاه که ایردستیں راجاں ماں ایران ءَ پادآتکگ انت گڑا پارس ءِ سپاه ءُ لشکر پادآتکگیں مردماں لٹ کٹ کرتگ ءُ په آهانی توارءِ گارکنگ ءَ جنزانی زانتکاریں رهشون اِش دسگر کتگ ءُ ماں شزاجاه ءُ کورچاتاں بندیگ کتگ انت۰
اے تجربه ءِ نوکتریں درور الاحواز ءِ هزاراں مردم ءِ زرمبشت اِنت که رند چه مردمانی سرا تیرگواری ءُ بازیں ورناے ءِ ٹپی ءُ زدگ کنگ ءُ چنت نارازیں مردم ءِ کشگ ءَ جنز ءِ پجاه آؤرتگیں رهشوناں دسگرکنگ ءُ ماں شزاجاهاں بندی بوتنت۰ الاحوازی مـردم ءُ سیاسی هوربندانی پریشانی ایش انت که بندیگیں ورنا یا چه بازیں ازاباں ماں بندیجاهاں کشگ بنت یا که پاهو دیگ بنت۰
تروریستی سپاهءِ شکست
گوستگیں روچاں سپاه ءِ بلــوچ دژمنیــں پروجیکت ماں بلوچستـــان بزاں «بسیج عشایر» مزنیں پروشے وارت۰ « بسیج عشایـر» ءِ سلهبندیں باسک سپاه ءِ تپنگ چَگل داتنت ءُ گوں مردم ءَ هم توار بوتنت۰ همے گپ سپاه ءِ مستریـں ونده گری ءِ هنوگیں سوب انـت۰ دگه سوبے ایش انت که بازیں بلوچ عالِم بندیگیں مولانا فضل الرحمن کوهی ءً هم پگر ءُ همـراه انت۰ سیمی ایش انت که رستریں سپاه ءُ تهـران ءِ زهرکنیــں جاسوسی اداره یاں هنوں گندگاینت که رند چه سی ءُ نه سال ءِ کُشت ءُ کُشار، لٹ کٹ، هزاراں بلوچ ءِ دسگر ءُ بندی کنگ ءُ شهادت انگت ءَ بلوچ راج زندگ انت ءُ بلوچستان ءِ راجی جنز پرزور انت۰ آ گندگ انت که بلوچانی راجی بیداری ءِ دیما هِچ کَس داشت کت نه کنت۰
دو روچ انت که ماں آوارجتگیـں بلوچستان ءَ ڈنّی یں سپاه ءُ آهانی جاسوسی اداره وتی ونده گری ءَ چه پشامگءُ هنگ ءُ سرباز ءِ پادآتکگیں مردماں بنگیج کتگ۰
هال رستگ که سپاه ءِ پلینڈیں سروکاں بسیج عشایر ءِ باسکان ءَ که وتی سلاه اش دور داتگنت ءُ نارازانت کاسِد پِر کتگ ءُ په دروگ ءَ سوگند اِش وارتگ که مولاناےءَ آزات کننت۰ سپاه ءَ لوٹیت که آ ورنایان پدا گوں بسیج عشایر ءَ هوربه بنت۰ دژمن ءِ اے پندل نباید انت کامیاب به بیت پرچا که ایشانی برترگ ءِ مانا مَــوت انت۰ اے ورنایاں باز هژاری پکاراِنت تاں پدا ماں سپاه ءِ پندلانی دام ءَ مه کپنت۰
دژمن ءِ دگه پندلے ایش انت که مولاناےءِ هم پگریں مردماں مَشد ءِ شهر یا که دزآپ ءَ به لوٹائینیت ءُ هموداں بندیگ اشِ بکنت۰ اگاں آهاں اولسرا ازاب کوش مه کنت بلئے مجبور کنگ بنت که ماں تلویزیون ءَ وتی جندءِ هلاپ ءَ گپ به جننت ءُ رندا به بے سر ءُ بے پدِاش کنت۰۰۰
سیمی پندل ایش انت نوکیں شمارے چه گلزمینءِ سرپدیـــں بلــوچ ورنایاں دسگر ءُ بندی به کننت ءُ آهانی زندا په « شرارت » ءِ بے بنیادیں جـرم ءَ برباد بکننت۰
بیداریں بلــوچ ورنایانی هم کوپگی
البت ملا هامنه ای ءُ سپاه ءِ بلوچ دژمنیں رپک ءُ پندلاں گوں بلوچ راج ءِ تپاکی ءُ شیواری ءُ جهدانی دیما برگ ءَ پروش دیگ بنت ءُ بس ۰
اے گپ یک مستاگے ایت که ایرآپ ءُ واش ءُ شستون ءُ پهرهء ورنایاں گوں وتی چهباری ءُ سربازی ءُ پشامگی براس ءُ همبلاں هم کوپگ انت ءُ په مولانا فضل الرحمن ءُ درستین بلـوچ بندیگانی آزاتی ءَ جهد کنگاینت ءُ سریں بستگ ءُ اوشتاتگ اَنت۰
اداں گوشگی انت که بلــوچ هما راج اِنت که هور گوں اوگاناں زورانسریں صفوی بادشاهان اِش پروش دات ءُ آهانی بادشاهی ءَ دور هلاس کنائینت۰
ایکیم اوں که تپاکیں بلوچ راج ماں هنوگیں دؤرا هم توانت گوں کوردءُ عربءُ تورکمن ءُ آزری تورکءُ لـُـرانی هم کوپگی ءَ ملا هامنه ای ءِ مـور ءِ بادشاهی ءَ چپیگ بکنت ءُ وت ءَ چه تروریستیـــں سپاه ءِ کَهـُدایی ءَ به رکّینیــت۰
آزات ءُ آباد بــات گنجیــــــں بلوچستــان
پروشت ءُ پروش باتنت ایران ءُ پاکستان
محمـد کریم بلــوچ
Comments
