ڕۆژی کورد: بەپێی هەواڵی سەرچاوە خۆجێییەکان، بە هۆی وەرگەڕانی تراکتۆرێک لە ئیسلام ئاوای ڕۆژئاوا (غەرب)، ٢ منداڵ کوژران و 4ی تریش بە تووندی بریندار بوون.
بەرپرسە ئینتزامییەکانی ئیسلامئاوای غەرب، کەمتەرخەمیی هاژووتوانی ئەو تراکتۆرەیان وەک هۆکاری سەرەکیی ئەو ڕووداوە ناوبردووە و دەگوترێ منداڵێکی ٢ ساڵان و یەکی ٨ ساڵان گیانیان لە دەست داوە و ٤ی تریش بە تووندی بریندارن.
دەگوترێ ئەو تراکتۆرە لە هەورازێکەوە خولێر بۆتەوە و هەڵدێراوە.
ئەو ٤ منداڵەی تر کە برینداربوون بۆ نەخۆشخانە ڕاگواستراون و ئێستا لە ژێر چاوەدێریی پزشکی دان.
تراکتۆر یەکێک لەو کەرستانەی هاتووچوو و کاری ناو گوندەکانە کە بەتایبەتی لەو ساڵانەی دواییدا ڕووداوەی دڵتەزێنی زۆری لێکەوتۆتەوە و گیانی چەند هاووڵاتییەکی کوردی گرتووە.
ناستانداردبوونی تراکتۆرەکانی بەرهەمهێندراو لە ئێران و بەتایبەت کێشەی تەکنیکی لە بەشی کۆنترۆڵی ئەو تراکتۆرانەدا، یەکێک لە هۆکارەکانی مەرگی هاووڵاتیانی کورد بە تراکتۆرە، ڕووداوێک کە تا ئێستا لە لایەن ڕژیمەوە نە وەئەستۆ گیراوە و نە چارەیەکی بۆ بیندراوەتەوە.
کەرتی بەرهەمهێنانی ترۆمبیل لە ئێران بە گشتی تووشی شکست بووە و لە هەمبەر بازاڕی دەرەکی، توانای ململانێ و خۆڕاگری نەماوە، ئەوەش وایکردووە کەرستەی نالەبار و ناستاندارد بەڵام هەرزانتر لە بەشی بەرهەمهێنانی ترۆمبیل لە ئێران بەکار بهێندرێت کە ئەنجامەکەی مەرگی هاووڵاتیانە لە ئێران و کوردستان.
