مولانا فضــل الرحمـن کوهـی بلوچستــان ءِ زانتکار ءُ اگده داریں عالم مروچی چه ایرانی زندان ءَ آزات بوت ءُ اے جوانیں هال درستیں بلوچ ءُ انسان دوستاں مبارک بات۰ اے سوب بلوچانی جهدانی برورد انـت۰
بلـوچ راج مولوی ءِ دسگر کنگ ءَ په زپتی ایر جت ءُ وتی توار ءَ وتسریں زالمانی هلاپ ءَ چست کت۰ چه امارات ءُ مشکت ءِ جاهمنندیں بلوچان ءُ تورنتوءُ لندن ءُ اسلو ءُ استکهلم ءِ باهوٹیں بلوچاں بگر تاں کراچی ءُ کابل ءُ ملک ءِ میتگءُ شهراں بلوچ مهلوک مولوی ءِ آزاتی ءَ لوٹوک اتنت، درستان یک توار اتنت۰
واش ءُ پهــره ءِ عالم، مگس ءُ آشار ءِ ورنائیں مولـوی، پهره ءُ سربازهءِ دلیریں ورنا، چهبار ءُ شستون ءُ سوران ءُ جالک ءِ زانتکار ءُ سرمتابیں کماش هور گوں ملک ءِ ورنايیں جهدکار وتی توار برزکت انت۰ بلوچانی هوربند ءُ مچی یاں په مولوی ءِ آزات کنگ ءَ گوں پادآتکگیں مهلوک همــراه ءُ همتوار بوتنت۰ بلوچستان ءِ سیاسی بندیگان هم مولوی ءِ دسگر ءُ بندی کنگ ءَ ایرجت۰ مولانا فضل الرحمن ءِ آزاتی گواه انت که تپاکی زوت بَرءُ نتیجه دنت۰
تپاکی هما پرزوریں سـلاه انت که ما دیرانت کارمرز نه کتــگ۰ پادآتکگیں راج ءُ بیداریں ورنایانی تپاکی ءُ یکویی ءِ یک یات مانگی درورے ایت۰ اگاں ملک ءِ هوربندانی تپاکی و یکویی سیستماتیک به بیت په بندیگیـــں بلوچ راج ءُ آوارجتگیں گلزمیـــن ءِ نــپ ءُ سیت انت۰
محمـــد کريــم بلـــوچ
Comments
