وه‌ ڕاسی تا که‌ی؟

0
1356

کیاڕەش شاسوار
کیاڕەش شاسوار

کیاڕەش شاسوار

ئێمرو شه‌وه‌کی له‌ خه‌و هێز گردم له‌بتابه‌گه‌م داگه‌رسانم تا چه‌وم که‌ف له‌ سه‌رکه‌فتن پاڵوان نازار کرماشانی کاک کیانووش ڕووسته‌می له کێبه‌ڕکیه‌گان (ڕقابه‌ته‌یل) ئوله‌مپیک ڕیو چمان دونیا دان وه‌ پێم، له‌ خوه‌شیا ناشتا نه‌خواردم و دام له‌ ده‌یشت هه‌ر سوئدییگ دونیام له‌ ناو گوشی تلفونه‌گه‌م وێنه‌گان کیانووش نیشان دیام و وه‌ شانازیه‌وه‌ وه‌تیام ئیه‌ کورده‌ وه‌ هاوشاری منه‌ توه‌نستیه‌ بوده‌ خاون ته‌ڵای ئوله‌مپیک ، وه‌ خوه‌شی فره‌یگه‌وه‌ تا نیمه‌رو ئیه‌ کارم بی چمان خوه‌م بۊمه‌ خاون ئه‌و ده‌سکه‌فته‌.

نیمه‌ڕو که‌ دواره‌ هاتمه‌و و کورته‌ ویدئو و قسه‌گان کاک کیانووش گوش گردم داخ و خه‌م فره‌ییگ که‌فت له‌ جه‌سه‌ و هۊرم ، یه‌کم ک دیم وه‌ زوان کوردی و زار خوه‌مان شانازی وه‌ کورد بۊنی کرد و ده‌سکه‌فته‌گه‌ی ک ته‌ڵای ئوله‌مپیک بی پێشکه‌ش وه‌ کورد له‌ هه‌ر کوره‌ی جه‌هان کرد وه‌ ڕاسی چمان هه‌ر ئه‌و کاته‌ م خاون ئه‌و ده‌سکه‌فت گه‌ورا بییم وه‌لیم دۊاتر ک هه‌واڵنێر فارس زوان له‌لی پرسیار کرد ئی مه‌داڵه‌ وه‌ کی پێشکه‌ش که‌ی وه‌ ناچار وه‌ت وه‌ شه‌هیده‌یل وه‌رگیری که‌ر له‌ هه‌ره‌م!!! چمان دونیا له‌ ده‌ور سه‌رم گیژ خوارد.

وه‌ ڕاسی کام هه‌ره‌م؟ کام شه‌هید؟ کام وه‌رگیری؟

وه‌ ڕاسی م ناهه‌ق پاڵوان نازار کاک کیانووش نیه‌گرم شایه‌ت له‌ باره‌دوخ ئیسه‌ ئه‌گه‌ م له‌ جیاتی ئه‌و بیاتیام ده‌سکه‌فته‌گه‌م ئه‌گه‌ له‌ قسه‌یش بییه‌ پیشکه‌ش وه‌ ڕێبه‌ر دیکتاتور ئێران بکردیام یا وه‌ شه‌هیده‌یل ئسلام ک فره‌گیان وه‌ بریار جه‌هاد خومه‌ینی هاتن تا خاک کوردستان بگرم وه‌ برایل و خوه‌یشگه‌یلمان شه‌هید کردن ، نیه‌توام فره‌ چشت بنۊسم ک دی له‌یه‌و دۊا له‌ پاڵوان ئه‌زیز و پاڵوانه‌یل وڵاته‌گه‌م ته‌نیا هاوردن ناو کورد و کوردستانیش قه‌ده‌خه‌ بکه‌ن وه‌لیم وه‌ ڕاسی تا که‌ی؟؟؟

تا که‌ی بایه‌ ندای ئاموزای م وه‌ زامه‌ت خوه‌ی بچوده‌ ئوله‌مپیک(م خه‌م شایه‌تم له‌ مناڵیه‌وه‌ له‌ ناو ماڵ وه‌ له‌ ژێر ده‌س داڵگی پینگ پونگ یای گرت و تا ئی ئاسته‌ چییه‌) تا  که‌ی کیانووش و کیانووشه‌گان و نداگان وه‌ زامه‌ت و ڕه‌نج فره‌ خوه‌یان بره‌سننه‌ ئی ئاسته‌ وه‌ له‌ بان سه‌کوو سه‌رکه‌فتن ئاڵای به‌رزه‌و بکه‌ن ک ئاڵای ئیمه‌ نیه‌، له‌ بان ئی ئاڵا ئه‌ره‌وی نۊسریاس وه‌ فارس(وه‌ خیاڵ خوه‌یان خاون ئێران) هه‌ڵگریه‌؟

تا که‌ی بایه‌س ده‌سکه‌فت وه‌ ده‌س باریم و پێشکه‌ش وه‌ که‌سه‌یلییگ بکه‌یمن ک هه‌زاران ساڵه‌ زه‌لم و زور وه‌ پێمان کردنه‌ وه‌ که‌ن؟

تا که‌ی بایه‌س دۊای سه‌رکه‌فتنه‌گانمان وه‌ زوان نه‌ته‌وه‌ییگ تر خوه‌شی بکه‌یمن؟

تا که‌ی بایه‌س وه‌ ژێر ناو نه‌ته‌وه‌ و خوقرافیاییگ تر جیا له‌ کورد و کوردستان بژییم؟

تا که‌ی بایه‌س نه‌ته‌وه‌ و ئایین و کوڵتور خوه‌مان بشاریمنه‌و؟

وه‌ ڕاسی تا که‌ی؟

جارییگتر پیروزبایی و بمارک بادییگ ئیوشم وه‌ خزمه‌ت پاڵوان نازار کورد کاک کیانووش وه‌ ئیوشم کاکه‌ ناهه‌ق ت نییه‌ ت جی شانازید ئه‌ڕا کورد کیشه‌ ئیمه‌ مانانیم ک خوه‌مان وه‌ سیاسی پێناسه‌ کردیمنه‌ وه‌ نه‌تنیا خزمه‌تیگ وه‌ نه‌ته‌وه‌گه‌مان نیه‌که‌یم وه‌گه‌رد سه‌رکوت و به‌دناو کردن یه‌کتر وه‌ دژایه‌تی یه‌ک له‌ ژێر ناو هێزب و ئیدئولوژی خاسییگ ئومر دژمه‌نه‌یلمان فره‌تره‌‌و‌ که‌یمن.

هیوادارم ده‌سکه‌فته‌گه‌ی پاڵوان کورد بوده‌ سه‌ره‌تاییگ ئه‌ڕا هۊر کردن هێزبه‌یل و سیاسیه‌ییل کورد ک وه‌ ڕاسی بکوشن ئه‌ڕا ڕزگاری نه‌ته‌وه‌ی کورد تا له‌یه‌و دۊا کیانووشه‌گان و نداگان دۊای سه‌رکه‌فتن ئاڵای کوردستان به‌رز بکه‌نه‌و وه‌ وه‌ شانازیه‌وه‌ وه‌ وه‌ زوان داڵگی خوه‌یان ده‌سکه‌فته‌گانیان پێشکه‌ش وه‌ خۊن پاک شه‌هیده‌یل ڕێ ئازادی کورد و کوردستان بکه‌ن.

 

سه‌رنج و كۆمێنت

كۆمێنت

Leave a Reply

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.