ڕۆژی کورد: خەڵاتی ساخارۆفی ٢٠١٦ ـی پارلمانی ئوروپا بە دوو کچە کوردی ئێزیدی بەناوەکانی نادیە موراد و لامیا حاجیبەشەر، بەخشرا.
ئەو هەواڵە لە لایەن ڕێژەیەکی بەرچاو لە ئەندام پارلمانەکانی ئورووپا و لە لاپەڕەی کەسیی توییتێری ئەو پارلمانتێراندەدا ڕاگەیێندراوە.
بەپێی زانیارییە بڵاوبووەکان، خەڵاتی ساخارۆف لە بیستوچواری خەزەڵوەری 1395ی هەتاوی لە ئێستراسبۆرگ پێشکەش بەو دوو کیژە کوردە ئێزیدیە دەکرێت.
هۆکاری پێدرانی ئەو خەڵاتە بەو دوو کیژە کوردە ئێزدییە هەواڵدانیانە بۆ ناساندن و ئاشکرا کردنی ئەو تاوانانەی کە ڕێکخراوی تیرۆریستیی داعش لە هەمبەر کچان و ژنانی کوردی ئێزدی ئەنجامی داوە.
پێشتریش ڕۆژی دووشەممە ١٩ی ڕەزبەری ١٣٩٥ی هەتاوی، شۆرای ئورووپا لە دانیشتنێکی تایبەتیی خۆیدا لە ستراسبۆرگ، خەڵاتی مافی مرۆڤی “واسلاوهاوێڵ”ی بۆ ساڵی ٢٠١٦، پێشکەش بە کچە کوردی ئێزدی نادیە مۆراد کرد.
نادیە موراد، لە لایەن نەتەوە یەکگرتووەکانەوە وەک سەفیر و ڕاسپێردراوی نیازپاکیی ئەو ڕێکخراوە هەڵبژێردراوە و پێشتر لە ڕێوڕەسمێکدا بە فەرمی دەست بەکار بووە.
